Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
16.07.2015

ХОТИН-ҚИЗЛАР САЛОМАТЛИГИНИ МУСТАҲКАМЛАШ МАСАЛАЛАРИ МУҲОКАМА ҚИЛИНДИ

Ўзбекистон ХДП Марказий Кенгаши Хоразм вилоят кенгаши билан ҳамкорликда Урганч шаҳрида соғлиқни сақлаш соҳасига оид ислоҳотларнинг хотин-қизлар саломатлигини мустаҳкамлашдаги аҳамиятига бағишланган давра суҳбати ўтказди. Тадбирда сўзга чиққанлар фақат маърузалар билан чекланиб қолишмади. Фикр-мулоҳазалар асносида билдирилган таклифлар семинарнинг қизиқарли ўтишини таъминлади.

Дастлаб вилоят Соғ­лиқни сақлаш бошқарма­си бошлиғи ўринбосари ­Қудрат Жуманиёзов сўзга чиқди. У вилоятда аҳоли, хусусан, хотин-қизлар саломатлигини муҳофаза қилиш, оналик ва болаликни ҳи­моя­лаш борасида олиб борилаётган ишларга тўхталиб ўтди.

— Ҳозир вилоятимизда халқаро стандартларга жавоб берадиган ихтисослаштирилган вилоят шифохоналари, уларнинг шаҳар ва туман бўлимлари, тез тиббий ёр­дам хизматларидан иборат ягона тизим шакллантирилди, — деди у. — Одамлар саломатлигини муҳофаза қилиш тизимининг қуйи бўғини бўлмиш 164 қишлоқ врачлик пункти хизмат кўрсатмоқда. Улар замонавий тиббиёт ускуналари ва малакали тиббиёт ходимлари билан таъминланди. Она ва бола перинатал ва скрининг маркази иш бошлади. Ўтган даврда 150 нафар тиббиёт ходими хорижда малака ошириб қайтди. Бу саъй-ҳаракатлар ўз самарасини бермоқда. Масалан, вилоятда туғиш билан боғлиқ оналар ўлими 2,3 мартага, чақалоқлар ўлими эса 2,5 мартага камайди.

 Бироқ очиғини айтиш керак, аҳоли саломатлигини муҳофаза қилиш борасида қилинадиган ишларимиз оз эмас. Масалан, оила қуриш остонасида турган келин-куёвларни тиббий кўрикдан ўтказиш, ҳомиладор аёлларга бепул дори-дармонлар тарқатиш ишлари ҳамма жойда ҳам талаб даражасида, деб бўлмайди. Демак, партиянинг «Фаол аёллар» қаноти билан ҳамкорликни изчил йўлга қўйиб, бу борада аҳоли кенг қатламлари орасида тарғибот-ташвиқот ишларини янада кучайтиришимиз керак.

Сайёра Абдукаримова, Хоразм вилоят ҳокими ўринбосари, вилоят Хотин-қизлар қўмитаси раиси, Олий Мажлис Сенати аъзоси:

Бугун 1 миллион 600 минг нафар вилоят аҳолисининг 856 минг нафарини хотин-қизлар ташкил қилади. Шу рақамнинг ўзиёқ ҳамкорликдаги ишларимиз кўлами қанчалик катта эканини кўрсатиб турибди. Маҳаллалардаги хотин-қизлар секциялари фаол ишласа, камчилик-муаммоларга ечим топиш осон кечади. Ҳеч бир хотин-қиз эътибордан четда қолмаслиги керак.

Назира Матёқубова, Ўзбекистон ХДП Марказий Кенгаши масъул ходими:

— Партиямиз Сайловолди дастурида аҳолига биринчи тиббиёт-санитария ёрдами ва мақбул тиббий хизмат кўрсатилишини янада кенгайтириш, унинг сифатини ошириш, айниқса, олис ҳудудларда бу хизматдан қулай ҳамда тез фойдаланиш имкониятини таъминлаш каби муҳим вазифалар белгиланган. Шундан келиб чиққан ҳолда, партиямиз ўз депутатлари, фаоллари орқали аҳолининг эҳтиёжманд қатламларига малакали тиббий ёрдам ва хизматларни бепул кўрсатиш билан боғлиқ тегишли қонунлар, меъёрий ҳужжатлар ижроси устидан тизимли депутатлик ва жамоатчилик назоратини ўрнатиши лозим. Бу Олий Мажлис Қонунчилик палатасида тайёрланаётган соҳага оид қонунлар лойиҳалари юзасидан таклифлар ҳар томонлама пухта ишлаб чиқилишида ҳам муҳим аҳамият касб этади.

Ўринбой Абдуллаев, Хоразм вилоят истеъмолчилар ҳуқуқларини ҳимоя қилиш жамиятлари ҳудудий бирлашмаси раиси, Ўзбекистон ХДП фаоли:

— Тиббиёт тизимининг айрим соҳаларида биз истеъмолчи мақомида бўламиз. Баъзида дорихоналарда бир номдаги дори-дармоннинг нархи турлича эканлигига гувоҳ бўлганмиз. Ушбу масалада мувофиқликни таъминлашда жамоатчилик назорати муҳим ўрин тутади. Шунингдек, тегишли қонунчиликни такомиллаштириш мақсадга мувофиқ, деб ўйлайман.

Айрим ҳолларда дори воситаларининг нотўғ­ри тавсия этилиши ва қабул қилинишига ҳам гувоҳ бўляпмиз. Бу инсон саломатлиги, ҳаётига хавф соладиган нохуш ҳолатларга сабаб бўлиши мумкин. Албатта, тиббий хизмат соҳасидаги айрим камчиликларни бартараф этиш турли омилларга боғлиқ. Шулардан энг муҳими, аҳолининг тиббий маданиятини ошириш масаласи ҳисобланади. Демак, ҳамкор ташкилотлар билан бирга, тар­ғибот-тушунтириш ишларини изчил йўлга қўйиш талаб этилади.

Раимберган Сабуров, Ўзбекистон ХДП Хоразм вилоят кенгаши раиси, вилоят Кенгашидаги партия гуруҳи раҳбари:

— Мустақиллик йилларида соғлиқни сақлаш тизимида амалга оширилаётган кенг кўламли ислоҳотлар, уларнинг натижалари кишини қувонтиради. Лекин баъзи жойларда йўл қўйилаётган эътиборсизлик, масъулиятсизлик оқибатида одамларни норози қилаётган муаммолар ҳам юзага чиқмоқда. Давра суҳбатида бу борадаги айрим масалалар бўйича фикр-мулоҳазалар, таклифлар билдирилди. Биз учун энг муҳим вазифа аҳоли, айниқса, хотин-қизларнинг тиббий саводхонлигини ошириш экан, ҳар бир аёлнинг соғлиғи ҳақида қайғуришимиз керак. Давра суҳбатида ўртага ташланган фикр-мулоҳазалар, таклифларни умумлаштириб, тегишли тавсиялар ишлаб чиқамиз.

Давра суҳбати якунида ижтимоий ҳамкор ташкилотлар билан олиб бориладиган тадбирлар режаси тасдиқланди.

 

Рўзимбой ҲАСАН,

«Ўзбекистон овози» мухбири.



DB query error.
Please try later.