25.08.2015

«КУЧЛИ ИЖТИМОИЙ СИЁСАТ

хотин-қизлар турмуш фаровонлигининг муҳим омилидир»

Айни пайтда ЎзХДП «Фаол аёллар» қаноти ташаббуси билан жойларда шу мавзуда давра суҳбатлари ўтказилмоқда.

Бугун мамлакат саноатида банд бўлганларнинг 42,4 фоизи, фан, таълим, маданият соҳаларида 75,3 фоизи, соғлиқни сақлаш, спорт, ижтимоий муҳофаза соҳаларида 76,3 фоизи аёллардир. Уларнинг икки юз минг нафарга яқини ЎзХДП аъзолари ҳисобланади.

ЎзХДП Марказий Кенгаши Фарғона вилоят партия кенгаши билан ҳамкорликда «Кучли ижтимоий сиёсат — хотин-қизлар турмуш фаровонлигининг муҳим омилидир» мавзусида анжуман ташкил этди.

Фарғона политехника институти катта зали вилоятнинг фаол аёллари, партиянинг ёш аъзолари билан гавжум бўлди. Олий Мажлис Қонунчилик палатасидаги ЎзХДП фракцияси аъзоси, депутат Нўмонжон Акбаров, ЎзХДП Марказий Кенгаши масъул ходими Назира ­Матёқубова мамлакатимизда хотин-қизларга кўрсатилаётган ғамхўрлик, ижтимоий қўллаб-қувватлаш ва уларнинг жамият ривожидаги фаол иштироки ҳақида сўз юритишди.

— 90-йиллар бошларида қишлоғимизда аёллар ўртасида «сариқ касал» кўпайиб кетди, — деб эслайди Ўзбекистон Қаҳрамони, «Патилахон» фермер хўжалиги раҳбари, партия фаоли Патилахон Эргашева. — Чунки кетмон кўтаришга яраган қиз-жувон борки, ҳаммаси эрта саҳардан қуёш ботгунча далада эди. Самолётдан сепилган заҳри қотил ҳавони заҳарлар, биз эса шу ҳаводан нафас олардик. Натижада кўплаб касалликлар тарқалиб, кишилар саломатлиги хавф остида қоларди. Булар эртак эмас, ҳаёт, кечаги кун ҳақиқати.

Бугун-чи? Она-бола саломатлиги ҳимоясига доир давлат дастурлари қабул қилиняпти. Ижтимоий соҳага давлат бюджетининг 60 фоизи сарф­ланяпти. Уйда ўтирган аёллар касаначилик, оилавий тадбиркорлик билан шуғулланмоқда. Юртимиз тинч. Шаҳар-қишлоқларимиз обод. Бунинг қадрига етишимиз лозим.

Минбарга Зулфия номидаги Давлат мукофоти лауреати Шаҳноза Давлатова кўтарилди.

—      Мен Ўзбекистон деб аталмиш жаннатмакон юртнинг бахтли фарзандиман, — деди у. — Давлат мукофотига сазовор бўлдим. Ёшларини доим қўллаб-қувватлаган, уларни буюк келажак сари чорлаган бундай мамлакат яна қайда бор?!

—      Шоҳсупанинг энг юқори поғонасига чиққанимда, Ўзбекистон мадҳияси янграб, байроғимиз кўтарилди, — дейди Осиё чемпиони Мадина Қодирова. — Кўзимда қувонч ёшлари қалқиди. Мен, бир қишлоқ қизи истиқлол туфайли шу даражага етдим. Бугун ЎзХДПга аъзо бўлдим. Энди мана шу сиёсий куч сафида мамлакатимизнинг янада равнақ топишига ҳисса қўшишга интиламан.

Минбарга бирин-кетин қўқонлик Гўзал Миртожиева, тошлоқлик Шоҳиста Раҳматуллаева, олти­ариқлик Шаҳодат Ортиқова, мар­ғилонлик Шоира Тўхтасинова ва бошқалар чиқиб, бугун хотин-қизларнинг жамиятдаги мавқеи ортиб бораётгани, уларнинг ижтимоий ҳимояси, бунда ЎзХДПнинг ўрни каби масалаларда фикр-мулоҳазаларини билдиришди.

