28.07.2015

ЭЛЕКТОРАТ МУРОЖААТЛАРИГА ЕЧИМ ТОПИЛМОҚДА

Маҳалла ишига кўмак бериш, аҳолини аниқ йўналтирилган манзилли ижтимоий ҳимоя қилиш жараёнига муносиб ҳисса қўшиш мақсадида жойларда «Маҳалла — аҳолини манзилли ижтимоий қўллаб-қувватлаш маркази» лойиҳаси асосида турли давра суҳбатлари ва семинарлар ташкил этилмоқда. Навбатдаги тадбир Сурхондарё вилояти Бойсун туманида бўлиб ўтди.

Тадбирда аҳолини ижтимоий қўллаб-қувватлашда маҳалланинг ўрнини мустаҳкамлаш хусусида сўз борди. Бунинг учун, энг аввало, ўзини ўзи бошқариш органларининг ижтимоий-иқтисодий хусусиятларини чуқур ўрганиш, таҳлил қилиш, шу асосда таклифлар ишлаб чиқиш лозимлиги таъкидланди.

— Партиямиз тизимида ижтимоий ҳимояга муҳтож, кам таъминланган, боқувчисини йўқотган, кексалар, жисмоний имконияти чекланган кишилар манфаатини самарали ҳимоя қилиш, уларга ажратилаётган маблағларнинг манзиллилигини ошириш масаласига ҳамиша катта эътибор қаратиб келинади, — деди ЎзХДП Бойсун туман кенгаши раиси ўринбосари Омон Бобоев. — Оилалар турмуш тарзини ўрганиш, уларни ҳар томонлама қўллаб-қувватлаш долзарб масала. Айниқса, кўмакка муҳтож оилаларга маҳалла-кўй эътибор қаратиши керак. Шу мақсадда туман бандликка кўмаклашиш ва аҳолини ижтимоий муҳофаза қилиш маркази, Пенсия жамғармаси туман бўлими билан ҳамкорлик алоқалари мустаҳкамланмоқда. Лойиҳа доирасида ўтказилган тадбирлар натижасида туманда касб-ҳунар коллежлари битирувчилари, иш топишда қийналаётган кишиларнинг бандлигини таъминлаш масаласига эътибор янада кучайтирилди.

Жорий йилнинг ўтган даври мобайнида аҳолини ўйлантираётган масалалар, хусусан, ички йўлларни таъмирлаш, мактабгача таълим муассасалари фаолия­тини яхшилаш, аҳолини тоза ичимлик суви билан таъминлашдаги камчиликларни бартараф этиш каби масалаларда 41 мурожаат бўлди. Аҳоли билан юзма-юз мулоқотлар натижасида жойлардаги муаммолардан хабардор бўлаяпмиз. Бу бизнинг кўпроқ амалий ишлар, аниқ масалалар билан шуғулланишимизда муҳим аҳамият касб этмоқда.

Давра суҳбатида партия ташкилотлари ва маҳалла ўртасидаги ҳамкорликни янада кучайтириш борасида фикр алмашилди, таклиф ҳамда тавсиялар ўртага ташланди. Тадбир давомида кўчма Жамоатчилик қабулхонаси ташкил этилиб, электорат вакилларини ўйлантираётган масалалар ўрганилди. Депутатлар томонидан мурожаатлар бўйича ҳуқуқий маслаҳатлар берилди.

 

Аброр ҚУРБОНОВ,

ЎзХДП Марказий Кенгаши сектор мудири.



DB query error.
Please try later.