10.09.2015

ИЖРО МАСЪУЛИЯТИНИ КУЧАЙТИРИШ ЗАРУР

Меҳнат ва ижтимоий масалалар қўмитаси Давлат бюджетининг 2015 йил биринчи ярим йилликдаги ижросини кўриб чиқди

Давлат бюджети мамлакатнинг энг муҳим молиявий ҳужжати ҳисобланади. Аҳо­лининг турмуш фаровонлиги ортиб боришида бюджет даромадлари тўлиқ шакл­ланиши, харажатлари тўғри йўналтирилиши долзарб аҳамиятга эга.

Шу боис мамлакатимизда давлат бюджетининг ҳар томонлама барқарорлигини таъминлаш, ижро маданияти ва масъулиятини ошириш масаласига жиддий эътибор қаратиб келинади. Қонунчиликка биноан, ҳар чоракда ва йил охирида Давлат бюджети ижроси парламентда муҳокама этилиб, хулосалар чиқарилади, тегишли таклифлар берилади.

Олий Мажлис Қонунчилик палатаси Меҳнат ва ижтимоий масалалар қўмитасининг кенгайтирилган йиғилишида шу масалага алоҳида эътибор қаратилди. Депутатлар, мутасадди вазирлик ва идоралар раҳбарлари Ўзбекистон Республикаси Давлат бюджетининг 2015 йил биринчи ярим йилликдаги ижроси якунлари тўғрисидаги ҳисоботни кўриб чиқишди.

Йиғилишда, аввало, жаҳонда ҳали-бери давом этаётган молиявий-иқтисодий ин­қироз кўплаб мамлакатларда бюджет тақчиллигини келтириб чиқараётган бир пайтда юртимизда иқтисодиётнинг юқори барқарор суръатларда ўсиши ва макроиқтисодий мувозанат таъминланаётгани таъкидланди.

Дастлаб Давлат бюджетининг 2015 йил биринчи ярим йилликдаги ижроси бўйича Молия вазирлиги ахбороти тингланди. Қайд этилишича, 2015 йилнинг 6 ойи давомида  макроиқтисодий барқарорлик ва юқори иқтисодий ўсиш суръатларига эришилган. Жумладан, ижтимоий соҳа ва аҳолини ижтимоий ҳимоя қилиш харажатларини молиялаштириш учун Давлат бюджети умумий харажатларининг 59,2 фоизи йўналтирилган.

Шунингдек, парламент томонидан тасдиқланган 2015 йилда Иш ўринлари ташкил этиш ва аҳоли банд­лигини таъминлаш дастурига мувофиқ равишда 441,8 мингдан ортиқ фуқаролар бандлиги таъминланган. Уларнинг 62,2 фоизи қишлоқ жойларига тўғри келади.

— Қўмитамиз Давлат бюджети ижросини кўриб чиқишда ижтимоий соҳани ривожлантириш, яъни таълим, соғлиқни сақлаш, аҳолини мақсадли ижтимоий қўллаб-қувватлаш, иш ҳақи, пенсия, стипендия ва нафақалар ҳамда бошқа биринчи даражали тўловларни ўз вақтида молиялаштириш, Давлат бюджетининг ғазна ижроси самарадорлигини ошириш масалаларига алоҳида эътибор қаратди, — дейди Меҳнат ва ижтимоий масалалар қўмитаси раиси, ЎзХДП фракцияси аъзоси Ёқуб Умаров. — Аҳамиятли томони, иқтисодиётда биринчи ярим йилликда эришилган натижалар барқарор ривожланишни таъминлади, аҳоли бандлиги ва даромадларининг ўсишига сезиларли таъсир кўрсатди. Давлат бюджети ҳисобот даврида 0,2 фоиз профицит билан ижро этилган. Бу ижтимоий соҳани кафолатли тарзда молиялаштиришда муҳим ўрин тутади.

Қўмита йиғилишида кун тартибидаги масала юзасидан Соғлиқни сақлаш вазирлиги ҳам ўз йўналиши бўйича ахборот бериб ўтди. Таъкидланишича, ҳисобот даврида соғлиқни сақлаш соҳасини ривожлантиришга Давлат бюджетидан 2299,3 миллиард сўм маблағ ажратилган. Бу кўрсаткич 2014 йилнинг шу даврига нисбатан 13,3 фоизга кўпдир.

Шунингдек, йиғилишда қўмита аъзолари томонидан ҳисобот даврида айрим бюджет муассасаларида маблағларнинг мақсадсиз сарфланишига, уларнинг ноқонуний ишлатилиши билан боғлиқ молиявий ҳуқуқбузарликларга йўл қўйилгани алоҳида таъкидланди. Ўзини ўзи бошқариш органлари ҳузуридаги комиссиялар томонидан оила даромадини ҳисоблашда муайян камчиликлар кузатилган.

Депутатлар атрофлича таҳлиллардан сўнг Давлат бюджети ижросида мутасадди вазирлик ва идоралар, ҳокимликлар масъу­лия­тини янада ошириш, Бюджет кодекси талаблари бажарилиши бўйича назоратни янада кучайтириш ҳақида ўз фикр-мулоҳазалари ва тавсияларини билдиришди.

Кўриб чиқилган масала юзасидан қўмитанинг тегишли қарори қабул қилинди.

 

Лазиза ШОМИЛОВА



DB query error.
Please try later.