27.06.2015

АЖАЛ УРУҒИ

1 тонна 400 килограмм наркотик модда ёқиб юборилди

Инсоният йигирманчи асрда жуда катта ютуқларга эришди. Оламшумул кашфиётлар қилинди. Инсон  қадами ойга етиб, космосни забт эта бошлади. Кўп дардларга даво топилди. Бироқ инсоният йигирманчи асрдан йигирма биринчи асрга ўзи билан гиёҳвандлик деган балони ҳам олиб ўтдики, бугунги кунда бу муаммо барчани бирдек ташвишга соляпти.

Бу офат миллат танламай, чегара билмай бутун ер юзини қамраб олди. Гиёҳвандлик бугун ҳудуд билмай, қитъалар ошмоқда, минг-минглаб кишилар умрига завол бўлмоқда. Гиёҳвандлик инсоният бошига солаётган фожиаларни санаб адоғига етиб бўлмайди.

Наркотик моддалар савдо-сотиғидан эса кимлардир катта манфаат кўрмоқда. Бу «бозор» орқасидан уюшган жиноятчилик «қувват» оляпти, терроризм «сув» ичяпти.

Айни пайтда республикамиз ҳуқуқни муҳофаза қилувчи органлари наркобизнес пайини қирқиш борасида жиддий ишларни олиб бормоқда. Маълумотларга кўра, 2014 йили Афғонистонда оз эмас, кўп эмас 6400 тонна опий ишлаб чиқарилган. Ўзбекистон ҳуқуқ-тартибот идоралари ўтган йили ҳам мамлакатимиз орқали олиб ўтилмоқчи бўлган жуда катта миқдордаги наркотик моддаларни ушлаб қолишди.

Куни кеча Ўзбекистон Республикаси Миллий хавфсизлик хизмати томонидан наркотик воситаларнинг навбатдаги партияси йўқ қилинди. Чет эллик кузатувчилар, хорижий ва маҳаллий оммавий ахборот воситалари ходимлари кўз ўнгида 1 тонна 400 килограмм наркотик воситалар ёқиб юборилди. Биринчи марта эса ёқиб юбориш йўли билан 1994 йилда 14 тонна наркотик модда йўқ қилинган. 1994 йилдан буён эса Ўзбекистон томонидан 54 тонна гиёҳвандлик воситаси йўқ қилинди. Республикамиз ҳуқуқни муҳофаза қилувчи органлари ходимлари бу заҳри қотилга қарши курашни кучайтириш бўйича зарур чораларни кўрмоқда.

Бироқ гиёҳвандлик балосига қарши бутун жамоатчилик биргаликда курашсагина кутилган мақсадга эришиш мумкин.

 

Равшан ШОДИЕВ,

«Ўзбекистон овози» мухбири.



DB query error.
Please try later.