26.10.2015

ОНА ТИЛИ —

ўзлигимиз ифодаси

Президентимиз «Ўзбекистон мустақилликка эришиш остонасида» китобида она тилини билмайдиган одам ўзининг шажарасини, ўзининг илдизини билмайдиган, келажаги йўқ одам, деган фикрни таъкидлаган эди. Бугун ушбу фикрлар қанчалик ҳаётий эканини даврнинг ўзи кўрсатиб турибди.

Мирзо Улуғбек туманидаги информатика касб-ҳунар коллежида ЎзХДП Тошкент шаҳар кенгаши томонидан ўтказилган давра суҳбатининг мазмун-моҳияти ана шу масалага қаратилди.

Тадбирда ЎзХДП Марказий Кенгаши масъул ходимлари, халқ депутатлари Тошкент шаҳар Кенгашидаги партия гуруҳи аъзолари, «Истиқбол» ёшлар қаноти вакиллари, партия ­фаоллари, таниқли шоирлар ҳамда «Ўзбекистон овози» газетасининг ижодий ходимлари иштирок этдилар.

1989 йил 21 октябрда ўзбек тилига давлат тили мақомининг берилиши халқимиз ҳаётида, Ватанимиз тарихида муҳим воқеа бўлганини вақт ўтган сайин теранроқ ва чуқурроқ англаб бормоқдамиз. Тилни асраб-авайлаш, уни бойитиш ва ривожлантириш ҳар бир халқ учун ўзлигини таниши, қадриятлари тикланиши, тараққиётида муҳим ўрин тутади. 

Ўзбекистонда бугунги кунда 130 дан зиёд миллат ва элат вакиллари аҳил-иноқ яшаб, мамлакатимиз тараққиёти ва халқимиз фаровонлиги йўлида фидокорона меҳнат қилмоқда. Умумтаълим мактабларида рус, қозоқ, тожик, туркман тиллари ўқитилмоқда.

— Тил муҳим ижтимоий-сиё­сий масала ҳисобланади, — деди «Ўзбекистон овози» ва «Голос Узбекистана» газеталари Бош муҳаррири Сафар Остонов. — Мустабид тузум даврида ўзбек тилига давлат тили мақоми берилиши истиқлол сари ташланган муҳим қадамлардан бири бўлган эди. Шу боис бу воқеа­нинг халқимиз тақдиридаги тарихий аҳамияти беқиёсдир.

Ўтган даврда она тилимизнинг янада сайқалланиши, бадиийлиги, тарихийлиги, дунё миқёсида аҳамияти ҳамда нуфузини оширишга қаратилган қатор изланишлар, илмий тад­қиқотлар олиб борилди. Натижада ўзбек тилининг халқаро миқёсда обрўси ошиб, фаол мулоқот воситасига айланиб бормоқда. Турли даражадаги расмий учрашув ва музокараларда тилимиз кенг қўлланаётгани, хориждаги қатор таълим даргоҳларида, илмий ­муассасаларда ўзбек тили марказлари ташкил этилиб, уларда она тилимиз чуқур ўрганилаётгани бунинг яққол далилидир.

— «Давлат тили ҳақида»ги қонун она тилимизнинг бор гўзаллиги ва жозибасини тўла намоён этиши билан бирга, уни илмий асосда ривожлантириш борасида ҳам кенг имкониятлар яратиб берди, — деди ЎзХДП Тошкент шаҳар кенгаши раиси ўринбосари Нилуфар Йўлдошева. — Сиё­сий партиялар фаолиятида ҳам она тилимиз қонун-қоидаларига риоя қилиш жуда муҳим. Айниқса, ўтказилаётган тарғибот тадбирларида сиёсатшунослар, нотиқлар ­тилимиз имкониятларидан тўлиқроқ фойдаланса, айтилмоқчи бўл­ган фикр одамларга кучлироқ таъсир қилади.

Ҳозирда олимлар ва мутахассислар томонидан илм-фан, турли соҳаларга оид энциклопедия ва луғатлар, дарс­лик ҳамда ўқув қўлланмалари чоп этилмоқда. Айниқса, беш жилдлик «Ўзбек тилининг изоҳли луғати» бу борада амалга оширилаётган ишларнинг энг самарали натижаларидан биридир. Ушбу луғат саксон минг­дан зиёд сўз ва сўз бирикмасини, фан, техника, саноат, маданият ва бошқа соҳаларга оид атамаларни, шеваларда қўлланиладиган сўзларни ўз ичига олганлиги билан муҳим манба ҳисобланади.

— Ҳар қайси халқ ёки миллат маънавиятини унинг тарихи, ўзига хос урф-одат ва анъаналари, тили, маданияти ва қадриятларидан айри ҳолда тасаввур этиб бўлмайди, — деди Мирзо Улуғбек тумани ҳокими ўринбосари, хотин-қизлар қўмитаси раиси Дилдора Абидова. — Истиқлол арафасида ўзбек тилига давлат тили мақомининг берилиши халқимизнинг руҳини кўтариб, келажакка бўлган ишончини мустаҳкамлаган эди.

Тадбирда Шамсиддин ­Садоий, Нурулло Достон каби шоирлар ўз ижодларидан намуналар ўқиб берди.

Сергели политехника касб-ҳунар коллежида ҳам «Ўзбе­кис­тон овози» газетаси ижодий ходимлари иштирокида маънавий-маърифий тадбир ўтказилди.



DB query error.
Please try later.