27.08.2015

ЗАМОН ТАЛАБЛАРИГА МОС

тарбия муассасалари

Мамлакатимиз мустақилликка эришгач, таълим-тарбия тизимида ҳам беқиёс ислоҳотлар амалга оширилди. Кадрлар тайёрлаш Миллий дастури асосида узвий ҳамда босқичма-босқич таълим тизими яратилди. Бошланғич бўғин ҳисобланган мактабгача таълим муассасалари фаолиятини замон талаблари даражасида ташкил этишга давлат сиёсати даражасида эътибор қаратилди. Буни Самарқанд вилояти Булун­ғур туманидаги мактабгача таълим муассасалари мисолида ҳам кўриш мумкин.

— Мактабгача таълим муассасалари фаолияти бугун қандай бўлиши таълимнинг кейинги босқичларидаги муваффақиятини таъминлайди, — дейди тумандаги «Севинч» номли 9-мактабгача таълим муассасасининг мудираси, ЎзХДП аъзоси Лола Бердиева. —  Шу боис мамлакатимизда бу масалага алоҳида эътибор қаратилмоқда. Биргина бизнинг муассасани олайлик, 220 нафар тарбияланувчимиз бор. Уларнинг интеллектуал лаёқатларини ривожлантиришга йўналтирилган 10 дан ортиқ тўгарак ишлаб турибди. Сузиш ҳавзаси, спорт майдончаси болалар ихтиёрида. Инглиз тили сабоқларига алоҳида эътибор қаратилмоқда. Тарбияланувчиларимиз инглиз тили бўйича туман ва вилоят босқичларида бўлиб ўтган танловларда фахрли ўринларни қўлга киритишмоқда. Болаларимиз мусиқа ва рақс санъати ҳамда спорт соҳаларида ҳам юқори натижаларга эришмоқда. Масалан, Жамшид Турсунов 6 ёшидаёқ спортнинг таэквондо тури бўйича Ўзбекистон чемпиони бўлди. Бундай истеъдодли болаларимиз кўпчиликни ташкил этади.

— Мустақиллик йилларида ҳар томонлама замонавий таълим-тарбия масканлари бунёд этилди, — дейди тумандаги «Мойчечак» номли мактабгача таълим муассасаси мудираси Хурсандой Сулаймонова. — Фарзандларимизга дастлабки сабоқ ва кўникмалар бериб боришга тобора катта эътибор қаратилмоқда. Муассасамизнинг 12 та гуруҳидаги болаларга катта тажрибага эга 18 нафар малакали тарбиячи таълим-тарбия бермоқда.

— Эски тузум даврида мактабгача таълим муассасалари ночор аҳволда бўлганлигини яхши эслайман, — дейди Булунғур тумани
8-сонли кўп ихтисосли (тармоқли) Давлат махсус мактабгача таълим муассасаси мудираси, ЎзХДП аъзоси Манзура Туганова.
— Илгари болалар боғчаси деб юритиладиган масканлар болаларни кечгача овитиб ўтирадиган жой бўлган. Таълим-тарбия, тил ўргатиш, жисмоний тарбия билан шуғулланиш учун шароит йўқ эди.  Моддий-техник база ҳақида-ку гапирмаса ҳам бўлади. Ҳозир-чи? Бу масканлардаги яратилган шарт-шароитларни кўриб, болаликка қайтгингиз келади.

Бизда асосан туғма ёки орттирилган мураккаб нуқсонли болалар тарбияланади ва соғломлаштириб борилади. Шу боис муассасамиздаги малакали шифокор ва ҳамширалар болаларни доим назорат қилиб боради. Уларнинг тавсиясига кўра, тарбияланувчиларимизни турли тўгаракларга, спорт машғулотларига жалб қилиб борамиз.

 

Абдусалим МАҲМУДОВ,

«Ўзбекистон овози» мухбири.



DB query error.
Please try later.