20.10.2015

САВОЛ ВА ЖАВОБ

Моҳира Каримова, ўқитувчи:

— Олмазор туманида яшайман. Ҳудудимиздаги сайлов округидан халқ депутатлари Тошкент шаҳар Кенгашига Ўзбекистон ХДП вакили Маҳаммаджон Зуфаров депутат этиб сайланган. Депутат тез-тез учрашувлар ўтказиб, аҳоли билан суҳбатда бўлади. Яқинда ана шундай учрашувлардан сўнг менда бир савол туғилди. Депутатнинг сайловчилар билан олиб борадиган ишлари қонунчиликда қай тартибда белгиланган?

Кимё Шокирова, халқ депутатлари Тошкент шаҳар Кенгашидаги ЎзХДП гуруҳи аъзоси:

— Халқ депутатлари вилоят, туман ва шаҳар Кенгаши депутатининг мақоми тўғрисидаги қонунда депутатнинг сайловчилар билан, уни депутатликка номзод қилиб кўрсатган сиёсий партия ва фуқароларнинг ўзини ўзи бошқариш органи билан олиб борадиган ишлари белгиланган.

Унга мувофиқ, тегишли халқ депутатлари Кенгашининг депутати ўз округи сайловчилари билан, уни депутатликка номзод қилиб кўрсатган сиёсий партия ва фуқароларнинг ўзини ўзи бошқариш органи билан алоқа боғлаб туради, тегишли халқ депутатлари Кенгашида уларнинг манфаатларини ифода этади.

Қонунчиликда депутат зиммасига сайловчилар мурожаатлари билан ишлаш борасида ҳам алоҳида вазифалар юклатилган. Масалан, у ўзига сайловчилардан тушган мурожаатларни қонун ҳужжатларида белгиланган тартибда кўриб чиқиш, уларни ҳал этиш чора-тадбирларини амалга ошириш, фуқароларни қабул қилиш ҳуқуқига эга.

Яна бир энг муҳим жиҳати, депутат вақти-вақти билан сайловчиларга ўз фаолияти тўғрисида ахборот бериб бориши керак. Бу йилда камида икки марта бўлиши лозим.

Сайловчилар билан олиб бориладиган ишлар учун депутатга тегишли халқ депутатлари Кенгашининг регламентида белгиланадиган тартибда муайян кунлар ажратилади ва бунинг учун зарур шарт-шароитлар яратилади.

Ижро этувчи ҳокимият органлари депутатнинг илтимосига кўра, бино ажратилишини ташкил этади ҳамда депутат томонидан фуқаролар қабул қилинадиган вақт ва жой ҳақида сайловчиларга хабар беради.



DB query error.
Please try later.