Тадбир чоғида 135 нафар хотин-қиз ЎзХДП аъзолигига қабул қилинди. Партия фаолларига ЎзХДП Марказий Кенгашининг «Ташаккурнома»лари топширилди.  

 

Муҳаммаджон ОБИДОВ,

«Ўзбекистон овози» мухбири.

 

* * *

 

Сурхондарё вилоятида ўтказилган давра суҳбатида ЎзХДП Марказий Кенгаши масъул ходимлари, Олий Мажлис Қонунчилик палатасидаги партия фракцияси аъзолари, вилоят партия кенгаши мутасаддилари, «Фаол аёллар» қаноти аъзолари иштирок этди.

Тадбирда хотин-қизларни ҳар томонлама қўллаб-қувватлаш, уларнинг турмуш шароитларини яхшилаш, енгиллик ва имтиёзлар яратиш борасида мамлакатимизда амалга оширилаётган ислоҳотлар ўзининг ижобий натижаларини бераётгани алоҳида эътироф этилди.

Давра суҳбатини ЎзХДП Сурхондарё вилоят кенгаши раиси, халқ депутатлари вилоят Кенгашидаги партия гуруҳи раҳбари Чори Жумақулов кириш сўзи билан очди.

— Сафимизда 35 минг нафардан ортиқ партия аъзоси бўлса, уларнинг асосий қисмини хотин-қизлар ва ёшлар ташкил қилади, — деди у. — Сўнгги йилларда 3 минг нафардан ортиқ фаол аёллар ва шижоатли ёшлар партиямизга аъзо бўлгани ҳам уларда фаол фуқаролик позицияси шаклланаётгани, жамият тараққиётидаги иштироки ортиб бораётганининг ёрқин ифодасидир.

— Ҳудудда 94 минг нафарга яқин аҳоли истиқомат қилади, — дейди ЎзХДП Термиз туман кенгаши «Фаол аёллар» қаноти раҳбари Дилбар Муҳамматова. — Бугунги кунда ҳар бир оиланинг ички имкониятларидан келиб чиққан ҳолда, чорвачилик, паррандачилик, боғдорчиликни ривожлантиришга ҳам алоҳида эътибор қаратганмиз. Жорий йилнинг ўтган даврида «Дўстлик», «Истиқлол», «Қорахон», «Қуёшли юрт» ва бошқа маҳаллаларда 500 нафардан ортиқ хотин-қиз бандлиги таъминланган бўлса, йил охиригача яна 300 янги иш ўрни яратиш кўзда тутилган.

 Бундан 25-30 йил аввал воҳада ўнга яқин ишлаб чиқариш мажмуалари бўларди. Истиқлол шарофати билан жойларда кўплаб қўшма корхоналар иш бошлади. Бу эса халқ фаровонлигини ошириш ва аҳоли бандлигини таъминлашда айни муддао бўлмоқда.

— Юртимизда олиб борилаётган ислоҳотлардан ҳар биримиз фахрланамиз, — дейди Термиз шаҳридаги 24-мактабгача таълим муассасаси директори, халқ депутатлари Термиз шаҳар Кенгашидаги ЎзХДП гуруҳи аъзоси Динора Абдуллаева. — Истиқлол шарофати билан халқимиз ўзлигини таниди. Мамлакатимизда хотин-қизлар учун ҳам талай имтиёзлар яратилди.

Давра суҳбати якунида хотин-қизларни қўллаб-қувватлаш борасида мамлакатимизда амалга оширилаётган кенг кўламли ислоҳотлар мазмун-моҳиятини электорат вакиллари, хусусан, хотин-қизлар ва ёшлар орасида кенг тарғиб қилиш юзасидан тегишли тавсиялар берилди.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.