06.10.2015

БУНДАЙ ЮРТДА ЯШАШ — БАХТ

Мустақиллигимизнинг 24 йиллик байрами арафасида менга Президентимиз фармони билан «Ўзбекистон Республикасида хизмат кўрсатган пахтакор» унвони берилди. Ҳали табрикларнинг кети узилмай, ҳаётимда яна бир саодатли воқеа рўй берди. Фарғона вилоятига ислоҳотлар билан танишиш мақсадида ташриф буюрган Юртбошимиз билан учрашиш, суҳбатлашиш бахтига муяссар бЎлдим.

Айниқса, у кишининг сизлар билан, сизларнинг тимсолингизда халқимиз вакиллари билан дийдорлашгани, маслаҳатлашгани келдим, деган сўзлари биз, фарғоналикларни тўлқинлантириб юборди.

Президентимизнинг ҳар гал Фарғонага келиши, оддий одамлар билан учрашиши том маънодаги байрамга айланиб кетади. Бу сафар ҳам худди шундай бўлди.

Мамлакатимиз раҳбари ҳар биримиздан ҳол-аҳвол сўради. Кўнглимизни кўтарди. Ишларимиз билан қизиқди. Режаларимизни муҳокама қилдик. Оиламиз, турмушимиз ҳақида гаплашдик. Самимий суҳбат давомида у кишининг берган маслаҳати ҳар биримизга қанот бағишлади.

Президентимиз билан бўлиб ўтган учрашувда у киши томонидан аёлларнинг оғирини енгил қилиш, фарзанд тарбия­си, қишлоқларимизнинг янада чирой очиши, бунёдкорлик, юртимиздаги тинчлик-осойиш­талик, фермер хўжаликларини ривожлантириш, одамларни ҳаётдан рози қилиш, кексаларимизнинг дуосини олиш, ишимизга халақит бераётган баъзи бир тўсиқларни бартараф этиш ҳақида фикр-мулоҳазалар билдирилди.

Шу ўринда яна бир гапни айтмоқчиман. Президентимизнинг ўта оғир, машаққатли давлат ишларидан вақт ажратиб қишлоқларга бориши, одамларни эшитиши, уларга ҳурматини изҳор қилиши, дилдан суҳбатлашиши, кўнгилларга етиб бориши — бу унинг ўз халқига бўлган чексиз ҳурматини ифодалайди.

Бугунги кунда фермер хўжалигимиз тасарруфида 65 гектар ер майдони бўлиб, шундан 30 гектарида ғалла етиштириб, 60 центнердан ҳосил олдик. 35 гектаридан ҳозиргача 140 тонна пахта териб олдик. Ўзимча ҳисоб-китоб қилдим — далаларимизда яна 30-40 тонна пахта бор. Худо хоҳласа, бу йил ҳосилдорлик 50 цент­нердан ортиқ бўлади.

Мен Юртбошимизга шулар ҳақида гапириб бердим. Фермер бўлиб ер эгасига айланганим, қатор-қатор техника сотиб олиб, замонавий дала шийпони қурганим, 38 нафар ҳамқишлоғимга фақат ишда эмас, ҳаётда ҳам бош эканим ҳақида айтганимда, у киши мамнун бўлди. Шунингдек, мақсадим фермерлар учун яратиб берилган имкониятлардан фойдаланиб, кўптармоқли хўжалик тузиш экани, хориждан зотдор чорва ва кичик завод келтириб, сутни, гўштни қайта ишлайдиган тармоқ яратмоқчи эканимни фахр-ифтихор билан сўзладим.

Энди айтинг, инсон чинакам қадр топган бундай тинч-осойишта юрт­да яшаш бахт эмасми?

Президентимиз билан учрашув кучимга куч қўшди. Бир сўз билан айтганда, бутун фарғоналикларнинг кўнглини тоғдай кўтарди.

 

Зебихон РУСТАМОВА,

Тошлоқ туманидаги «Заркент саховати» фермер хўжалиги раҳбари, Ўзбекистон Республикасида хизмат кўрсатган пахтакор, ЎзХДП фаоли.



DB query error.
Please try later.