15.09.2015

МУРОЖААТЛАРГА ЕЧИМ ТОПИШДА

депутатлар фаоллиги муҳим ўрин тутади

Ўзбекистон ХДП Хоразм вилоят кенгаши электоратни ўйлантираётган масалаларни ўрганиш, уларга ижобий ечим топишда Жамоатчилик қабулхоналари имкониятидан самарали фойдаланишга кенг эътибор қаратмоқда. Кўп сонли сайловчилар, электорат вакиллари яшаётган чекка ҳудудларда ҳам кўчма Жамоатчилик қабулхоналари ташкил қилиняпти. Шу орқали мурожаатлар қисқа фурсатда ҳал этиляпти.

Тупроққалъа мавзеси вилоятнинг чекка ҳудудларидан саналади. Бухоро вилоятининг Ромитан тумани билан чегарадош бу ҳудуддаги маҳаллалар вилоят маркази Урганч шаҳридан деярли 250 чақирим масофада жойлашган. Тупроққалъа қишлоғининг таркибига кирувчи Саримой маҳалласи эса ўрталиқ масофада. Айнан масофа узоқлиги билан боғлиқ бир қатор масалалар долзарб­лигича қолмоқда.

— Саримой маҳалласида ҳамда Тупроққалъа қишлоғида кўчма Жамоатчилик қабулхонаси фаолиятини йўлга қўйишдан кўзланган мақсад мазкур ҳудудларда истиқомат қилаётган аҳоли муаммоларини ўрганиш, уларга биргаликда ечим топишдир, — дейди ЎзХДП вилоят кенгаши раиси, халқ депутатлари вилоят Кенгашидаги партия гуруҳи раҳбари Раимберган Сабуров. —  Партиямиздан сайланган вилоят ва туман Кенгашлари депутатлари, партия фаоллари билан қўчма Жамоатчилик қабулхонаси ташкил этиб, ҳудуддаги масалалар билан қизиқдик. Кўчма Жамоатчилик қабулхонамизга ўн тўртта масала бўйича мурожаат бўлди.

Уларни тезкор ҳал қилиш учун Ҳазорасп туман ҳокимлиги ва вилоятнинг тегишли ташкилотлари билан ҳамкорликда ишлар бошлаб юборилди. Айрим масалалар бўйича масъул ташкилотларга депутатлик сўрови билан чиқилди. Баъзи мурожаатлар ечими юзасидан тегишли ҳудуддан сайланган маҳаллий Кенгашлардаги депутатларга керакли тавсиялар берилди. Икки ҳафта муддатда кўчма Жамоатчилик қабулхонасига тушган мурожаатларнинг аксари ҳал қилинишига эришилди.

Кўчма Жамоатчилик қабулхонасига тушган айрим мурожаатларда кўтарилган масалаларни ижобий ҳал қилишда бевосита тегишли республика идоралари ҳамда Олий Мажлис Қонунчилик палатаси депутатлари аралашувига эҳтиёж сезилмоқда.

Тупроққалъа қишлоғида Тупроққалъа маиший хизмат касб-ҳунар коллежи фаолият юритади. Бу масканда шу мавзедаги барча маҳаллаларда яшаётган хонадонлар фар­занд­лари таълим олади. Аммо мавзенинг нисбатан чекка Гурлан, Ҳазорасп маҳаллаларида яшаётган ўқувчиларнинг коллежга пиё­да қатнашлари имкони йўқ, масофа анча узоқ. Айнан Саримой маҳалласида яшовчи хонадонлар фарзандлари ҳам шу коллежда таҳсил олишяпти, касб-ҳунар ўрганишяпти. Аммо масофанинг узоқлиги ўқувчилар давомадига салбий таъсир кўрсатмоқда. ­«Урганч-Тупроққалъа» йўналишида қатнайдиган автобусларнинг ҳаракат вақти ўқиш вақтига мос келмайди. Мазкур касб-ҳунар коллежига ўқувчиларни вақтида етказиш масаласини махсус автобус ажратиш орқалигина ҳал қилиш мумкин.

Тупроққалъа қишлоғи, Саримой маҳалласи ва ҳатто Питнак шаҳри аҳолиси ҳам республика телевидениеси кўрсатувларини томоша қилишда қийналишаётгани тўғрисида мурожаат тушди. Маълум бўлишича, телетасвирларнинг сифати паст, айрим кунлари эса мутлақо кўриш имкони йўқ. Мазкур ҳудудларда республика теледастурларини узатиш маркази станцияларини рақамли дастурларга ўтказишни тезлаштириш лозим. Шундагина бу ҳудудда яшаётган аҳоли мамлакатимизда амалга оширилаётган ижтимоий-иқтисодий, демократик ислоҳотлар, ҳаётимиздаги янгиликлардан ўз вақтида, тўлақонли хабардор бўлади.

Кўчма Жамоатчилик қабулхонасининг бир кунлик фаолияти давомида бошқа масалалар ҳам аниқланди. Уларнинг ечимини топиш учун партия фаоллари, депутатлар ҳамкор ташкилотлар билан биргаликда ҳаракат қилишмоқда.

Вилоят партия кенгаши томонидан кўчма Жамоатчилик қабулхоналари бошқа ҳудудларда ҳам ташкил этилмоқда.

 

Рўзимбой ҲАСАН,

«Ўзбекистон овози» мухбири.



DB query error.
Please try later.