06.06.2015

ИСТЕЪДОДЛАР КАШФ ЭТИЛДИ

Самарқандда Маданият ва спорт ишлари вазирлиги, Республика халқ ижодиёти ва маданий-маърифий ишлар илмий-методик маркази, Халқаро «Олтин мерос» хайрия жамғармаси, Республика «Тасвирий ойина» ижодий уюшмаси, Самар­қанд вилоят ҳокимлиги ҳамда Маданият ва спорт ишлари бошқармаси ҳамкорлигида «Ашула ва рақс ансамбллари» кўрик-танловининг иккинчи якуний босқичи ўтказилди.

Унда ҳудудий бос­қичларда ғолибликни қўлга киритган ўндан ортиқ ашула ва рақс ансамбли иштирок этди.

– Ҳар икки йилда бир маротаба ўтказиб келинаётган мазкур танлов аввалгиларидан фарқ қилади, – дейди ҳайъат раиси, Ўзбекистон Республикаси санъат арбоби, профессор Темур Маҳмудов. Ансамбллар танловга юқори савия­да тайёргарлик кўрган. Танланган асарлар ижро маҳорати ҳамда саҳна либослари билан чекланмаган, бошқа ҳолатларга ҳам эътибор берилган. Ғолиб жамоалар гала концертга тайёргарлик кўриш вақтида уларга мутахассислар томонидан мастер класс дарслари ўтилди, ўзаро тажриба алмашилди. Кўрик-танлов истеъдодли ёш санъаткорларни кашф этди.

Ҳусан Файзуллаев, Самар­қанд вилоят «Афросиёб» ашула ва рақс ансамбли бадиий раҳбари:

– Танловга мумтоз асарларимиздан «Насри уззол», «Ял-яли», «Хуш келибсиз«, маҳаллий бастакорларимиз асарларидан «Наргиз» қўшиқлари ҳамда «Роҳат» куйи рақсини тақдим этдик. Ашула ва рақс ансамбли фаолиятида ашулачилар, чолғучилар ва раққосалар бир-бирига уй­ғун ҳолда асарни томошабинга ҳавола этади. Биз асосий эътиборни шунга қаратдик ва танловда биринчи ўринни қўлга киритдик.        

Ҳакамлар ҳайъати қарорига кўра, Самарқанд вилоятининг «Афросиёб» ашула ва рақс халқ ансамбли биринчи ўринга сазовор бўлди. Қорақалпоғистон Республикасининг «Шуғла», Кармана туманининг «Гули» ашула ва рақс халқ ансамблларига иккинчи ўрин насиб этди. Учинчи ўринга Яккабоғ тумани «Дил навоси», Андижон шаҳри «Гулруҳ», Хива тумани «Хива нақшлари» ашула ва рақс халқ ансамбллари лойиқ деб топилди. Танлов якунида ғолиб ва совриндорлар ижросида гала-концерт бўлиб ўтди.

 

Аброр МЕЛИБОЕВ,

Республика халқ ижодиёти ва маданий-маърифий ишлар илмий-методик маркази бўлим мудири.



DB query error.
Please try later.