10.10.2015

ЭНЕРГЕТИКА СОҲАСИГА

замонавий ахборот-коммуникация технологиялари жорий этилмоқда

«Ўзбекэнерго» акциядорлик жамияти томонидан матбуот анжумани ўтказилди. Унда «Ўзбекэнерго» акциядорлик жамияти ҳамда фойдаланилган энергияни ҳисобга олиш электрон ускуналари ишлаб чиқариш корхоналари вакиллари иштирок этди.

Тадбирда электр энергияси ҳисобини юритишни такомиллаштириш, тўловлар интизомини мустаҳкамлаш, уларни ўз вақтида ва тўлиқ ундириш бўйича амалга оширилаётган ишлар, истеъмолчиларга яратилган имконият ва қулайликлар тўғрисида фикр-мулоҳазалар билдирилди.

— Бугунги кунда жамиятимиз томонидан энергетика соҳасини ахборотлаштириш ва компьютерлаштириш борасида қатор лойиҳалар амалга оширилмоқда, — дейди «Ўзбекэнерго» акциядорлик жамияти бошқаруви раиси ўринбосари Музаффар Ҳакимов. — Шунингдек, аввал аксарият истеъмолчилар фойдаланган электр энергияси ҳақини икки ёки уч ойда бир марта тўлаган бўлса, энди электр энергияси истеъмолини ҳисобга олиш ва назорат қилиш бўйича автоматлаштирилган тизим жорий этилгани туфайли, энергия ҳақи олдиндан тўланмоқда. Айни пайтда Тошкент шаҳрида худди шундай қарийб 200 минг электрон ҳисоблагич ускунаси ўрнатилган. Натижада электр энергияси учун қарздорлик икки баробар камайди. Бундан таш­қари, фойдаланилган электр энергияси учун тўловларни On-Line режимида қабул қилиш ҳамда агентлар томонидан ҳисоблагич кўрсаткичларини SMS-хабарлар орқали юбориш натижасида тўловлар истеъмолчиларнинг ҳисоб варағига хатосиз тўғри келиб тушиши таъминланди, ҳисоблагич кўрсаткичларини қайд этиш даражаси ортишига эришилди.

Шунингдек, матбуот анжуманида фойдаланилган электр энергиясини ҳисобга олиш бўйича замонавий электрон ускуналар намойиш этилди. Мутахассислар юқори даражада аниқ ва ишончли ишлайдиган, ташқи таъсирдан тўлиқ ҳимояланган ушбу ускуналарни ўрнатиш кейинги йилдан бошланиши ҳақида маълумот берди.

Тадбирда журналистларни қизиқтирган саволларга атрофлича жавоб қайтарилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.