27.06.2015

КАСБИМДАН ФАХРЛАНАМАН

Маҳмуджон ПАРПИЕВ, «Наманган ҳақиқати» газетаси бош муҳаррири, халқ депутатлари вилоят Кенгашидаги ЎзХДП гуруҳи аъзоси.

Матбуот ва оммавий ахборот воситалари ходимлари куни муносабати билан ўтказилган тантанали маросимда иштирок этиб, тўғриси, журналистлик касбини танлаганимдан қалбим чексиз фахр-ифтихорга тўлди. Кўз олдимдан мустақиллик йилларида Оммавий ахборот воситалари босиб ўтган йўл гавдаланди... 

Мамлакатимизда сўнгги чорак аср мобайнида барча соҳаларда изчил ривожланишни кўраяпмиз. Хусусан, миллий матбуот ва журналистикамиз жадал тараққиёт йўлини босиб ўтаяпти. Бу ўз-ўзидан бўлаётгани йўқ, албатта. Давлатимиз томонидан Оммавий ахборот воситаларини мамлакатимиздаги ижтимоий-сиёсий тараққиёт, маънавий-маърифий юксалиш, миллий қадриятларимизни қарор топтиришда фаол иштирок этиши учун барча имкониятлар яратиб берилган.

Дарҳақиқат, бугун нафақат пойтахтимизда, балки бутун республикамиз, вилоятларда ҳам бу соҳани ривожлантириш учун шарт-шароитлар мавжуд. Буни биргина Наманган вилояти мисолида ҳам яққол кўриш мумкин. Бундан 20-25 йил илгари вилоятимизда 2 та ва туманларда чоп этиладиган газеталар фаолият юритарди. Бугунги кунга келиб, Наманганда 50 дан ортиқ газета ва журнал чоп этилмоқда. Барча таҳририятлар энг сўнгги ахборот-коммуникация технологиялари билан жиҳозланган. Уларнинг деярли асосий қисми замонавий  технологиялар воситасида рангли чоп этилмоқда.  Асосийси, мазкур газета ва журналларда мазмунан бой, муҳим ижтимоий-сиёсий масалалар, жамиятда учраётган муаммоларга бағишланган салмоқли материаллар бериб боришга ҳаракат қилинаяпти.

Бугунги кунда вилоятдаги барча оммавий ахборот воситаларининг веб-сайтлари мунтазам фаолият кўрсатмоқда. Уларнинг замон талаблари даражасида ишлаши таъминланмоқда.

Мамлакатимизда оммавий ахборот воситаларига берилаётган эътиборни ҳар қадамда сезаяпмиз. Президентимизнинг 2011 йил 30 декабрдаги «Оммавий ахборот воситаларини янада ривожлантириш учун қўшимча солиқ имтиёзлари ва афзалликлар бериш тўғрисида»ги қарори бунга яққол далил бўлади. Буни бевосита ўзимизнинг фаолиятимиз мисолида кўраяпмиз. Мисол учун мазкур қарорга мувофиқ, «Наманган ҳақиқати» газетаси ҳар йили 35-50 миллион сўмга яқин маблағни тежаб қолмоқда. Мазкур маблағлар ҳисобидан таҳририятнинг моддий-техник базасини мус­таҳкамлаш, ходимларни рағбатлантиришга алоҳида эътибор қаратилмоқда.

Мамлакатимизда жур­налист­ларни, ижодкорларни қўл­лаб-қувватлашга қаратилган саъй-ҳаракатларни алоҳида таъкидлаш керак. Оммавий ахборот воситалари ходимлари ўртасида ўтказилаётган танловлар уларнинг кучига-куч, ғайратига-ғайрат қўшмоқда.

Хусусан, таҳририятимиз ходими Рихсихон Мажнунова «Олтин қалам» Х миллий мукофоти халқаро танлови ғолиби бўлди. Буни нафақат газетамиз, балки бутун вилоятимиз журналистларига кўрсатилган эътибор, деб билдик.

Умуман олганда, бугун Ўзбекистонда оммавий ахборот воситаларини ривожлантириш борасида амалга оширилаётган ишлар, соҳага кўрсатилаётган эътибор ҳақида узоқ гапириш мумкин. Олдимизда турган энг муҳим вазифа бу — бизга яратиб берилаётган шароит ва имкониятлардан тўлақонли фойдаланиш, зиммамизга юклатилган юксак масъулиятни шараф билан адо этишдир.

Президентимиз табрикда қайд этганидек, ҳозирги вақтда нафақат ҳаёт, балки инсоннинг ўзи, унинг ички дунёси, ҳаётга муносабати ва талаби ҳам тубдан ўзгармоқда. Ана шундай шароитда бугунги журналист, бугунги матбуотчи бу ҳақиқатни чуқур англаган тақдирдагина самарали фаолият кўрсата олиши мумкин...



DB query error.
Please try later.