14.07.2015

ҲАР БИР МУРОЖААТ ЧУҚУР ЎРГАНИЛИШИ КЕРАК

ЎзХДП ҳудудий кенгашлари қошида фаолият юритаётган Жамоатчилик қабулхоналари электорат манфаатларини ҳимоя қилиш, жойлардаги турли ижтимоий масалаларни ўрганиб, ҳал қилишда муҳим аҳамият касб этмоқда. Шу боис унга мурожаат қилувчилар сони йил сайин кўпайиб бормоқда.

Сурхондарё вилоятида 15 та Жамоатчилик қабулхонаси ишлаб турибди. ЎзХДПдан сайланган депутатлар мурожаатларда кўтарилаётган масалаларни ҳал қилишда камарбаста бўлишяпти. Бу борада кўплаб ютуқларга эришилди, аммо ечимини кутаётган муаммолар ҳам йўқ эмас. Хўш, уларни бартараф қилиш учун бугун қандай йўл тутиш керак, нималарга эътибор қаратиш лозим?

Қаҳрамон Мирзаев, Олий Мажлис Қонунчилик палатаси депутати, ЎзХДП фракцияси аъзоси:

— Мен 74-Денов сайлов округидан депутат этиб сайланганман. Яқинда Денов ва Олтинсой туманларида сайловчилар билан ўтказилган учрашувларда жойларда аҳолини ўйлантириб келаётган муаммолар борлиги ойдинлашди. Масалан, айрим фуқароларни коммунал хизмат, соғ­лиқни сақлаш соҳасидаги баъзи масалалар қийнамоқда.

Шунингдек, хизма кўрсатиш ва сервис соҳасини ривожлантиришда ҳали ҳамон сунъий тўсиқларга дуч келинаётгани аниқланди. Шу билан бир қаторда, тоғ ва тоғолди ҳудудларида истиқомат қилаётган кишиларни ҳам айрим муаммолар ўйлантириб келмоқда. Демак, биз аҳоли қачон қабулхонага келиб мурожаат қилса, муаммосини ҳал этиш чораларини кўрамиз, деб кутиб ўтирмаслигимиз керак. Кўчма жамоатчилик қабулхоналари фаолиятини кучайтириш, чекка ва олис қишлоқларда яшовчи фуқаролар ҳолидан хабар олиб, улар билан елкама-елка туришимиз керак, деб ўйлайман.

Райҳона Раҳимова,  Шўрчи Маиший хизмат кўрсатиш касб-ҳунар коллежи директори, вилоят Кенгашидаги ЎзХДП гуруҳи аъзоси:

— Жамоатчилик қабулхоналари ишини янада жонлантириш учун, аввало, одамлар орасига кириб бориш лозим. Биз мурожаатда акс этган ҳар бир масаланинг илдизигача етиб боришимиз керак. Хўш, шу муаммо қаердан келиб чиқди, кимнинг эътиборсизлиги оқибатида бундай бўлди? Ана шу каби саволларга жавоб излаш лозим. Чунки бугун бир одамни ўйлантираётган муаммо, эртага бошқа кишини ҳам ташвишга солиши мумкин. Биз ҳар қандай масалани ўткир нигоҳ, зийраклик билан бартараф этишга ҳаракат қилишимиз шарт.

Алишер Маматмуродов, ЎзХДП Жарқўрғон туман кенгаши раиси:

— Бугун ҳар бир сиёсий партия ўз электоратини ўйлантираётган муаммога ечим топиш билангина обрў-эътибор қозонади. ЎзХДП Жар­қўрғон туман кенгашида депутатлар, фаоллар ва кенг жамоатчилик вакиллари ҳамкорлиги яхши йўлга қўйилганлиги учун бу борада муайян муваффақиятларга эришилмоқда.

Туманда 180 минг нафардан ортиқ аҳоли истиқомат қилади. 51 бошланғич партия ташкилотимиз бор. Туман Кенгашида Ўз­ХДПдан сайланган 16, вилоят Кенгашида эса 2 нафар депутат иш олиб бормоқда. Аҳоли мурожаатлари билан ишлашда уларнинг куч ва салоҳиятидан самарали фойдаланишга ҳаракат қилаяпмиз.

