26.10.2015

Очиқлик ва ошкоралик – тараққиёт омили

Термизда давлат ҳокимияти ва бошқаруви органлари фаолияти очиқлигини таъминлаш ҳамда уларнинг устидан жамоатчилик назоратини амалга оширишда оммавий ахборот воситалари ролини ошириш масаласига бағишланган семинар-тренинг бўлиб ўтди. 

Фуқаролик жамияти шаклланишини мониторинг қилиш мустақил институти ҳамда Европада хавфсизлик ва ҳамкорлик ташкилотининг Ўзбекистондаги лойиҳалар координатори билан ҳамкорликда ташкил этилган тадбирда Президентимиз Ислом Каримов томонидан илгари сурилган Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси ҳамда мазкур ҳужжат асосида қабул қилинган Ўзбекистон Республикасининг “Давлат ҳокимияти ва бошқаруви органлари фаолиятининг очиқлиги тўғрисида”ги қонуни ахборот тарқатиш сифати ва самарадорлигини оширишни янги босқичда давом эттиришга хизмат қилаётгани алоҳида таъкидланди. 

– Йил давомида ташкил этилган семинар-тренинг машғулотларида давлат ҳокимияти ва бошқаруви органлари фаолиятининг очиқлигини таъминлаш ва жамоатчилик билан алоқаларни мустаҳкамлашда оммавий ахборот воситаларининг роли чуқур таҳлил қилинди, – дейди Фуқаролик жамияти шаклланишини мониторинг қилиш мустақил институти Сурхондарё вилояти ҳудудий бўлими раҳбари Рустам Норлиев. – Маҳаллий ҳокимлик ва давлат бошқаруви органлари ахборот хизмати ходимлари ахборот хизматининг мақсад ва вазифалари, ахборот-коммуникация технологиялари имкониятларидан самарали фойдаланиш, матбуот анжуманларини сифатли ташкил этиш каби масалалар бўйича зарур малакага эга бўлди. 

Вилоятдаги элликдан ортиқ давлат ва жамоат ташкилотида ахборот хизмати йўлга қўйилган. Веб-сайтлар ташкил этилаётгани уларнинг фаолияти очиқлигини таъминлаб, оммавий ахборот воситалари ва жамоатчилик билан алоқаларини мустаҳкамлаётир. 

Семинар-тренингда ўтган машғулотларда ўзлаштирилган билим ва малакаларни иш фаолиятида қўллаш, ягона интерактив давлат хизматлари портали имкониятларидан самарали фойдаланиш, давлат органларида журналистларни аккредитациядан ўтказишнинг мазмун-моҳияти, ОАВ ва давлат органлари ҳамкорлигини ривожлантириш масалалари юзасидан фикр алмашилди. 

Холмўмин Маматрайимов, ЎзА


DB query error.
Please try later.