17.11.2015

«АГРОБАНК» КРЕДИТЛАРИ ЯНГИ ИШ ЎРИНЛАРИ ЯРАТИЛИШИГА ХИЗМАТ ҚИЛМОҚДА

Ўзбекистон Республикаси Марказий банки ҳамда «Агробанк» АТБ ҳамкорлигида «Банклар томонидан қишлоқ хўжалиги маҳсулотлари ишлаб чиқарувчиларни молиявий қўллаб-қувватлаш» мавзуcида матбуот анжумани ўтказилди.

Унда деҳқон ва фермер хўжаликлари фаолиятини ривожлантириш ва рағбатлантириш борасида «Агробанк» АТБ томонидан олиб борилаётган ишлар ҳақида сўз борди.

Мазкур молия муассасаси томонидан фермер хўжаликлари, хусусий тадбиркорларнинг бизнес ло­йиҳаларини молиявий қўллаб-қувватлашга алоҳида эътибор қаратаётгани айтиб ўтилди. Шунингдек, аҳолига тезкор, сифатли ҳамда замонавий банк хизматлари кўрсатиш бўйича ҳам тизимли ишлар амалга оширилаётгани таъкидланди.

Жумладан,  2015 йилнинг ўтган даврида ер ва мулк эгаларининг турли бизнес лойиҳаларини, қишлоқ хўжалиги ҳамда бошқа хўжалик юритувчи субъектлар фаолиятини молиявий қўллаб-қувватлаш учун қарийб 2,5 триллион сўм кредит ажратилди. Ушбу маблағнинг 31 миллиард сўми қишлоқ хўжалиги корхоналарининг моддий-техник базасини мустаҳкамлашга, 108 миллиард сўми эса  озиқ-овқат маҳсулотлари ишлаб чиқаришни кўпайтиришга қаратилган лойиҳаларни молиялаштиришга йўналтирилди.

— Маблағлар тақсимотида барча тармоқлар эътиборга олинади, — дейди «Агробанк»нинг қишлоқ хўжалигини кредитлаш бошқармаси бўлим бошлиғи Азизбек Аҳмадалиев. — Масалан, иссиқхоналар қурилишига 11,7, чорвачиликни ривожлантиришга 55, паррандачиликка 5,8, балиқчилик ва асаларичиликка 7,4, иссиқхона қурилиши ва уруғлик картошка етиштириш учун эса 13,4 миллиард сўм кредит ажратилди.

Кредитлар ҳисобига ишлаб чиқариш жараёни модернизация қилиниб, технологик қайта жиҳозланмоқда.

Кўплаб лойиҳалар амалга ошиши натижасида жорий йилда 40100   иш ўрни яратилди.

Анжуманда журналистлар ўзларини қизиқтирган саволларга жавоб олишди.

 

Наврўз ШОДМОНҚУЛОВ


Фикр ва мулохазалар

Защита от автоматических сообщений

Сўнгги янгиликлар: