Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2019   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
08.10.2015

БИЗНИ ҚЎЛЛАГАН, БИЗДАН ЁРДАМИНИ АЯМАГАН ЎЗБЕК ХАЛҚИГА РАҲМАТ АЙТАМИЗ

Бу — «Шарқ тароналари» Х халқаро мусиқа фестивали махсус мукофоти соҳиби, Туркманистоннинг «Бахши Трио» гуруҳи аъзоси Гуванч Жумандурдиевнинг сўзлари

— «Шарқ тароналари» халқаро мусиқа фестивалининг нуфузи йилдан-йилга ортиб бормоқда, — дейди у. — Унда иштирок этиш истагида бўлган санъаткорлар жуда ҳам кўп. Биз хориждан келган ҳамкасбларимиз билан суҳбатлашдик. Улар фестивалнинг саралаш босқичидан ўтиб, Самарқандга келганликларини гапириб беришди.  

— Фестивалнинг махсус сов­ринини қўлга киритдингиз. Ўша пайтда кўнглингиздан нималар ўтди?

— «Шарқ тароналари»дек нуфузли фестивалда қатнашиб, сов­риндор бўлиш бахти ҳамма санъаткорга ҳам насиб этавермайди. Ўзбекистонда бундай катта доирадаги фестивалнинг ўтказилиши мамлакатда маданият ва санъатга берилаётган юксак эътибор натижасидир.

1997 йилда ўтказилган илк фес­тивалда Туркманистон номидан қатнашган мусиқий гуруҳ ҳакамлар ҳайъатининг махсус сов­ринига сазовор бўлган. «Шарқ тароналари» билан боғлиқ энг юқори кўрсаткич 2009 йилда, VII фестивалда қайд этилган эди. Ўшанда ҳамюртимиз, Туркманистон халқ артисти Ляле Бегназарова Гран-прини қўлга киритганди. Бу нафақат унинг, балки бутун туркман санъатининг ютуғи бўлган эди.

— Сиз номини тилга олган Ляле Бегназарова бахши. Сизларнинг гуруҳ ҳам бахшилардан иборат. Умуман ўзбек ва туркман бахшичилик санъати ҳақида нима дея оласиз?

— Ўзбек ва туркман бахшичилик санъатининг илдизи битта десам, хато қилмаган бўламан. Азалдан Марказий Осиёда кучли бахшилар яшаб ижод қилган. Тилнинг яқинлиги бу ерда яшовчи миллатларга янада қулайлик яратган. Биз бир-биримизнинг достонларимизни куйлаб улғайган бахшилар авлодимиз.

Ўзбек бахшичилиги ҳақида гап кетар экан, сўзни «Алпомиш»дан бошлаш зарур. Бу достонни ўзбек бахшиларининг энг севимли достони деб биламан. Биз ҳам «Алпомиш»ни ҳар доим жон қулоғимиз билан эшитганмиз, куйлаганмиз. Ўзбекистонда кўплаб бахшилар билан мулоқот қилдик, фикр алмашдик. Ўйлайманки, ўзаро ҳамкорлигимиз мустаҳкамланиб бораверади.

— «Шарқ тароналари» ўтказилган Самарқанд шаҳри ҳақида қандай фикрдасиз?

— Самарқанд чиндан ҳам афсонавий шаҳар экан. Унинг тарихий биноларини томоша қилиб кўзинг тўймайди. Регистон майдонидаги ҳолатни тил билан таърифлаш қийин. Бу ерда қўшиқ куйлаш ҳар бир санъаткор учун бахт.

Китобларда Амир Темур давлати ҳақида кўп ўқиганмиз. Самар­қандга келиб, Амир Темур ва темурийлар даврида қурилган мадраса, мақбараларни ўз кўзимиз билан кўрдик. Амир Темур қабрини зиёрат қилдик. Таассуротларимиз бир олам.

— Ўзбек ва туркман халқларининг ўзаро муносабатлари, ҳамкорлиги ҳақида ўз фикрингизни билдирсангиз.

— Аввало, айтишим керак, Ўзбекистонда кўплаб туркманлар яшайди. Ўз навбатида Туркманис­тонда яшайдиган кўплаб ўзбеклар бор. Бу тили, дини, урф-одатлари бир халқлар минг йиллардан бери тинч-тотув, ўзаро ҳурмат асосида яшаб келмоқда. Ўзбекистонда турк­ман маданият марказлари ишлаб турганини эшитиб жуда хурсанд бўлдим. Туркманлар Ўзбекистоннинг ижтимоий-сиёсий ҳаётида фаол қатнашаётганидан фахрланамиз.

Ўзбекистон ва Туркманистон давлат раҳбарларининг ўзаро учрашувлари доимо юксак даражада ўтказилмоқда. Икки томон ҳам ҳамкорликдан манфаатдор эканини билдирмоқда. Ишонаманки, бизнинг бу алоқаларимиз абадий ва янада мустаҳкамланиб бораверади.

— Ўзбекистон халқига тилакларингиз.

— Ўзбекистондаги миллатлар дўстлиги муҳитини сўз билан тасвирлаб бериш қийин. Мен истардимки, дунё халқлари аҳил-иноқ яшашни, ўзаро ҳурматни, бағрикенглик ва бирдамликни Ўзбекистондан ўргансин.

Бизни қўллаган, биздан ёрдамини аямаган ўзбек халқига раҳмат айтамиз. Сизларга фақат яхшиликлар ёр бўлишини истаймиз.

 

«Ўзбекистон овози» мухбири

Темур АЪЗАМ тайёрлади.



DB query error.
Please try later.