Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
10.10.2015

ЭНГ КАТТА ОРЗУИМ — ИШОНЧНИ ОҚЛАШ

Инсон қайси касб­ни эгаллаши кўпроқ оиладаги муҳитга боғлиқ, деб ўйлайман. Отам — Давлат Тошев халқ амалий санъати устаси бўлгани боис, ранглар оғушида улғайдим. У киши расм чизиб турганларида, нимани тасвирлаётганларига жуда қизиқардим.

Илк бор отажоним қўлимга қалам ушлатиб, биргаликда оила аъзоларимизнинг расмларини чизгандик. Ўшанда менда ҳам рассомликка ҳавас уйғонганди. Мана, ҳозиргача миниатюра сирларини ўрганиб келаман. Мен ота касбини давом эттираётганимдан фахрланаман.

Ҳозир пойтахтдаги Республика рассомлик коллежи 3-босқич ўқувчисиман. Устозларимнинг ҳар бир ўгитларини тинглаб, унга амал қилишга ҳаракат қиламан. Устозим Ҳасан Исоқжоновдан рангларни танлаш, улардан фойдаланиш сирларини ўрганяпман.

Ранглар воситасида дунёни тушуниш, ҳаётни англаш иштиёқи оҳанрабодек мени ўзига тортади. Миниатюралар чизиш жону дилим. Вилоят, туман миқ­ёсида бўладиган танловларда қатнашиб, ютуқларга эришдим, ижодкор тенгдошларим билан яқиндан танишдим.

Коллежда таҳсил давомида бир қанча халқаро ва республика кўрик-танловларида қатнашиб, муваффақиятларга эришдим. Шу билан бир қаторда, мамлакатимиздаги, айниқса, ёшлар ҳаёти билан боғлиқ ҳар қандай янгиланиш ва ўзгаришларни диққат билан кузатиб боришга, улар ҳақида фикр-мулоҳаза юритишга ҳаракат қиламан.

Юртбошимизнинг «Фарзандларимиз, ёшларимиз бизнинг нафақат ишончимиз ва келажагимиз, ёшларимиз бугунги ва эртанги кунимизнинг ҳал қилувчи кучидир», деган сўзлари ҳамиша тафаккурим чархпалагида нурдек балқиб туради. Ҳозир биз, ёшларга жуда катта эътибор қаратилмоқда, улкан имкониятлар яратиб берилмоқда. Халқ­аро майдонларда тенгдошларимнинг жаҳон ёшлари билан тенгма-тенг беллашаётгани, ғолиблик шоҳсупасига чиқаётганини кўриб фахрланаман. Улардек бўлишни орзу қиламан.

Ўзим ҳам Москва шаҳрида Халқаро ёшлар ижоди ва педагогик инновациялар фес­тивали доирасида ўтказилган тасвирий санъат танловида иштирок этиб, уч нафар иштирокчи — Ўзбекистон, Франция, Эрон давлати вакиллари қатнашган якуний босқичда биринчи ўринни эгаллаганман. Бошқалардан ажралиб турадиган жиҳатим эса расмларимдаги ранглар калорити кучлилигида, деб ўйлайман. Чунки биз яшаб турган муҳит сержило табиат, турли ранг­лардан таркиб топган. Франция, Италия, Люксембургдаги танловларда ҳам ижодимда айнан ранглар уйғунлиги кучлилигини таъкидлаб ўтишди.

Бухоро миниатюра мактаби йўналишида ижод қиламан. Асарларимда да­рахт­лар, майсаларга алоҳида эътибор қаратаман. Чунки айнан манзаралар асарларимни янада реал ва маъноли чиқишини таъминлаб беради. Келажакда орзуларим жуда кўп. Камолиддин Беҳзод номидаги кўргазмалар залида ўз кўргазмамни тақдим этишни режалаштирганман. Президентимиз, халқимиз ва ота-онамга муносиб фарзанд бўлиш, улар билдирган ишончни оқлаш орзуларимнинг энг улканидир!

 

Муниса БЎРОНОВА,

Республика рассомлик коллежининг 3-босқич ўқувчиси.



DB query error.
Please try later.