05.11.2015

ОИЛА – МАҲАЛЛА – ТАЪЛИМ МУАССАСАСИ ҲАМКОРЛИГИ

«Маҳалла» хайрия жамоат фонди томонидан «Оила — маҳалла — таълим муассасаси» ҳамкорлиги масалаларига бағишланган матбуот анжумани ўтказилди.

Унда «Маҳалла» хайрия жамоат фонди республика бошқаруви раисининг биринчи ўринбосари Долли ­Аллаев бу борада амалга оширилаётган ишлар ҳақида батафсил маълумот берди.

 — Барча таълим муассасаларини бирлаштириб турадиган маскан маҳалла ҳисобланади, — деди маърузачи. —  «Бир фарзандга етти маҳалла оталик қилади», деб бежиз айтилмаган. Дунёда тенги йўқ бундай қадриятларимиз маҳалла зиммасига катта масъулият юклаши табиий. Биз бу борада Халқ таълими вазирлиги, «Оила» илмий-амалий маркази, Хотин-қизлар қўмитаси, Республика Маънавият тарғибот маркази ҳамда бир қатор муассасалар билан ҳамкорлик қилиб келмоқдамиз. Айниқса, «Оила — маҳалла — таълим муассасаси» ҳамкорлиги доирасида соғ­лом турмуш тарзини шакллантиришда фуқаролар йиғинлари, маҳалла кенгашлари оқсоқоллари ва фаоллари, диний маърифат ва маънавий-ахлоқий тарбия масалалари бўйича маслаҳатчилар фаолияти муҳим аҳамият касб этмоқда.

— Таълим ва тарбияни бир-биридан ажратиб бўл­майди, — деди Халқ таълими вазирлиги бошқарма бошлиғи Жамолиддин ­Камолов. — Оила, ўзини ўзи бошқариш идораларининг таълим муассасалари билан ҳамкорлигини тизимли йўлга қўйиш, ота-онанинг бола тарбиясидаги масъулиятини ошириш натижасида ўқувчилар давомати 98,3 фоизга кўтарилди. Ҳозиргача Тошкент шаҳри ва яна бешта вилоят таълим-тарбия муассасалари фолияти ўрганиб чиқилди, бу жараён давом этмоқда.

— Биз ўз тизимимиз ­ор­қали ҳар бир хонадоннинг шарт-шароити, ундаги муҳит билан танишиш имконига эга бўляпмиз, — деди «Оила» илмий-амалий мар­­кази «Оила маънавияти» ­бўлими мудири, филология фанлари доктори ­Мунаввара Яқуббекова. — Маълумки, оила нотинчлиги фарзанд тарбиясига ёмон таъсир кўрсатади. Хўш, оилани ўрганиш маданияти қандай бўлиши лозим? Нотинч оилалар билан ишлашда нималарга эътибор бериш керак? Биз ҳар бир оила билан ишлашда ана шу жиҳатларга алоҳида эътибор берамиз ва бу борада ўз қўл­ланма­лари­мизни тавсия қиламиз. Зиёли, ораста, юксак маданиятли оилаларнинг тажрибаларини оммалаштирамиз.

Анжуман якунида оммавий ахборот воситалари ходимлари ўзларини қизиқтирган саволларга жавоб олишди.

 

Нуруллоҳ ДОСТОН,

«Ўзбекистон овози» мухбири.



DB query error.
Please try later.