Жамоатчилик қабулхонаси ҳақи­қий маънода одамлар ишончини қозонаётган масканга айланмоқда. Ҳар бир мурожаатни атрофлича ўрганиб, ўз вақтида ҳал этишга ҳаракат қилаяпмиз. Жорий йилнинг ўтган беш ойида 34 мурожаат келиб тушган бўлса, шундан 80 фоизи ижобий ҳал бўлди. 15 дан ортиқ депутатлик сўровининг асосий қисми ечим топди. 

Яқинда туман марказидан 15-20 километр олисда жойлашган Дам, Қорақўрсоқ, Оққўрғон, Қораёғоч» қишлоқларида учрашув, йиғилиш ва очиқ мулоқотлар ўтказдик. Кўчма Жамоатчилик қабулхонасига касаначиликни ривожлантириш, қишлоққа саноатни олиб кириш, янги иш жойлари ташкил қилишга оид 30 дан ортиқ мурожаат ўрганилиб, асосий қисми жойида ҳал этилди. Демак, Жамоатчилик қабулхоналари фаолиятини кучайтириш жойлардаги кўплаб муаммолар ечимида муҳим ўрин тутади.

Муҳаммади Жўраев, «Денов босмахонаси» масъулияти чекланган жамияти раиси:

— Айни кунларда Сурхондарё вилоятида қарийб 40 номдаги газета ва журнал нашрдан чиқади. Яқин-яқингача улар Қашқадарё, ­Самарқанд ва республикамизнинг бош­қа вилоятларида чоп этиларди. Бу вақт ва маблағ масаласида қатор муаммоларни келтириб чиқараётган эди. Муаммони бартараф қилиш мақсадида ўтган йилнинг охирларида ЎзХДП Денов туман кенгашида ташкил қилинган Жамоатчилик қабулхонасига мурожаат қилдим. Мутасаддилар ҳуқуқий маслаҳат ва яқиндан кўмак берди. Ҳудуддаги молия муассасасидан зарур маблағни олганимиздан ке­йин Германия­дан замонавий матбаа технология­си олиб келинди. Бу йил соатига 16 минг нусха матбуот нашр­ларини чоп этиш қувватига эга цех фойдаланишга топширилди. Жаҳон талабларига тўлиқ жавоб берадиган «ROTO­STAR-16» русумдаги тизимнинг умумий қиймати 273 минг доллар бўлиб, матбуот нашр­ларини 4 хил рангда чоп этиш имконияти юзага келди. Ўн нафар одам иш билан таъминланди. Масалани ижобий ҳал қилишда амалий ёрдам берган ЎзХДП Денов туман кенгаши фаоллари, депутатлардан миннатдорман...

Фаррух Абжалов, ЎзХДП Сурхондарё вилоят кенгаши бўлими мудири, халқ депутатлари вилоят Кенгашидаги партия гуруҳи аъзоси:

— Жамоатчилик қабулхоналари сайловчилар ишончини мустаҳкамлаш, хайрихоҳларимиз сонини кўпайтиришда тажрибада синалган механизмдир. Лекин айрим туманларда партия кенгашларидаги фаолларимиз, депутатлар бунинг аҳамиятини тўғри тушуниб етмаяпти. Масалан, ЎзХДП Шеробод, Қизириқ, Музработ ва Бойсун туманлари кенгашларида мурожаатлар билан ишлашда камчиликлар учраб турибди. Аҳолини қабул қилиш аниқ тартиб асосида йўлга қўйилмаган. Кўчма жамоатчилик қабулхонаси ташкил қилишда ҳам мазкур ҳудудларда айрим сусткашликлар кўзатилмоқда.

Ҳар бир мурожаат ортида инсон тақдири туради. Унда кўтарилган масалани ҳал этиш орқали кимнингдир оғири енгил бўлади, айрим ҳолларда ҳудудларнинг ижтимоий-иқтисодий тараққиётига тўсиқ бўлаётган муаммолар бартараф этилади. Яна шуниси ҳам борки, шаҳар ва қишлоқларнинг бугунги ҳолати, ривожланиш тамойиллари ва фуқаролар эҳтиёжига қараб қонунчиликни янaдa тaкомиллaштириш имкони ортади. Шу боис Жaмоaтчилик қaбулхонa­лaри пaртия тaшкилотлaри вa элек­торaт ўртaсидaги кўприккa aйлaни­ши лозим.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.