08.10.2015

АҲОЛИНИ ТАБИИЙ ГАЗ БИЛАН ТАЪМИНЛАШ

масаласида «Ўзтрансгаз» акциядорлик компанияси бошқаруви раисининг ахбороти эшитилди

Мамлакат иқтисодиётида, кундалик ҳаётимизда табиий газнинг ўрни катта. Айниқса, кунлар совий бошлаши билан иссиқлик таъминотига, хусусан, табиий газга бўлган талаб янада ортади. Истеъмолчиларнинг бу борадаги эҳтиёжини қондириш, соҳага жавобгар бўлган мутасадди ташкилотлар масъулиятини ошириш долзарб масала ҳисобланади.

Шу боис мамлакатимизда аҳоли турмуш шароитини яхшилаш мақсадида истеъмолчиларни табиий ва суюлтирилган газ билан узлуксиз таъминлашга жиддий эътибор қаратиб келинади. Соҳада олиб борилаётган изланишлар натижасида янги конларни ўзлаштириш ва замонавий ишлаб чиқариш заводларини ишга тушириш борасида кенг кўламли ишлар олиб борилмоқда. 

Кеча Олий Мажлис Қонунчилик палатасининг Саноат, қурилиш ва савдо масалалари қўмитаси йиғилишида «Ўзтрансгаз» акциядорлик компанияси бошқаруви раисининг аҳолини табиий ва суюлтирилган газ билан таъминлашнинг ҳолати ва ривожланиш истиқболлари тўғрисида ахбороти эшитилди.

«Ўзтрансгаз» акциядорлик компанияси бош­қаруви раиси Шукурулла Маҳмудовнинг қайд этишича, аҳолини узлуксиз газ билан таъминлаш мақсадида тармоқларни гидравлик режимини яхшилаш, қўшимча газ тақсимлаш қурилмаларини ўрнатиш ҳамда суюлтирилган газ таъминоти тизимини ривожлантиришга алоҳида эътибор қаратилмоқда. Синаш жараёнида аниқланган газ қувурларининг яроқсиз қисмлари алмаштирилиб, таъмирланяпти.

Бугунги кунда республикамизда табиий газ етказиб бериш узунлиги 13,7 минг км магистрал қувурлар, 25 компрессор станция, 341 газ тақсимлаш станцияси, 2 газни ер остида сақлаш омбори орқали амалга оширилмоқда.

— Маълум бўлишича, жойларда соҳани ривожлантириш, бунда йирик лойиҳаларни татбиқ этиш, аҳолини табиий ва суюлтирилган газ билан узлуксиз таъминлаш ҳамда магистрал газ қувурлари тизими ва газ тақсимлаш тармоқларини техник жиҳатдан модернизация қилиш борасида муайян ишлар амалга оширилган, — дейди Олий Мажлис Қонунчилик палатаси Саноат, қурилиш ва савдо масалалари қўмитаси аъзоси, Ўзбекистон ХДП фракцияси аъзоси Акмал ­Умаралиев. — Чекка ҳудудлардаги аҳоли суюлтирилган газ балонлари билан таъминланмоқда. Жумладан, керакли ҳудудларда газ тўлдириш шохобчалари қурилиб, махсус техника билан таъминлаш ишлари изчил олиб борилаяпти.

Яна бир эътиборли томони, истеъмолчилар учун янада қулайлик яратиш мақсадида фойдаланилган табиий газ учун ҳисоб-китоб қилишнинг янги автоматлаштирилган биллинг тизими жорий қилинган ва UzPaynet ҳамда SMS-тўлов каби электрон тўловларнинг мобиль тизимлари билан бирлаштирилган.

«Ўзтрансгаз» акциядорлик компанияси бошқаруви раиси аҳолини табиий ва суюлтирилган газ билан таъминлаш бўйича олиб борилаётган бошқа ишлар ҳақида ҳам атрофлича ахборот берди. Йиғилишда депутатлар амалга оширилаётган ижобий ишларни эътироф этган ҳолда, соҳада ўз ечимини кутаётган масалаларга ҳам эътибор қаратишди. Жумладан, газ таъминотига ноқонуний уланишларга чек қўйиш, газ тақсимлаш тизими устидан назоратни кучайтириш, соҳа ходимларининг масъулияти ва малакасини ошириш лозимлиги алоҳида таъкидланди.

Атрофлича таҳлиллардан сўнг депутатлар ва мутахассислар соҳага оид айрим масалалар, шунингдек, қонун ҳужжатларини янада такомиллаштириш бўйича таклифларини билдиришди.

Хусусан, табиий газ сарфи ҳисоблагичлари ишонч­лилиги, ишлар ва хизматлар сифатини ошириш юзасидан махсус талабларни белгилаш, аҳолининг зичлиги ва ҳудуднинг саноатлашув кўрсаткичларини инобатга олган ҳолда, уларни табиий ва суюлтирилган газ билан узлуксиз таъминлаш бўйича манзилли дастурлар ишлаб чиқиш ҳақида тавсиялар берилди.

Кўриб чиқилган масала юзасидан қўмитанинг ­тегишли қарори қабул қилинди.

 

Лазиза ШЕРОВА,

«Ўзбекистон овози» мухбири.



DB query error.
Please try later.