05.11.2015

БОЛАЛАРНИ ПНЕВМОКОКК ИНФЕКЦИЯСИГА ҚАРШИ ЭМЛАШ БОШЛАНДИ

Соғлиқни сақлаш вазирлиги томонидан ўтказилган анжуманда шу ҳақда фикр юритилди

Тадбирда Соғлиқни сақлаш вазирлиги санитария эпидемиология хизматининг етакчи мутахассислари, илмий тадқиқот институтлари ходимлари, Жаҳон Соғлиқни сақлаш ташкилоти ва ЮНИСЕФнинг Ўзбекистондаги ваколатхоналари раҳбарлари иштирок этди.

Матбуот анжуманида таъкидланганидек, бугунги кунда мамлакатимизда пневмококк инфекциясига қарши янги вакцина жорий этилган бўлиб, барча бирламчи тиббиёт масканларида болаларни эмлаш ишлари бошланган.

Маълумот ўрнида шуни айтиш лозимки, пневмококк ўпка, мия ва юрак қобиғи, қулоқ, бурун бўшлиқлари, нафас йўллари, бўғимлар яллиғланиши каби оғир касалликларни келтириб чиқарувчи хасталикдир. Жаҳон соғ­лиқни сақлаш ташкилоти маълумотига кўра, дунёда ҳар йили 1,6 миллион киши, жумладан, 800 минг бола ушбу инфекция туфайли келиб чиқадиган оғир касалликлардан нобуд бўлмоқда.

— Охирги ўн йилда республикамизда полиомиелит, қизамиқ-қизилча ва вирусли гепатитга қарши курашишда бир қатор ижобий натижаларга эришилди, — дейди Соғлиқни сақлаш вазири ўринбосари, Бош давлат санитария врачи Саид­мурод Сайдалиев. — Мамлакатимизда профилактика ­эмлаш ишлари фуқаролар ­соғлиғини ҳимоялаш ва аҳолини санитария-эпидемиологик осойишталигини таъминлашга қаратилган. Мазкур тадбирга жорий йилнинг ўзида 13 миллиард 600 миллион сўм маблағ сарфланган. Болаларни эмлашда фойдаланиладиган, жаҳон тиббиётида кенг қўлланилаётган энг самарали воситалар олиб келиниб, тегишли тартибда тиббий лаборатория синовларидан ўтказилди. Улар ­Соғлиқни сақлаш вазирлиги томонидан мувофиқлик сертификати билан кафолатланди ва жойлардаги эмлаш пунктларига етказиб берилди. Амалга татбиқ этилаётган янгиликдан аҳолини хабардор қилиш мақсадида хонадонлар, маҳаллаларда тушунтириш ишлари олиб борилди.

Саккиз мингдан зиёд ўрта тиббиёт ходими эмлаш ишларини амалга ошириш бўйича махсус тайёргарликдан ўтказилди. Махсус ўқув-услубий машғулотларда қишлоқ врачлик пунктлари ва оилавий поликлиниканинг умумий амалиёт врачлари ва патронаж ҳамширалари иштирок этди.

Таъкидлаш жоизки, изчил саъй-ҳаракатлар натижасида аҳоли ўртасида кўплаб юқумли касалликлар бўйича эпидемик вазият барқарорлиги таъминланди. Шу боис 2002 йилда Жаҳон соғлиқни сақлаш ташкилоти томонидан «Ўзбекистон полиомиелит касаллигидан холи ҳудуд» эканлигини тасдиқловчи сертификат берилди.

Тадбир давомида мамлакатимизда профилактик Миллий эмлаш тақвими мунтазам ўтказиб борилаётгани ҳақида ҳам сўз борди.

— Аҳоли орасида ўткир ичак касалликларининг олдини олиш мақсадида 2014 йилдан бошлаб ротавирус инфекциясига қарши эмлаш амалиёти ҳам йўлга қўйилди, — дейди Тошкент шаҳар давлат санитария-эпидемиология назорат маркази бош врачи ўринбосари Вазира ­Муталова. — Вирусология илмий текшириш институти маълумотига кўра, 5 ёшгача бўлган болалар орасида диарея касалликлари билан касалланиш 30 ­фоизга камайди. Жорий йилнинг 2 ноябридан бошлаб, Соғлиқни сақлаш вазирлигининг даволаш-профилактика муассасалари эмлаш пунктларида 2, 3 ва 12 ойлик болаларни пневмококк ин­фек­­­­­ция­сига қарши эмлаш бошланди.

Мутахассислар қайд этганидек, пневмококк инфек­ция­­сига қарши вакцина самарали ва хавфсиз ҳисобланиб, мушак орасига юборилади ва 10 йилдан кам бўл­маган муддатга фаол иммунитет ҳосил қилади. ЖССТ ҳамда Соғлиқни сақлаш вазирлиги томонидан вакцинанинг хавфсизлиги, яроқлилиги кафолатланган. Мазкур эмлаш бепул амалга оширилади.

Тадбир доирасида Юнус­обод туманидаги 51-оилавий поликлиникада пресс-тур ташкил этилиб, иштирокчилар пневмококк инфекцияга қар­ши эмлашнинг бошланганига гувоҳ бўлишди.

 

Наврўз ШОДМОНҚУЛОВ 



DB query error.
Please try later.