26.09.2015

КЎМИР МАҲСУЛОТЛАРИ

истеъмолчиларга ўз вақтида етказиб берилмоқда

«Ўзбеккўмир» акциядорлик жамияти томонидан кўмир ёқилғи маҳсулотлари ишлаб чиқариш, реализация қилиш ва етказиб бериш борасида амалга оширилаётган ишларга бағишланган матбуот анжумани ўтказилди.

— Мамлакатимизда қаттиқ ёқилғи ишлаб чиқаришга замонавий технологияларни жорий этиш, ишлаб чиқаришни модернизация қилишга қаратилган ислоҳотлар самарасида саноат корхоналари, ижтимоий объектлар ва аҳолининг кўмир маҳсулотларига бўлган эҳтиёжи ўз вақтида қондирилмоқда, — дейди «Ўзбеккўмир» акциядорлик жамияти Бош директори ўринбосари Носиржон Умаров. — Хусусан, ҳозирда мамлакатимизда аниқланган кўмир захиралари 1900 миллион  тонна, шу жумладан, қўнғир ранг кўмир захираси 1853 миллион тонна, тош­кўмир 47 миллион тоннадир. Қолаверса, кўмирнинг олдиндан аниқланган захираси 5,7 миллиард тоннани ташкил этади. Шунингдек, жорий йилнинг ўтган даврида истеъмолчиларга 2,7 миллион тонна, жумладан, «Ўзбек­энерго» акциядорлик жамиятига 2,2 миллион, бюджет ташкилотларига 246,5 минг, аҳолига 167 минг тонна қаттиқ ёқилғи етказиб берилди. Бундан ташқари, 68,8 минг тонна кўмир биржа савдолари орқали сотилган.

Хусусан, Вазирлар Маҳкамасининг 2015 йил 2 июлдаги «Республикада кўмир брикетлари ишлаб чиқариш ва сотишни комплекс ташкил этишга доир қўшимча чора-тадбирлар тўғрисида»ги қарори асосида Қорақалпоғистон Республикаси, Андижон, ­Наманган, Фарғона, Тошкент, Самар­қанд, Навоий, Сурхондарё, Хоразм вилоятларида йилига 240 минг тонна кўмир брикети ишлаб чиқариш қувватига эга 31 фабрика ташкил этилди. Ушбу кўмир брикетларини ишлаб чиқариш бўйича ўтган даврда 27 корхона билан 175,7 минг тонна хомашё етказиб бериш бўйича шартнома имзоланган бўлса, ҳудудий дистрибьюторлик марказлари ва уларнинг филиаллари томонидан истеъмолчиларга етказиб берилган тайёр маҳсулот ҳажми 28,5 минг тоннани ташкил этди.

Давлатимиз раҳбарининг Республика иқтисодиёт тармоқларини 2015-2016 йиллар куз-қиш даврида барқарор ишлашини таъминлаш тўғрисидаги қарорига мувофиқ жамият томонидан бюджет ташкилотларига 373 минг, «Ўзбекэнерго» акциядорлик жамиятига 3 миллион 54 тонна, аҳолига 847 минг тонна кўмир етказиб берилиши режалаштирилган.

Матбуот анжуманида журна­лист­ларни қизиқтирган саволларга жавоб қайтарилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.