06.06.2015

XXI АСР — АХБОРОТ ТЕХНОЛОГИЯЛАРИ АСРИ

Тошкент ахборот технологиялари университетида Ахборот технологиялари ва коммуникация соҳасини ривожлантиришнинг долзарб масалаларига бағишланган илмий-амалий симпозиум ўтказилди.

— Президентимизнинг «Ахборот технологиялари соҳасида кадрлар тайёрлаш тизимини янада такомиллаштириш чора-тадбирлари тўғрисидаги» Қарори асосида мамлакатимизда ахборот технологиялари ва коммуникацияларини ҳар томонлама ривожлантириш, унинг ҳуқуқий тузилиши ва моддий-техник базасини такомиллаштиришга алоҳида эътибор қаратилмоқда, — дейди Ахборот технологиялари ва коммуникация­ларини ривожлантириш вазири Хуршид Мирзоҳидов. — Қарорга кўра, сўнгги икки йилда Тошкент ахборот технологиялари университети ҳамда унинг филиалларини моддий-техник базасини мус­таҳкамлаш, дарслар сифатини ошириш, замонавий ўқув хоналари ва лабораториялар билан таъминлаш юзасидан бир қатор ишлар амалга оширилди. Бунда хорижий ҳамкорларимиз томонидан кўрсатилган ёрдамни алоҳида таъкидлаш зарур. Таълимда замонавий технологияларни жорий этиш юзасидан турли ҳамкорлик шартномалари, келишувлар, меморандумлар имзоланди. Бугунги кунда ахборот технологиялари ривожланган 16 давлатнинг 20 дан зиёд турли илмий тадқиқот институтлари ва ўқув марказлари билан ҳамкорлик йўлга қўйилди.

— Мен 2013 йилдан бошлаб Ўзбекистонда ишлаб келмоқдаман, — дейди  Ахборот технологиялари ва коммуникацияларини ривожлантириш вазирининг ўринбосари-АКТ бўйича маслаҳатчи Ким Нам Сок. Бугунги кунда электрон ҳукумат ҳаётимизга кириб келди. Бунда давлат органларида амалга ошириладиган барча ишларда ахборот технологиялари жорий қилинади. Яъни, давлат органларидаги иш жараёнлари электрон кўринишга ўтади. Буни амалга татбиқ этилиши натижасида нафақат фуқаролар ҳаётида, балки юридик шахс­лар фаолиятида ҳам сезиларли ўзгаришлар бўлади.

Ҳар қандай фуқаро ёки тадбиркор барибир давлат органларига мурожаат қилишига тўғри келади. Электрон ҳукумат мавжуд бўлмаган ҳолатда фуқаро ва тадбиркорлар тўғридан-тўғри келиб учрашадилар. Электрон ҳукумат ишга тушганидан кейин бу каби оворагарчиликларнинг олди олинади. Мурожаат қилиш истагида бўлганлар электрон шаклда, яъни интернет орқали, ўз уйи ёки офисида туриб бу ишни амалга оширишлари мумкин бўлади.

Статистик маълумотларга кўра, Кореяда электрон ҳукумат жорий этилгунга қадар фуқаролар бир йилда ўртача ҳисобда ўн марта давлат органларига мурожаат қи­­л­ишган. Агар бунинг молиявий томонини ҳисобга оладиган бўлсак, бир марта келиб-кетиш 10 долларга тушади. Корея Республикасида 50 миллион аҳоли бор. Умумий ҳисобда улар йил давомида давлат органларига бориш учун 5 миллиард доллар сарф­лашган. Электрон ҳукумат жорий қилингандан ке­йин аҳолининг давлат органларига ташрифи 90 фоизга қисқарди. Яъни, фуқаролар бу идораларга бир йилда бир мартагина борадиган бўлишди. Энди шу орқали қанча маблағ тежаб қолинганини ҳисоблаб кўраверинг.

Кореяда паспорт олиш учун илгари бир неча давлат органларидан маълумотномалар олишга тўғри келарди. Буларнинг ҳаммасини тўплаш учун 3-4 кун вақт кетган. Эндиликда паспорт олиш учун фақат ариза ва сурат топширилади. Қолган ҳужжатларни паспорт беришга масъул бўлган шахснинг ўзи электрон тизим орқали йиғади. Бу мисоллар электрон ҳукумат бизнинг ҳаётимизни қай даражада енгиллаштиришини кўрсатиб турибди.

— Тошкентда икки йилдан бери ишлаётган бўлсам, ўтган давр мобайнида университет жамоаси билан бир қатор ишларни амалга оширдик, — дейди Тошкент ахборот технологиялари университети проректори, ахборот технологиялари бўйича консультант Ли Чул Су. — Энг асосий ишлардан бири сифатида университетнинг ўқув тизимини жаҳоннинг нуфузли олий ўқув юртларига мос равишда такомиллаштирганимизни айтиш жоиз. Бунда нафақат янги фанлар киритдик, балки мавжудларини халқаро талаблар асосида қайта ишладик. Университетимиз ўқитувчиларини хориж давлатларига малака ошириш учун юбордик. Улар ўз билимларини ошириб келиш ҳисобига  талабаларга жаҳон стандартлари асосида таълим бера бошлади.

Дунёнинг ривожланган мамлакатларидаги олий ўқув юртларида кредит тизимига асос солинган. Кредит — талабани баҳолаш тизими бўлиб, талабанинг профессор ўқитувчи билан бирга сарфлаган соатига нисбатан аниқланади. Бир семестрда 16 ҳафта бор. Ҳар ҳафтада бир соат дарс ажратилади. Айнан шу бир кредитли фан ҳисобланади.

Бу тизимнинг муҳим жиҳати шундаки, унда талабаларни баҳолашда бешта тамойилга амал қилинади. Ўзлаштирилган фоизга қараб баҳо қўйилади. Бу жараёнда ҳаммаси ўқитувчи ва талабалар учун очиқ-ойдин бўлади. Статистик маълумотларни ўрганганимизда, жаҳоннинг 80 фоиз мамлакатида айнан кредит тизими жорий қилинганига амин бўлдик.

— Биз дунёнинг кўплаб мамлакатларида бўлиб у ердаги таълим тизимини, ўргандик, — дейди мазкур университетнинг менежмент ва маркетинг кафедраси ассистенти Дилшода Ғафурова. — Жумладан, Корея Республикасининг Ёнг­нам университетида бўлдик. Мазкур университет 15 та филиали, 44 та илмий тадқиқот институтлари, 2 та мустақил таълим институтлари ва 68 та бакалавр тайёрлайдиган кафедралардан ташкил топган. Ўқув жараёнида LMS тизимидан фойдаланилади. LMS – Learning management system — таълимни бошқариш тизими ҳисобланади. Тизимнинг асосий вазифалари талабалар томонидан тайёрланган тақдимотларни, материалларни тезкорлик билан етказиб бериш, талабаларни рўйхатдан ўтказиш ва бош­қариш, мутахассисликка тайёрлашни бош­қариш, ўқув режаси ва сертификатлаш менежментини такомиллаштириш, қобилият ва малакани аниқлаш, шахсий ривожлантириш режасини ишлаб чиқиш, қилинган ишлар ҳисоботини топшириш...

Тадбир давомида Кореянинг KAIST институти, Cung-Ang, Inha ва Kyung Hee университетларидаги таълим тизими, яратилган шароитлар ҳақида маърузалар тингланди. Иштирокчиларни қизиқтирган саволларга жавоб берилди.

 

Темур АЪЗАМ,

«Ўзбекистон овози» мухбири.



DB query error.
Please try later.