24.11.2015

БАРЧА ЮТУҚЛАРИМИЗНИНГ ҲУҚУҚИЙ АСОСИ

Ўзбекистон Республикаси Олий Мажлиси Қонунчилик палатасининг Қонунчилик ва суд-ҳуқуқ масалалари қўмитаси томонидан «Ўзбекистон Республикасининг Конституцияси — демократик ислоҳотларнинг ҳуқуқий асоси» мавзусида давра суҳбати ўтказилди.

Унда сўзга чиққанлар Президентимиз Ислом Каримов ташаббуси билан қабул қилинган Конституциямизда мамлакатимизда истиқомат қилаётган барча фуқароларнинг ҳуқуқ ва бурчлари, илғор халқаро тажриба, ҳуқуқ­шуносликнинг умумэътироф этилган қоида ва тамойиллари мужассам этилганини таъкидлади.

Барча соҳалардаги кенг кўламли ислоҳотлар, қўлга киритилган улкан ютуқ ва марраларимизда, Ватанимизнинг жаҳон миқёсида обрў-эътибор қозонаётганида Бош қомусимиз қоида ва тамойиллари муҳим асос бўлиб хизмат қилмоқда.

Асосий қонунимиз ва давлатимиз раҳбари томонидан илгари сурилган Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси юртимиз истиқболини белгиловчи муҳим дастурил­амалга айланди.

Мазкур концепцияга мувофиқ 2011 ва 2014 йилларда Конституциямизга киритилган тузатишлар ва бошқа қатор қонунчилик ҳужжатлари давлат ҳокимиятининг асосий субъектлари – Олий Мажлис, ҳукумат ваколатларини, қонун чиқарувчи, ижро этувчи ва суд ҳокимияти ўртасида ўзаро тийиб туриш ва манфаатлар мувозанати механизмларини янада ривожлантиришни таъминлади.

Президентимизнинг 2015 йил 23 январь куни Ўзбекистон Республикаси Олий Мажлиси Қонунчилик палатаси ва Сенатининг қўшма мажлисидаги маърузасида белгиланган вазифалар асосида Қонунчилик палатаси депутатлари томонидан ташкилий-ҳуқуқий тадбирлар, қонун ижодкорлиги ва назорат-таҳлил ишлари дастури қабул қилинди.

Давра суҳбатида Асосий қонунимизни ёш авлодга чуқур ўргатишга алоҳида эътибор қаратилаётгани таълимнинг барча тизимида ўз ифодасини топаётгани таъкидланди. «Парламентаризм билимдонлари», «Сиз қонунни биласизми?» каби кўрик-танловлар мунтазам ўтказилаётгани ёшларда Конституцияни билиш орқали Ватанга садоқат, ижтимоий бурч ва масъулият, қонунга ҳурмат туйғуларини мустаҳкам қарор топтиришда муҳим омил бўлмоқда.

Тадбирда Ўзбекистон Конституцияси, юртимизда амалга оширилаётган ислоҳотларнинг мазмун-моҳияти, уларни аҳоли, айниқса, ёшларга кенг етказишга оид долзарб вазифалар хусусида фикр алмашилди.

 

Н.УСМОНОВА,

ЎзА мухбири.



DB query error.
Please try later.