02.06.2015

ҚОРАҚАЛПОҒИСТОНЛИК ИҚТИДОРЛИ ЁШЛАР

ЎзХДП сафида бўлишни исташмоқда

Турли соҳаларда ютуқларга эришиб, маррани баланд олаётган кўплаб ёшлар ЎзХДП сафига қўшилиш ниятини билдиришмоқда. Хўш, фаол ва зукко ёшлар нега айнан бизнинг пар­тиямизни танламоқда?

Абдикамал Заримбетов, Бердақ номидаги Қорақалпоқ давлат университети магистри, Навоий стипендия­си соҳиби:

— Оммавий ахборот воситалари орқали доимо ЎзХДП фаолиятини кузатиб бораман. Яқинда менда партия ҳақида кўпроқ маълумотга эга бўлиш истаги пайдо бўлди. Унинг дастури билан қайта танишар эканман, жамиятнинг барча қатламларига эркин ва тенг таълим олиш имкониятларини яратиш мақсадида илгари сураётган ғоялари эътиборимни тортди. Минтақалардаги демографик ўзгаришларни ҳисобга олган ҳолда, мактабгача, ўрта, ўрта-махсус ва олий таълим муассасаларини олдиндан барпо этиш амалиётини янада ривожлантириш, бепул ва имтиёзли тарзда фаолият кўрсатадиган мактабгача таълим давлат муассасалари тармоғини кенгайтириш каби вазифалар  катта таассурот уйғотди.

Таълим тизимига оид 20 дан ортиқ халқаро ва республика даражасидаги илмий-амалий конференцияларда ўз маърузаларим билан иштирок этдим. Таълимни ривожлантириш мамлакат тараққиётини юксалтиришда, халқнинг маданияти ва турмуш фаровонлигини оширишда муҳим аҳамиятга эга, деб ҳисоблайман. Таълим тизимида замонавий ислоҳотлар амалга оширилишини қўллаб-қувватлайман. Шунинг учун ЎзХДПни танладим.

Келажакдаги мақсадим ўз соҳамни чуқур эгаллаб, етук мутахассис бўлиб етишишдир. Партиямиз таркибида иқтидорли ёшлар сафи янада кенгаяди, деган умиддаман.

Алтинай Тлегенова, Бердақ номидаги Қорақалпоқ давлат университети талабаси, Республика фан олимпиадаси ғолиби:

— 2014 йил тест имтиҳонларисиз олий таълим муассасасига ўқишга қабул қилиндим. Бизга шундай имкониятлар яратилган экан, улардан, албатта, фойдаланишимиз, ҳар томонлама фаоллигимизни кўрсатишимиз керак. Мен ҳам сиёсий билимларимни янада чуқурлаштириб, фуқаролик позициямни мустаҳкамламоқчиман. Шунинг учун мамлакатимизда фаолият кўрсатаётган сиёсий партиялардан бирига аъзо бўлишга аҳд қилдим. Ҳамма партия дастурлари билан танишиб чиқдим.

Мулкчиликнинг барча шаклларидаги корхона ва ташкилотларнинг эҳтиёжига кўра, кадр­лар тайёрлаш, бунинг учун олий ўқув юртларига грантлар ажратилишини қўшимча рағбатлантириш таклифи ЎзХДП дастуридан ўрин олган экан. Имконияти чекланган болаларни махсус адабиёт ва қўлланмалар билан таъминлашни ўз ичига олган ин­клюзив таълимни янада ривожлантириш, соҳа ўқитувчиларига имтиёзлар жорий этиш, жисмоний имконияти чекланган талабаларнинг олий ўқув юртларида таълим олиш имтиёзларини кенгайтиришга қаратилган ғоялар ЎзХДПни танлашимга туртки бўлди.

Парахат Қозоқбоев, Бердақ номидаги Қорақалпоқ давлат университети талабаси, Республика фан олимпиадаси ғолиби:

— ЎзХДП ёшлар сиёсати билан боғлиқ кўплаб лойиҳаларни амалга оширмоқда. Масалан, «Коллеждан — корхонага», «Ёш сиёсатчи», «Агар мен депутат бўлсам», «Бугунги талаба — эртанги мутахассис» каби лойи­ҳалар йигит-қизлар ҳаётда ўз ўрнини топишида муҳим аҳамият касб этмоқда.

Ўтган йили «Ёш сиёсатчи» кўрик-танловининг Қорақалпоғистон Республика босқичида томошабин сифатида қатнашган эдим. Бу йил унда ўзим иштирок этдим. Танловда қатнашиш жараёнида партия ҳақида маълумотим янада бойиди. ЎзХДПга бўлган қизиқишим ортди. «Истиқбол» ёшлар қаноти қошидаги «Ёш сиёсатчилар» клуби аъзолари билан дўстлашдим, уларнинг сафида бўлишга қарор қилдим.

 

Хурлиман НУРЖАНОВА,

Зулайхо АРТИКОВА.



DB query error.
Please try later.