26.11.2015

ЎЗХДП ФРАКЦИЯСИ АЪЗОЛАРИ

сайлов округларида учрашувлар ўтказмоқда

Тошкент шаҳридаги 128-Саноат сайлов округидан Олий Мажлис Қонунчилик палатаси депутати, ЎзХДП фракцияси аъзоси Рустам Комилов сайловчилар билан учрашиши ҳақида эшитдик. Учрашув бўлиб ўтадиган Яшнобод туманидаги «Асалобод» маҳалласига кириб борганимизда кўпчилик йиғилиб турган экан. Кейин билсак, улар депутат билан учрашувга келишибди. Пайтдан фойдаланиб, учрашув бошлангунга қадар сайловчилар билан суҳбатда бЎлдик.

— Депутатнинг бизга кўп ёрдами тегади, — дейди 170 - умумтаълим мактаби директори Мавжуда Эргашева. — Ҳар гал учрашувда ҳудудимизга тегишли ижтимоий масалалар бўйича мурожаат қиламиз ва улар белгиланган вақтда ҳал этилади. Бугунги мулоқотда ҳам мактабимиз олдида светафор ўрнатиш масаласини кўтармоқчиман. Бу ўқувчилар хавфсизлигини таъминлаш билан бирга, уларга қулайлик яратади, деб ўйлайман.

— Бу йил касб-ҳунар коллежини тамомлайман, — дейди Тошкент ихтисослаштирилган хотин-қизлар коллежи ўқувчиси Зуҳра Ҳожиматова. — Мени келгуси йил учун қабул қилинган бандлик дас­тури қизиқтиряпти. Шунингдек, мамлакатимизда аҳоли банд­лигини таъминлашнинг ҳуқуқий асослари, меҳнат қонунчилиги ҳақида депутатга қатор саволларим бор. Ўйлайманки, бу учрашувда ўзим учун керакли маълумотларга эга бўламан.

 Кўриниб турибдики, сайловчилар учрашувга шунчаки келишмаган. Кимдир қайсидир масалага жавоб излаб келган бўлса, кимнидир қонунчиликка оид савол қизиқтиради. Шунинг учун бўлса керак, депутат билан бу галги учрашув сайловчиларнинг фаол иштироки, қизғин савол-жавоблар ва жонли мулоқот асосида ўтди.

Сайловчилар томонидан таълим, банк-молия, соғ­лиқни сақлаш, уй-жой-коммунал хўжалиги, тран­с­порт, қурилиш, алоқа масалаларига оид саволлар ва таклифлар билдирилди.

Депутат юртимизда ҳар бир одам меҳнат қилиши, ўз қобилияти ва фуқаролик позициясини намоён этиши учун яратилган шарт-шароит­ларга алоҳида тўхталиб ўтди. 2016 йилда иш ўринлари ташкил этиш ва аҳоли бандлигини таъминлаш дастури, парламентнинг қонун ижодкорлиги фаолияти, қо­нунларнинг мазмун-моҳия­ти, муҳокама қилинаётган қо­нун лойиҳаларининг аҳа­мияти ҳақида ахборот берди.

— Тумандаги бир неча маҳаллада сайловчилар билан учрашганимда касб-ҳунар коллежлари битирувчиларининг амалиёт ўташи, ишга жойлашиши масалаларида мурожаатлар бўлди, — дейди депутат. — Бу масала биз учун устувор аҳамиятга эга. Чунки ижтимоий ҳимоянинг энг самарали йўли бандликни таъминлашдир. Давлатимиз томонидан бу борада изчил ислоҳотлар амалга оширилаяпти. Лекин уларнинг янада самарали бўлиши, фарзандларимизнинг яхши ўқиб, муваффақиятли ишлаб кетиши ота-оналарнинг бу масалага қай даражада жиддий қараётганига ҳам боғлиқ эканини унутмаслик керак, деб ўйлайман.

Шунингдек, депутат учрашувда дунёнинг айрим давлатларида сиёсий беқарорлик давом этаётган бир пайтда мамлакатимиздаги тинчлик ва барқарорликни асрашга барчамиз бирдек масъул эканимизни таъкидлади.

Депутатнинг учрашувлари Алишер Навоий номидаги, «Гўзал», «Олмос» ва «Тузел» маҳаллаларида ҳам бўлиб ўтди. Уларда мамлакатимиз ижтимоий-иқтисодий ҳаёти, парламентнинг қонун ижодкорлиги фаолияти билан боғлиқ масалалар ҳақида савол-жавоблар бўлди.

127-Қорақамиш сайлов округидан Олий Мажлис Қонунчилик палатаси депутати, ЎзХДП фракцияси аъзоси Шуҳрат Мамажоновнинг сайловчилар билан учрашувлари ҳам самимий ва қизғин суҳбат асносида ўтмоқда.

Олмазор туманидаги 15-оилавий поликлиникада ўтказилган учрашувда аҳоли бандлигини таъминлаш, пенсия ва ижтимоий нафақалар тўлашнинг ҳу­қу­қий асослари юзасидан сайловчилар кўплаб саволлар билан мурожаат этишди. Депутат уларнинг ҳар бирига батафсил жавоб қайтарди, учрашувга келганларнинг жойларда қо­нунлар ижроси билан боғлиқ фикр-мулоҳазаларини тинг­лади.

Олий Мажлис Қонунчилик палатаси депутатларининг сайловчилар билан учрашувлари давом этмоқда.

 

Лазиза ШЕРОВА,

«Ўзбекистон овози» мухбири.



DB query error.
Please try later.