Охирги сонда



Кўп ўқилган мақолалар



Долзарб мавзу



Мақолалар архиви

«    Iyun 2018   
Du Se Cho Pa Ju Sha Ya
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1
24.09.2015

САОДАТЛИ КУНЛАР ШУКРОНАСИ

Президентимизнинг «Қурбон ҳайитини нишонлаш тўғрисида»ги қарори юртдошларимиз томонидан қизғин кутиб олинди. Унда таъкидланганидек, Қурбон ҳайитининг маънавий ҳаётимиздаги ўрни, моҳияти ва аҳамиятини, халқимизга хос бўлган меҳр-оқибат, шукроналик ва бағрикенглик туйғуларини кенг тарғиб қилиш, ёшларимиз онгига сингдириш муҳим аҳамият касб этади.

Шу муносабат билан Тошкент шаҳар «Хўжа Алламбардор» масжиди имом-хатиби Раҳимберди Раҳмонов мухбиримизга қуйидагиларни гапириб берди.

— Қурбон ҳайити яхши амаллар, хурсандчилик, эзгулик байрамидир, — дейди у. — Ушбу байрамда мурувват, хайр-эҳсон, яхшилик қилиш, ўзаро иттифоқлик, дўстлик, ҳамкорлик сингари сифатларни ўз ораларида татбиқ этганлар Аллоҳнинг катта ажр-савобларига сазовор бўлишади. Расули акрам (с.а.в.) ҳайит кунининг кечасини Аллоҳдан катта мукофот олиш вақти деб атаганлар.

Ислом тарихини кўздан кечирсак, Қурбон ҳайити узоқ ўтмишга бориб тақалади. Ушбу кун Иброҳим алайҳиссалом, ўғиллари Исмоил алайҳиссалом ҳамда аёллари Ҳожар онамизнинг нафс устидан қозонган ғалабаси сифатида тарихда қолган. Қурбонлик қилиш эса Аллоҳ таолога яқинлаштирувчи ва унинг розилигини топишга васила бўлувчи хайрли амал, ибодатдир.

Расулуллоҳ (с.а.в.)нинг видолашув ҳажларида улуғ бир ҳукм нозил бўлди.

«Бугунги кунда Мен сизнинг динингизни мукаммал қилиб бердим. Сизга неъматимни батамом қилдим. Ва сизга Исломни дин деб рози бўлдим» (Моида сураси, 3-оят).

Шунинг учун ҳам Қурбон ҳайити байрам сифатида нишонланишга лойиқ кундир. Бу илоҳий кун қувонч ва шодлиги Аллоҳга беадад шукр айтишни барчамизга вожиб этади. Зеро, шу куни бизларга Аллоҳ неъматини тўла-тўкис мукаммал қилиб берди.

Бу куннинг бир қанча улуғ фазилатлари бор. У ҳажжул акбар куни, йил давомидаги энг афзал кун. Расулуллоҳ (с.а.в.) дедилар: «Аллоҳ таборака ва таоло наздида энг улуғ кун — қурбонлик кунлари...» (Абу Довуд ривояти).

Шу ўринда айтиш жоиз, ҳайит байрами амаллари хал­қимизнинг турмуш тарзига шу даражада чуқур сингиб кетганки, уларни нафақат байрам кунлари, балки бутун умр давомида қилиб келаётган юртдошларимиз борлиги ҳаммамизни хурсанд қилади.

Меҳрибон Роббимиз барчаларимизни фақат ўзигагина ибодат қилишга буюради. Қилган ибодат ва яхши амалларимиз унга яқинлашиш ва унинг розилигини топиш учун бир воситадир. Инсонни
Аллоҳга яқинлаштирувчи ибодатлардан бири бу — Қурбонликдир.

Қурбонлик учун сўйилган ҳайвонлар орқали мўмин киши Аллоҳнинг амри билан ўз молидан воз кеча олиши имтиҳон қилинади. Динимизда қурбонлик амали нақадар савобли эканлигини қуйидаги оятдан ҳам билиш мумкин: «(Эй Муҳаммад), албатта, биз сизга Кавсарни ато этдик бас. Сиз Парвардигорингиз учун намоз ўқинг ва (жонлиқ) сўйиб, қурбонлик қилинг! Албатта, сизни ёмон кўргувчи кимсанинг думи қирқилгандир (яъни, беному нишон йўқ бўлиб, кетгувчидир)!» (Кавсар сураси, 1-3 оятлар).

Қурбон ҳайити – улуғ байрам. Пайғамбаримиз (с.а.в.) бу кунда янада меҳрибонроқ, шафқатлироқ бўлар, етим-есирлар бошини силар, қариялар, касалмандлар, муҳтожлардан хабар олар, уларнинг кўнгилларига ҳам байрам шукуҳини олиб кирар эдилар. Шунинг учун бу кунни яқинларимизни йўқлаб, уларнинг ҳолидан хабар олиш, ёши улуғларни зиёрат қилиш, муҳтожларга меҳр-мурувват кўрсатиш, оилаларга хурсанд­чилик улашиш ва умуман, байрамнинг кўркига кўрк қўшадиган амали солиҳлар билан ўтказиш мақсадга мувофиқдир.

Ҳайит намозидан олдин (фақат Қурбон ҳайитида) ҳеч нарса емаслик афзал. Расулуллоҳ (с.а.в.) Қурбон ҳайити куни намоздан қайтгунларига қадар ҳеч нарса емаганлар. Ҳайит намози ўқилгач, қилган қурбонликлари гўштидан еганлар.

Ҳайит куни яқинларимизни зиёрат қилиб, байрам билан қутлаб, яхши тилаклар айтмоғимиз, шариатда мустаҳаб саналади. Одамлар бир-бирларига «Аллоҳ сизу биз — барчамизнинг амалларимизни қабул қилган бўлсин!» каби хайрли сўзларни айтадилар.

Ҳайитда ота-оналаримиз, қариндош-уруғларимиз, устозларимизни зиёрат қилишимиз жоиздир.

Кейинги ҳайит байрамларига ҳам соғлик ва омонликда етиб бормоқликни Аллоҳдан сўраймиз.

 

«Ўзбекистон овози» мухбири

Темур АЪЗАМ ёзиб олди.



DB query error.
Please try later.