29.10.2015

ЎЗБЕКИСТОН МИНТАҚАДА

барқарорликни таъминлашда муҳим ўрин тутади

Япония оммавий ахборот воситаларида Бош вазир Шиндзо Абэнинг Ўзбекистонга ташрифи билан боғлиқ кўплаб материаллар эълон қилинмоқда. Уларнинг айримларини қисқартирилган ҳолда газетхонларимиз эътиборига ҳавола этаяпмиз.

«Nikkei»: «Япония Ўзбекистонни ўзининг яқин ­ҳамкори ҳисоблайди»

Кунчиқар мамлакатда чоп этиладиган «Nikkei» газетаси обрўли нашрлардан бири ҳисобланади. 4,7 миллион нусхада нашр қилинадиган мазкур газета 1876 йилдан чиқа бошлаган. Унда мазкур мавзуга доир қуйидаги фикрлар билдирилган.

«Япония Бош вазири Шиндзо Абэнинг Ўзбекистонга қилган ташрифи мазкур мамлакатни ўзининг яқин ҳамкори деб ҳисоблашини кўрсатади.

Делегация таркибидан савдо уйлари, банклар, инжиниринг компаниялари, олий ўқув юртлари, хусусий ташкилотлар ва бошқа муассасалар вакиллари ўрин олди. Ушбу сафардан кўзланган асосий мақсад минтақада стратегик ҳамкорликни янада ривожлантириш, янги лойиҳаларни амалга оширишдан иборат.

Япония томони Ўз­бе­кис­тон билан савдо, са­ноат, молия, энергетика, фан-таълим, маданият ка­би соҳаларда ҳамкорликни янада кенгайтириш масаласида келишувга эришди. Шунингдек, ўзаро стратегик алоқаларни мус­таҳ­камлаш юзасидан фикр алмашилди. Бу учрашувдан ке­йин имзоланган ҳужжатларда ўз аксини топди.

Шуни алоҳида таъкидлаш жоиз, охирги марта 2006 йилда Япония Бош вазири Ўзбекистонга борган эди. »

 

«Yomiuri Shimbun»: «Япония ҳукумати Ўзбекистон иқтисодиёти янада ривожланишига ўз ҳиссасини қўшмоқчи эканлигини билдирди»

1874 йилдан чиқа бошлаган «Yomiuri Shimbun» газетаси бир кунда икки марта чоп этилади. Ушбу нашр дунёда кўп нусхада босиладиган газеталардан бири ҳисобланади. Газета учрашув тафсилотлари ҳақида қуйидагиларни ёзди:

«Япония Бош вазири Шиндзо Абэ Ўзбекистон Республикаси Президенти Ислом Каримов билан суҳбат чоғида кўплаб масалалар юзасидан ўзаро ҳамкорликни янада кенгайтиришга келишиб олди. Япония ҳукумати Ўзбекистон иқтисодиёти ривожланишида бевосита иштирок этишга тайёр эканлигини билдирди.

Шунингдек, хавфсизлик ва барқарорликни таъминлаш, халқаро таҳдид ва хавф-хатарларга қарши биргаликда курашиш масалалари муҳокама қилинди. Тинчлик ва бар­қарорликни сақлаш бутун дунё учун жуда зарур эканлиги алоҳида таъкидланди. Икки давлат раҳбарлари минтақадаги вазият ҳақида ҳам суҳбатлашишди . »

 

«Ўзбекистон овози» мухбири

Темур АЪЗАМ тайёрлади.



DB query error.
Please try later.