25.08.2015

СИЁСИЙ ПАРТИЯ

бошланғич ташкилотдан бошланади

Ким нима демасин, пар­тиявий ишда ўзгача бир жозиба бор. Мен буни туман партия кенгашига етакчи бўлганим учун эмас, атрофимдаги одамларнинг сиёсий кучга ишончини сезганим, уларнинг ижтимоий-сиёсий жараёнларга қиз­и­қиши ошиб бораётганини кузатганим учун кўп бора ҳис қиламан. Партиямиз сафидаги кишиларнинг ҳар бир ютуfидан, гўёки, унга ўзим эришгандек юрак-юракдан қувонаман.

— Опа, биласизми, жуда ҳаяжонландим, озроқ қўрқдим ҳам,  — деди «Ёш сиёсатчи» кўрик-танловидан қайтаётганимизда Нодира Умирова.

— Нимадан? — сўрадим қизиқиб.

— Ютқизиб қўйишдан...

— Ростини айтсам, мен ҳам хавотирландим. Ҳозир эса севиняпман. Энди кўрик-танловнинг республика беллашувида ўзингни кўрсат.

Шундай дедиму партиямизнинг фаол аъзоларидан бири бўлган ­Нодиранинг сафимизга қандай қўшилгани ёдимга тушди. Эсимда, у туман ижтимоий-иқтисодиёт коллежига ўқитувчи бўлиб келганида, пухта билими, ташкилотчилиги билан кўпчиликнинг эътиборига тушган эди. Бир куни коллежга бордим ва у билан узоқ суҳбат қурдим, партиямизнинг мақсади, дастури билан таништирдим. Орадан анча вақт ўтгандан кейин, унинг ўзи туман партия кенгашига келди ва истагини айтди. Уни партия аъзолигига қабул қилдик. Уч йил бурун БПТ етакчилигига сайланди. У партиявий ишларда ҳам жуда фаол. Айни кунда бошланғич ташкилотимизда ЎзХДП аъзолари сони 20 нафарга етди...

Ҳозир тумандаги 37 бошланғич ташкилот атрофига 1515 нафар аъзо бирлашган. Ҳудудимизда йирик корхоналар кўп. Шунингдек, қоракўлчилик ҳам йилдан-йилга ривожланиб бораяпти. Фермер ва деҳқон хўжаликларида минглаб электоратимиз вакиллари меҳнат қилишмоқда. Қуйи бўғин етакчиларининг ҳар бири партияга қабул, сиёсий ўқув машғулотлари, турли тадбирлар юзасидан туман кенгаши билан доимо маслаҳатлашиб туришади.

Ҳар ойнинг охирги шанба куни «Бошланғич партия ташкилоти куни», деб белгиланган. Йўқ, расмиятчилик учун эмас, ишни яхшилаш учун, айрим масалаларни ўзаро кенгашиб ҳал қилиш мақсадида фаолиятимизга ушбу усулни жорий қилдик. Натижада қатор бошланғич ташкилотларимизда иш сифати ва самарадорлиги ошиб бораяпти.

Масалан, Муборак газни қайта ишлаш заводида минглаб ишчилар меҳнат қилади. Завод директори Элмурод Қурбонов партиямиздан халқ депутатлари Қашқадарё вилоят ва Муборак туман Кенгашлари депутатлигига сайланди. У ижтимоий ҳимояга муҳтож аҳоли қатламига ёрдам бериш ва бошқа масалаларда фаоллик кўрсатмоқда. Демак, корхонада БПТ фаолият кўрсатиши учун яхши шароит бор. Жамоанинг илғор ишчиси Абдураҳмон Тўев икки йил олдин БПТ етакчиси этиб сайланди. У қисқа вақт ичида ўзини кўрсата олди. Ҳозир корхонада 190 нафар ишчи-ходим партиямиз аъзоси ҳи­соб­ланади.

Шунингдек, Муборак иссиқлик электр маркази муҳандиси Олимжон Казаков, тиббиёт коллежи ўқитувчиси Ўткир Бердиевлар етакчилик қилаётган бошланғич ташкилотларимизда ҳам иш яхши йўлга қўйилган. Айниқса, «Кексаларни эъзозлаш йили» Давлат дастурида белгиланган вазифаларни амалга оширишда улар алоҳида фаоллик кўрсатмоқда. Партиядошларимиз тумандаги кексалар ҳолидан хабар олиш, уларга ижтимоий кўмак бериш ишларида бош бўлишмоқда.

Умуман олганда, бугун партиямиз тизимида бошланғич ташкилотлар фаолиятини кучайтириш, уларни партия ғоя ва мақсадларини кенг тарғиб этувчи воситага айлантириш масалаларига алоҳида эътибор қаратилмоқда. Энг муҳими, бу орқали аъзоларимизнинг ижтимоий-сиёсий фаоллиги ошиб бормоқда, бизга хайрихоҳлар сони кўпаймоқда. Аслини олганда асосий мақсад ҳам шундан иборат.

 

Алиме ПАРПИЕВА,

ЎзХДП Муборак туман кенгаши раиси, халқ депутатлари туман Кенгашидаги партия гуруҳи раҳбари.


Фикр ва мулохазалар

Защита от автоматических сообщений

Сўнгги янгиликлар: