10.10.2015

ИСТЕЪМОЛЧИ ҲУҚУҚИ — ҚОНУН ҲИМОЯСИДА

Ўзбекистон Истеъмолчилар ҳуқуқларини ҳимоя қилиш жамиятлари Федерацияси томонидан матбуот анжумани ўтказилди.

Унда Тошкент шаҳар ва Тошкент вилояти туман (шаҳар) жамиятлари раислари, шунингдек, Соғлиқни сақлаш вазирлиги, Давлат Солиқ қўмитаси, Фуқаролик жамияти шаклланишини мониторинг қилиш мустақил институти, Ўзбекистон Нодавлат нотижорат ташкилотлари миллий ассоциацияси вакиллари иштирок этишди.

Бугунги кунда Истеъмолчилар ҳуқуқларини ҳимоя қилиш жамиятлари Федерацияси 14 ҳудудий бирлашма, 193 туман (шаҳар) жамиятларидан иборат бўлиб, маҳаллалар, корхона, ташкилотлар ҳамда муассасаларда таянч гуруҳлари фаолият кўрсатмоқда.

Тадбирда қайд этилдики, Федерация ва унинг ҳудудий бирлашмалари, туман (шаҳар) жамиятлари томонидан «Истеъмолчиларнинг ҳуқуқларини ҳимоя қилиш тўғрисида»ги қонун ижросини таъминлаш борасида давлат ва жамоат ташкилотлари билан ҳамкорликда тизимли ишлар амалга оширилмоқда.

Матбуот анжуманида, шунингдек, аҳолининг ҳуқуқий саводхонлигини оширишда Соғлиқни сақлаш, Адлия, Олий ва ўрта махсус таълим вазирликлари, Бош прокуратура, «Ўзстандарт» агентлиги, Фуқаролик жамияти шаклланишини мониторинг қилиш мус­тақил институти, Ўзбекистон Касаба уюшмалари федерацияси кенгаши, Давлат Солиқ ва Божхона қўмиталари, «Маҳалла» хайрия жамоат фонди, Марказий банк билан ҳамкорликда олиб борилаётган ишлар хусусида ҳам тўхталиб ўтилди.

Аҳоли (истеъмолчи)лар ўртасида амалдаги қонун ҳужжатларини кенг тар­ғиб қилиш юзасидан жорий йилнинг ҳисобот даврида Федерация ва унинг ҳудудий бирлашмалари ҳамда туман (шаҳар) жамиятлари томонидан 850 ўқув семинари, 2488 давра суҳбати ташкил этилди.

Унга кўра, жойларда савдо, коммунал, почта-алоқа хизматлари, жамоат транспорти ва бошқа хизмат турлари бўйича муаммолар ўрганилиб, маълумотлар ҳамкор ташкилотлар билан биргаликда ҳал қилинишига эришилмоқда.

Ҳисобот даврида Федерация ва унинг ҳудудий бирлашмалари ҳамда туман (шаҳар) жамиятларига истеъмолчилардан жами 5460 ариза ва шикоят келиб тушган.

Мазкур мурожаатларнинг аксарияти табиий газ, савдо, электр таъминоти, коммунал хизмат кўрсатиш, транспорт, алоқа, соғлиқни сақлаш ва бош­қа соҳаларга тегишлидир.

Ариза ва шикоятларнинг 4988 таси ижобий ҳал этилиши натижасида жами 1 миллиард 735 миллион 901,0 минг сўм истеъмолчилар фойдасига ундириб берилган.

Матбуот анжуманида журналистларнинг саволларига батафсил жавоб берилди.

 

Равшан ШОДИЕВ,

«Ўзбекистон овози» мухбири.



DB query error.
Please try later.