12.09.2015

ПАРЛАМЕНТ ВА ЖАМОАТЧИЛИК

алоқаларини яхшилаш масаласи муҳокама қилинди

Парламентда мамлакатимиздаги демократик ислоҳотларни янада чуқурлаштириш билан боғлиқ муҳим қонунлар қабул қилинмоқда. Аммо бу орқали ҳаётимизда нима ўзгаришлар бўлди, қонунлар тараққиётга қандай таъсир кўрсатмоқда, деган саволларга ҳар доим ҳам етарли эътибор қаратилмайди. Шунинг учун парламент ва жамоатчилик алоқаларини такомиллаштириш долзарб масалалардан бири бўлиб қолмоқда.

Олий Мажлис Қонунчилик палатасининг Ахборот ва коммуникация технологиялари масалалари қўмитаси ўтказган давра суҳбатида шу хусусда сўз борди.

Унда депутатлар, олимлар, малакали мутахассислар, масс-медиа соҳаси ходимлари, фуқаролик жамияти институтлари ҳамда оммавий ахборот воситалари вакиллари иштирок этди.

Қайд этилдики, экспертлар ва кенг жамоатчилик билан фаол ахборот алмашиш механизмининг ўрнатилиши парламент фаолияти самарадорлигини оширишда муҳим аҳамиятга эга. Жорий йил 23 январда бўлиб ўтган Олий Мажлис палаталарининг қўшма мажлисида ­Президентимиз бу масалага алоҳида тўхталиб, қабул қилинаётган қонунлар одамлар ҳаётига, сиёсий, иқтисодий тараққиётга қандай таъсир кўрсатаётгани ҳақида жойлардан келиб турадиган, парламентга ўз фаолиятини янада такомиллаштириш имконини берадиган ахборот алмашиш механизми деярли ишламаётганини таъкидлаб ўтган эди.

Давра суҳбати ташкил этилгунга қадар депутатлар ва ахборот соҳасининг етакчи мутахассисларидан иборат ишчи гуруҳ томонидан бу масалада таҳлилий ва ташкилий ишлар олиб борилган. Халқаро тажриба, бир қатор мамлакатлар парламентларининг жамоатчилик билан ахборот алмашишдаги замонавий усуллари ўрганилди.

Иштирокчилар замонавий ахборот-коммуникация технологияларини парламент фаолиятига кенг татбиқ этиш жамоатчилик билан алоқаларнинг кўлами ва самарадорлигини оширишга хизмат қилишини таъкидлашди.

Бугунги кунда фуқаролар Қонунчилик палатасининг расмий сайтидаги тегишли хизматдан фойдаланган ҳолда, парламент депутатларига мурожаат этиши мумкин. Шунингдек, бу сайтда фойдаланувчилар учун қонун лойиҳаларини муҳокама қилиш, таклиф ва тавсиялар билдириш, уларнинг жамланмаси билан танишиш имконияти яратилган.

— Қонун лойиҳаларини муҳокама қилиш, уларнинг амалда татбиқ этилиш ҳолатини баҳолаш, назорат-таҳлил фаолиятини амалга оширишда ахборот алмашиш механизмини такомиллаштириш муҳим аҳамият касб этади, — дейди Олий Мажлис Қонунчилик палатасидаги ЎзХДП фракцияси аъзоси Нўмон АКБАРОВ. — Парламент ва жамоатчилик ўртасида ахборот алмашиш механизмини кучайтириш орқали қонунларни қабул қилиш жараёни, умуман, парламент фаолияти билан аҳолини кенг таништириб бориш, мамлакатдаги муҳим ижтимоий-сиёсий масалаларга бағишлаб парламентда уюштирилаётган муҳокамалар орқали жамоатчилик фикрини шакллантириш имкони ортади.

Давра суҳбатида парламентнинг ахборот алмашиш механизмини такомиллаштиришга оид бир қатор таклифлар билдирилди.

 

Гулруҳ ОДАШБОЕВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: