Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
02.07.2015

ИСТИҚЛОЛИМИЗ, ФАХРУ ИФТИХОРИМИЗ ТИМСОЛИ

2 июль – Ўзбекистон Республикаси Давлат герби қабул қилинган кун

...1992 йил 2 июль. Президентимиз Ислом Каримов «Ўзбекистон Республикасининг Давлат герби тўғрисида»ги қонунга имзо чекди. Халқимиз ўзи истаган ва танлаган йўл – эркин, озод ва обод, фаровон ҳаёт барпо этиш йўлида яна бир муқаддас тимсолга эга бўлди. Бу билан мамлакатимиз мустақиллиги янада мустаҳкамланди. Ўзбекистон халқи ўз қадр-қимматини, ғурурини, тарихи ва миллий қадриятларини чуқурроқ англай бошлади.

Ҳа, мустақиллигимизнинг дастлабки кунларидан Президентимиз Ислом Каримов раҳнамолигида янги давлат, янги жамият қуриш йўлидаги ислоҳотлар жараёнида хал­қимизнинг миллий ғурурини кўтаришга, озод ва обод Ватан барпо этишга бўлган интилиши, шижоатини оширишга алоҳида эътибор қаратилди. Давлатимиз рамзлари, жумладан, герб лойиҳаси ишлаб чиқилиб, кенг муҳокамалар асосида қабул қилингани бу борада муҳим ишлардан бири бўл­ди.

Шундан эътиборан давлатимиз герби тасвири муҳр­ларда ва давлат идоралари бланкаларида, расмий нашрларда, қоғоз ва танга пулларда, қимматли қоғозлар ва фуқаролик паспортида ҳамда қонунда белгиланган бошқа ҳужжатлардан жой олмоқда.

Ўзбекистон герби давлатимиз чегараларида ўрнатилди.

Аждодларимиз давлат там­ғасини азалдан муқаддас билган. Маҳмуд Қошғарий «Девону луғотит турк» асарида тамғани «подшоҳнинг ҳукм­дорлик муҳри», деб изоҳлаган. Соҳибқирон Амир ­Темур тамғасида «Куч — адолатда» ёзуви муҳрланган. Улуғ бобомиз салтанат асосини ана шу ҳикмат асосига қурган. Буларнинг барчаси давлат тамғаси халқимиз ҳаёти ва миллий давлатчилик тарихимизда озодлик, ғурур-ифтихор ва ор-номус тимсоли бўлганидан далолатдир.

Гербимиздаги ҳар бир ранг, чизиқ, белги чуқур рамзий маънога эга. Баланд тоғлар орасидан оқаётган дарёлар — ҳаёт боқийлиги рамзи бўлса, гербнинг сўл томонидаги буғдой бошоқлари ризқ-рўзимиз бутунлигини, ўнг томонидаги қийғос очилган пахта юртдошларимиз қалби, нияти поклигини, беқиёс бойликларимизни акс эттиради. 

Гербнинг юқори қисмида мамлакатимиз жипслигининг рамзи сифатида саккиз қиррали юлдуз тасвирланган. Мусамман ичидаги ярим ой — қўлга киритилган мустақиллигимизни, юлдуз халқи­миз ҳамиша комилликка интилиши ва саодатга элтувчи йўлни танлаганини билдиради. Бу тимсоллар миллий анъана ва қадриятларимизнинг боқийлиги, маънавиятимиз юксаклиги, ирода ва эътиқодимиз мустаҳкамлиги рамзидир.

Давлатимиз гербида гуллаган водий узра нур сочаётган қуёш тасвири заминимизнинг серқуёшлигига, халқимиз интилаётган нурафшон манзилларга ишорадир.

Гербнинг марказидаги қанотларини кенг ёйиб турган Ҳумо қуши қадимдан бахт ва давлат қуши, эрк, саодат, ҳиммат, олижаноблик, омад тимсоли ҳисобланган. Ҳазрат Алишер ­Навоий «Лисонут-тайр» достонида Ҳумони бахт ва иқбол, эзгулик ва улуғворлик келтирувчи қуш сифатида тасвирлаган.

Давлатимиз гербининг паст­ки қисмида, байроғимизни эслатувчи чамбар бандида зарҳал ҳарфлар билан барчамиз учун азиз ва муқаддас бўлган «Ўзбекистон» сўзи битилган.

Барча давлат рамзлари қатори герб ҳам халқимизнинг шаъну шавкати, ғурури, ор-номуси, тарихий хотираси ва орзу-умидларини ўзида мужассам этади. У олий саодат — истиқлолимиз рамзи, ўзини шу юрт фарзанди деб билган ҳар бир инсон учун чексиз фахру ифтихор манбаидир.

Президентимиз Ислом ­Каримов таъкидлаганидек, давлатимиз рамзлари — байроқ, герб, мадҳия Ўзбекистон хал­қ­ларининг шон-шарафи, ғурури, тарихий хотираси ва интилишларини ўзида мужассамлаштиради, мана шу рамз­ларни эъзозлаш ўзининг, ўз мамлакатининг қадр-қимматини билган ҳар қайси инсоннинг муқаддас бурчидир.

«Ўзбекистон Республикасининг Давлат герби тўғрисида»ги қонунда ҳам мамлакатимиз фуқаролари, Ўзбекистонда истиқомат қиладиган барча шахс давлатимиз гербини ҳурмат қилишлари шарт экани белгилаб қўйилган. 2010 йил 25 декабрдан кучга кирган «Ўзбекистон Республикасининг давлат рамзлари ҳақидаги айрим қонун ҳужжатларига ва Ўзбекистон Республикасининг Маъмурий жавобгарлик тўғ­рисидаги кодексига ўз­гартиш ва қўшимчалар киритиш ҳақида»ги қонунда давлатимиз гербидан фойдаланиш қоидалари янада мустаҳкамланган.

...Гербимизни ҳар гал кўрганда, унинг юксак маъно-мазмунидан чексиз ғурур туямиз. Чунки Ўзбекистон герби — давлатимиз суверенитетини ифодалайдиган, халқ­имиз ор-номуси ва шаънини мустаҳкамлайдиган муқаддас тимсолдир. Зотан, ўз қадр-қимматини, таянчи ва суянчини англаган халқ ўз миллий тимсолларини ҳамиша эъзозлайди, маънавияти бутун халқни ҳеч қандай куч ўзи танлаган йўлдан чалғита олмайди.

 

Дилшод КАРИМОВ,

ЎзА шарҳловчиси.



DB query error.
Please try later.