24.11.2015

ИККИНЧИ БОСҚИЧ ЯКУНИГА ЕТМОҚДА

«Ўзбекистон ХДПнинг энг фаол аёли» кўрик-танловининг Сурхондарё вилоят босқичи ўзига хос байрамга айланди. ЎзХДП Сурхондарё вилоят кенгаши раиси Чори Жумақулов танловни кириш сўзи билан очиб, иштирокчиларга омад тилади.

— Айни кунда вилоятимизда 34800 дан ортиқ партиямиз аъзоси бўлса, шундан 12500 нафари хотин-қизлардир, — дейди вилоят партия кенгаши етакчиси. — Биз сафимизга ташаббускор, интилувчан хотин-қизларни жалб қилишга алоҳида эътибор қаратяпмиз. Бу йил 2 мингга яқин ЎзХДПга аъзо қабул қилинган бўлса, уларнинг 45 фоизга яқини хотин-қизлардан иборатлиги бунинг ёрқин исботидир. Улар орасида кўрик-танловда иштирок этиш истагини билдирганлар кўпчиликни ташкил этди. Масалан, танловнинг саралаш босқичи 100 нафардан ортиқ фаол ва ташаббускорларни бирлаштирди. Уларнинг 14 нафари вилоят босқичида иштирок этиш ҳуқуқини қўлга киритди.

Танлов бошланди... Иштирокчилар «Лойиҳа тақдимоти», «Қонунларимиз ҳаётимиз асосидир» ва «Сиёсий ҳозиржавоблик» шартлари бўйича ўзаро беллашди. Ҳар бир чиқиш ҳакамлар ҳайъати томонидан одилона баҳолаб борилди.

— Танлов менда яхши таассурот қолдирди, — дейди Ангор туманидаги 3-ихтисослаштирилган мактаб-интернат ўқитувчиси Олия Чориева. — Саралаш босқичидаёқ нафақат иштирокчилар, балки кузатувчи опа-сингилларимиз ҳам мамлакатимиз Конституцияси, қабул қилинган қонунларнинг мазмун-моҳияти билан яқиндан танишишди. Бу уларнинг дунёқарашини кенгайтириш баробарида ҳуқуқий саводхонлигини ҳам оширди, деб ўйлайман.

Иштирокчилар ҳар бир шарт бўйича маҳорат ва иқтидорларини намо­йиш қилишди. Уларнинг сиёсий, мафкуравий ва ҳуқуқий билимлари олқишлар билан қарши олинди. Шартлар бўйича чиқишларни ҳакамлар ҳайъати аъзолари баҳолаб боришди. Унга кўра, Шеробод туманидаги 3-умумтаълим мактаби ўқитувчиси Малоҳат Ибодуллаева 3-ўринни қўлга киритган бўлса, Шўрчи Маиший хизмат кўрсатиш касб-ҳунар коллежи директори Райҳона Раҳимовага 2-ўрин насиб этди. Денов тиббиёт коллежи ўқитувчиси Шаҳло Қодирова эса 1-ўринни эгаллаб, кўрик-танловнинг республика босқичида иштирок этиш ҳуқуқини қўлга киритди.

 

* * *

Танловнинг Наманган вилоят босқичида 11 нафар хотин-қиз иштирок этди. Вилоят Ёшлар марказида бўлиб ўтган танлов байрам тусини олди. Партия аъзоларининг ҳунармандчилик маҳсулотлари кўргазмаси, ташкилотчилар томонидан тайёрланган бадиий дастур намойиш қилинди.

Партия вилоят кенгаши раиси Дилором Абдураҳимова ЎзХДП Сайловолди дастурида белгиланган вазифаларни амалиётга татбиқ этишда партиямиз сафидаги хотин-қизлар салоҳиятидан самарали фойдаланиш муҳим ўрин тутишини таъкидлади.

Танлов давомида қатнашчилар аёллар бандлигини таъминлашга доир ижтимоий лойиҳаларини тақдим этишди. Қонунларни шарҳлаш давомида сиёсий ҳозиржавоблик ва нотиқлик қобилиятини намойиш этишди.

Ҳакамлар ҳайъатининг хулосасига кўра, Поп тумани вакиласи Гулбаҳор Мамадалиева ғолибликни қўлга киритиб, танловнинг республика босқичига йўлланма олди. Тўрақўр­ғонлик Гулсанам Аҳмедова иккинчи, Наманган шаҳри вакиласи
Нилуфар Бойхонова учинчи ўринга муносиб топилди.

 Шунингдек, иштирокчилар «Энг зукко ва билимдон», «Энг фаол ва ҳозиржавоб», «Энг изланувчан ва интилувчан», «Энг самарали ижтимоий лойиҳа учун», «Энг фаол ҳуқуқ билимдони» каби номинациялар билан ҳам тақдирланди.

 

Абдумалик ҲАЙДАРОВ,

Носиржон ДЕҲҚОНОВ,

«Ўзбекистон овози» мухбирлари.



DB query error.
Please try later.