06.10.2015

ТЕРМИЗ ШАҲРИДА

Ўзбекистон ХДПнинг энг фаол аёли аниқланди

Хабарингиз бор, партиямиз аъзолари бўлган хотин-қизларнинг сиёсий-ҳуқуқий билимларини ошириш, уларнинг мамлакатимизда фуқаролик жамиятини янада ривожлантириш жараёнларидаги иштирокини фаоллаштириш мақсадида жойларда «ЎзХДПнинг энг фаол аёли» кўрик-танлови ўтказиляпти.

Яқинда танловнинг Термиз шаҳар босқичи бўлиб ўтди. Биринчи шартга кўра, иштирокчилар ўз лойиҳаларини тақдим этишди. Лойиҳалар ҳудудларда амалга оширилаётган ислоҳотларнинг самарадорлигини оширишга қаратилгани билан алоҳида аҳамиятга эга бўлди. Жумладан, лойиҳаларда хотин-қизлар учун барқарор иш ўринлари яратиш, уларнинг ижтимоий-сиёсий фаоллигини оширишга доир ғоялар ўз ифодасини топди. Масалан, Термиз шаҳридаги 7-мактабнинг инглиз тили фани ўқитувчиси Нигора Мардонованинг оилавий тадбиркорлик ва уй меҳнатининг бош­қа шаклларини ташкил этиш, 24-мактабгача таълим муассасаси тарбиячиси Гулбаҳор Юлдашеванинг анъанавий ҳунармандчиликни ривожлантириш тўғрисидаги фикр-мулоҳазалари кўпчиликка маъқул бўлди.

«Қонунларимиз ҳаётимиз асосидир» деб номланган иккинчи шарт­да иштирокчиларнинг нотиқлик маҳорати, қонунларнинг энг муҳим концептуал жиҳатларига бош­қаларнинг эътиборини қарата олиши, ўз фикрини тингловчиларга равон ва содда тилда етказиб бериши каби хусусиятларига эътибор қаратилди. Фаол аёллар партия­миз электорати манфаатларига дахл­­­дор қонунлардан бирининг мазмун-моҳияти ва аҳамиятини тушунтириб берди.

Учинчи шартда иштирокчи аёллар «Сиёсий ҳозиржавоблик» бўйича беллашишди. Қатнашчиларга Ўзбекистон Республикаси Конституцияси, меъёрий-ҳуқуқий ҳужжатлар, Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси асосида 10 тадан савол берилди. Ушбу шартга фаол аёллар пухта тайёргарлик кўргани яққол сезилди.

Ҳакамлар ҳайъати иштирокчиларнинг чиқишларини белгиланган мезонлар асосида баҳолаб боришди. Йиғилган баллар умумлаштирилиб, ғолиблар аниқланди. Унга кўра, биринчи ўринни Термиз шаҳридаги 7-мактаб инглиз тили фани ўқитувчиси Нигора Мардонова эгаллади.

Танлов жуда қизиқарли ўтди, баҳс-мунозаралар кучли бўлди, — дейди Нигора Мардонова. — Чунки иштирокчиларнинг ҳар бири ўз олдига ғолиб бўлиб, навбатдаги бос­қичга чиқаман, деган мақсадни қўйганди. Мен ҳам шуни ният қилгандим. Президентимиз асарлари, қонун ҳужжатлари, сиёсий адабиётлар, сиёсий партиялар Сайловолди дастурларини синчковлик билан ўқиб чиқдим, халқ депутатлари Термиз шаҳар Кенгашидаги депутатлар билан суҳбатлашдим. Билмаганларимни сўраб ўргандим. Булар танлов давомида жуда қўл келди. Энди вилоят босқичига ҳам жиддий тайёргарлик кўраман.

Кўрик-танлов сўнгида иштирокчилар эсдалик совғалари билан тақдирланди.

 

Сайфиддин ҚУРБОНОВ,

Ўзбекистон ХДП Сурхондарё вилоят кенгаши бўлим мудири.


Фикр ва мулохазалар

Защита от автоматических сообщений

Сўнгги янгиликлар: