Охирги сонда



Кўп ўқилган мақолалар



Долзарб мавзу



Мақолалар архиви

«    Iyun 2018   
Du Se Cho Pa Ju Sha Ya
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1
28.07.2015

«БОЛАЖОН» БОЛАЛАРНИ МАКТАБГА ТАЙЁРЛАЙДИ

Халқ таълими вазирлиги томонидан Гулистон туманида медиа-тур ташкил этилди. Унинг доирасида «Лола» номли 12-, «Қувонч» номли 21-мактабгача таълим муассасаларидаги қисқа муддатли гуруҳлар фаолияти, шунинг­дек, Сирдарё вилоят халқ таълими бошқармаси тажрибаси билан яқиндан таништирув тадбирлари ўтказилди.

Мактабгача таълим муассасасига қатнайдиган бола билан оиладан мактабга келган болаларнинг фикрлаши ва дунёқараши даражаси бир-биридан анча фарқланади. Орадаги ана шу тафовутни йўқотиш учун мактабгача таълим муассасаларида, мактабларда қисқа муддатли тайёрлов гуруҳлари ташкил этилиб, мактаб ёшидаги болалар учун «Болажон» дастурида белгиланган кун тартибига мувофиқ, таълим-тарбия ишлари олиб борилмоқда.

Сирдарё вилоятидаги мактабгача таълим муассасаларида болалар қамровини ошириш, мактабгача ёшдаги болаларни навбатдаги босқичга сифатли тайёрлаш ишларига жиддий эътибор қаратилмоқда.

—      Қисқа муддатли тайёрлов гуруҳларида фаолият кўрсатаётган тарбиячилар учун вилоят халқ таълими бошқармаси томонидан икки кунлик ўқув-семинар ташкил этилди, — дейди бошқарма бошлиғи Улуғбек Мамарасулов. — Ўқув-семинарда махсус тайёрланган тренерлар томонидан 24 соатлик дастур асосида янгиликлар амалий ва назарий тарзда етказиб берилди. Унда қатнашган 98 нафар тарбиячига сертификат берилди.

Гулистон туманидаги «Лола» ва «Қувонч» номли мактабгача таълим муассасаларидаги қисқа муддатли гуруҳлардаги таълим-тарбия жараёни тадбир иштирокчиларида катта қизиқиш уйғотди. Ҳар икки таълим муассасасида ҳам озодалик ва ободончилик ишлари яхши йўлга қўйилган. Спорт майдончаларида болалар билан турли жисмоний машқлар, қизиқарли ўйинлар ташкил қилиш учун зарур бўлган барча шароит яратилган. Махсус тайёрланган ўқув хоналари ҳам болалар дунёқарашига мос қилиб жиҳозланган.

—      Биз бу гуруҳларни ташкил қилиш учун жиддий тайёргарлик кўрдик, — дейди 12-мактабгача таълим муассасаси мудири Меҳринсо Мирзақулова. — Маш­ғулотларимиз ижобий самара беряпти. Дарслар қизиқарли тарз­да ташкил қилинмоқда.

— Мен ўзим педагогман, — дейди тайёрлов гуруҳига қатнаётган  Барно ва Маҳмуджонларнинг бувиси Жамила опа Содиқова. — Дастурлар билан танишиб чиқдим. «Болажон» дастури ва тайёрлов гуруҳлари учун махсус тайёрланган дарсликлар менга жуда маъқул бўлди. Ўғлим ва келиним билан маслаҳатлашиб, невараларимни тайёрлов гуруҳига олиб келдим. Икки-учта маш­ғулотдан кейин уларда ўзгариш сезилди. Тарбиячилар болаларда дарсларга катта қизиқиш уйғотяпти. Бўш пайтларимда шу ерга келиб, машғулотларни кузатаман. Ўқитувчилардаги жонкуярлик, болалардаги интилишни кўриб хурсанд бўламан.

—      Маҳалламиздаги мактаб ва боғча жамоалари билан мустаҳкам алоқа ўрнатганмиз, — дейди 21-мактабгача таълим муассасаси жойлашган «Юлдуз» маҳалла фуқаролар йиғини раиси Жанобил Юсуфалиев. — Қисқа муддатли гуруҳлар ташкил қилиш учун ота-оналар ўртасида тарғибот-ташвиқот ишларини олиб бордик. «Болажон» дастури билан таништириб, дарсликлар тақдимотини ўтказдик. Натижада тайёрлов гуруҳига келувчи болалар кўпайиб, мактаб қошида ҳам қўшимча гуруҳ ташкил қилинди. Фарзандлари муддатидан олдин ёзишни, ўқишни ўрганса, қайси ота-она хурсанд бўлмайди, дейсиз!

Мазкур медиа-турда иштирок этган оммавий ахборот воситалари ходимлари мактабгача таълим муассасаларида ташкил этилган қисқа муддатли гуруҳлар тажрибаси ҳақида ўз фикр ва мулоҳазаларини билдирдилар.

 

Ўктам АБДУЛЛАЕВ,

«Ўзбекистон овози» мухбири.



DB query error.
Please try later.