10.11.2015

ПАРТИЯ ГУРУҲЛАРИ ВА ТАШКИЛОТЛАРИ ҲАМКОРЛИГИ

электорат манфаатлари самарали ҳимоя қилинишида муҳим аҳамиятга эга

ЎзХДП Тошкент шаҳар кенгаши Фуқаролик жамияти шаклланишини мониторинг қилиш мустақил институти Тошкент шаҳар ҳудудий бўлинмаси билан ҳамкорликда давра суҳбати ўтказди. Унда партия гуруҳлари ишини янада кучайтириш, партия ташкилотлари билан алоқасини янада жонлантириш масалалари муҳокама этилди.

Дастлаб Ўзбекистон ХДП Тошкент шаҳар кенгаши раиси Ҳайдар Бобохонов маҳаллий Кенгашлардаги партиямиз гуруҳлари, маҳаллий партия ташкилотлари олдида турган муҳим вазифалар хусусида сўз юритди.

— Демократик тамойиллар ҳаётимизга кенг жорий этилаётган ҳозирги шароитда зиммамиздаги масъулият янада ошмоқда, — деди у. — Қонунчилигимизда ижро этувчи ҳокимият фаолияти устидан депутатлик назоратини кучайтиришнинг ҳуқуқий асослари мустаҳкамлангани депутатлар, партия маҳаллий кенгашлари ва бошланғич ташкилотларнинг ҳамжиҳатлигини ҳар қачонгидан ҳам фаол­­лаштириш зарурлигини кўрсатмоқда. Ҳар бир депутат ўз сайлов округидаги фаолиятини тизимли равишда йўлга қўйса, партия ташкилотлари билан ижтимоий масалалар ечимида ҳамфикр бўлса, бу электорат манфаатлари ҳимоясига хизмат қилади.

— Тўғри таъкидладингиз, — дея унинг фикрини давом эттирди халқ депутатлари Тошкент шаҳар Кенгашидаги ЎзХДП гуруҳи аъзоси Нигора Эшметова. — Партия гуруҳлари ва ташкилотлари ҳамкорликда амалий ташаббусларни қанча кучайтирса, давлат ҳокимиятининг вакиллик органлари ва аҳоли ўртасида кўприк шунча мустаҳкамланади. Аммо партия ташкилотлари, гуруҳлари фақатгина бир-бирига нималар қилаётгани ҳақида ахборот бериш билан чекланиб қолмаслиги керак. Бошланғич ташкилотлар ва депутатлар доимий алоқада, ҳамфикр бўлиб фаолият юритиши муҳим саналади. Чунки бошланғич ташкилот одамларнинг кундалик муаммоларини яхши билади, улар ҳақида фикр ва ҳаётий таклифлар айта олади. Депутатнинг қуйи бўғин билан алоқаси яхши бўлса, бу орқали жамоатчиликни нима ўйлантиряпти, ислоҳотларга муносабат қандайлигини аниқ билиш имконига эга бўлади.

Яна бир фикр. Жамоатчилик қабулхоналарига бўлаётган мурожаатларни олиб кўрайлик. Уларни таҳлил этиш, ҳал қилиш жараёнида ҳам партия ташкилотлари ва депутатлар ҳамкорлиги қўл келади. Айтайлик, Жамоатчилик қабулхонасига мурожаат бўлди. Партия ташкилоти бу масалани депутатлар гуруҳи билан биргаликда ҳал этиши лозим. Боиси, мурожаатлар ортида нафақат бир инсон, балки кўпчиликни ўйлантириб келаётган масала турган бўлиши мумкин. Мурожаатлар ўрганилиб, умумлаштирилиб, доимий комиссия ва сессиялар даражасигача олиб чиқилса, самарадорлик янада ортади.

Давра суҳбатида, шунингдек, депутат сўрови, депутатлик назоратидан фойдаланиш ваколатлари ва имкониятлари ҳақида ҳам фикр юритилди. Партия фаолиятини янада такомиллаштиришга доир таклифлар, ташаббуслар кўпроқ қуйидан чиқса, бунда маҳаллий Кенгашлар, партия аъзолари фаоллик кўрсатса, мақсадга мувофиқ бўлиши таъкидланди. Партия гуруҳлари, депутатлар ўртасида доимо фикрлар қарама-қаршилиги, мунозаралар бўлиши кераклиги, бу амалий рақобат муҳитини яхшилашга хизмат қилиши хусусида сўз борди.

Тадбир якунида маҳаллий Кенгашлардаги партия гуруҳлари фаолиятини такомиллаштириш, уларнинг ҳудудий партия ташкилотлари билан ўзаро ҳамкорлигини кучайтириш юзасидан таклиф ва тавсиялар билдирилди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.