02.11.2015

МУРОЖААТЛАР ЭЪТИБОРСИЗ ҚОЛМАЙДИ

Пойтахтимизнинг Олмазор туманида Ўзбекистон Халқ демократик партияси Марказий Кенгаши томонидан ­«Фуқаролар мурожаатларини самарали ҳал этишда партия ташкилотлари ва депутатлар олдида турган долзарб вазифалар» мавзусида давра суҳбати ташкил этилди.

Президентимиз Ислом ­Каримов раҳнамолигида амалга оширилаётган кенг кўламли ислоҳотлар самарасида инсон манфаатлари, уларнинг ҳақ-ҳуқуқлари бузилишининг олдини олиш, хусусан, мурожаатлар билан ишлаш ва уларга ечим топиш бўйича қатор амалий чора-тадбирлар кўрилмоқда.

Бу жараёнда Ўзбекистон Халқ демократик партияси ҳудудий кенгашлари қошидаги Жамоатчилик қабулхоналари электорат манфаатларига дахлдор муаммоларни ўз вақтида аниқлаш ва ҳал этишда муҳим восита бўлиб хизмат қилмоқда. Хусусан, жойлардаги 207 ана шундай қабулхоналар орқали жорий йилнинг ўтган даврида 6,5 мингга яқин мурожаат ижобий ҳал этилди.

Партия Сайловолди дастурида аҳолининг ёрдамга муҳтож қатламини манзилли ижтимоий ҳимоя қилиш, кам таъминланган оилаларга моддий ёрдам ва ижтимоий нафақалар тўлаш тизимини такомиллаштириш, якка тартибдаги меҳнат фаолиятини микрокредитлаш ва микромолиялаш тизими самарадорлигини янада ошириш ва ислоҳ қилиш тарафдори экани белгиланган. Бу партия ташкилотлари ва гуруҳлари олдига бир қатор вазифаларни қўяди.

— Фуқаролардан тушган мурожаатлар ўрганиб чиқилиб, уларни ҳал этиш борасида барча чора-тадбирлар кўрилмоқда, — дейди Олий Мажлис Қонунчилик палатасидаги ЎзХДП фракцияси аъзоси Акмал Умаралиев. — Партиядан сайланган депутатлар ва аҳолининг ижтимоий ҳимоясига масъул давлат ­бошқаруви органлари вакиллари ҳамкорлигида фуқароларга тавсиялар берилиб, кўплаб мурожаатлар ўз жойида ечим топишига эришилаётир.

Халқ депутатлари маҳаллий Кенгашлари депутатларининг назорат функцияларини мустаҳкамлаш, давлат ҳокимияти ва бошқарув органларининг минтақаларни ижтимоий-иқтисодий ривожлантиришнинг аниқ вазифаларини ҳал қилиш борасидаги фаолиятига таъсирини оширишда бу каби тадбирлар муҳим аҳамият касб этмоқда.

Давра суҳбатида партия Сайловолди дастурида кўзда тутилган вазифаларни ҳаётга самарали татбиқ этиш хусусида сўз юритилди. Фуқароларнинг жойлардаги давлат ҳокимияти ва бошқаруви органларига мурожаатларини ўз вақтида кўриб чиқиш ва самарали ҳал этишда партия ҳудудий ташкилотлари олдидаги вазифалар белгиланди.

 

Даврон СУННАТОВ,

ЎзА мухбири.



DB query error.
Please try later.