Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
21.04.2015

НИГОҲЛАРДА ҲАЙРАТ ЖИЛОСИ

Дунёда болаларга қувонч улашиш завқидек юксак туйғу бўлмаса керак. Мурғак қалблардаги, ҳайрат тўла кўзлардаги шодлик ҳар бир  кишига ҳузур бахш этади. Шундай пайтларда биз катта ёшдагилар ҳам болалардек қувонамиз...

Пойтахтимиздаги Ғафур Ғулом номидаги маданият ва истироҳат боғи байрамона безатилган. Эрталабдан янграган карнай-сурнай садолари барча-барчани ўзига чорлайди.

Боғ ота-оналари, бувижонлари билан келаётган жажжи болакайлар билан гавжумлаша бошлади. Турли аттракционлар, ўйин майдончалари, ранг-баранг арғимчоқлар, эртак қаҳрамонлари — Качалполвон, Зумрад, қуёнвой ва айиқвойлар болажонларни кутишмоқда. Боғ майдонининг ҳар томони, муз­қаймоқ ва яхна ичимликлар, турли ширинликлар билан тўла.

Ёзги мавсум очилишига бағишланган байрам тантаналари бошланиб, бир зумда бутун боғни болаларнинг қийқириғи тутди.

— Паркент туманидан атайлаб ўғлимни олиб келдим, – дейди ўзини Гулмира Ёқубова деб таништирган аёл. — Бу боғда болаларга яратилган шарт-шароитлардан жуда қувондик.

Аёлнинг фарзандини суҳбатга тортдик.

— Исмим Умиджон, 8 ёшдаман, — дейди у. — Ар­ғимчоқларда учдим. Эртак қаҳрамонлари билан гаплашдим, бирга расмга ҳам тушдик...

Ғафур Ғулом номидаги маданият ва истироҳат боғида ёз мавсумига катта тайёргарлик кўрилганлиги яққол сезилиб турибди. Майдони 22 гектарга тенг масканга мавсум очилишига қадар, яна саккизта янги замонавий аттракцион ўрнатилди. Айни вақтда уларнинг сони жа­ми 70 тага етди. Ат­тракционлар оралиғига махсус янги йўлаклар қу­рилган. Мавжудлари эса қайта таъмирланган. Муҳими, 2 та сув ҳавзаси санитария ҳо­лат­ларига тўлиқ жавоб беради. Хавфсизлик масалаларига ҳам алоҳида ёндошилган. Тегишли нуқталарда махсус кузатув камералари ўрнатилган бў­либ, 2 та тиббий шохобча очилди.

— Азалдан болажон халқмиз, — деди боғнинг матбуот хизмати котибаси Одинахон Холиқова. — Мавсум очилишида уларни иложи борича хушнуд қилишга ҳаракат қилаяпмиз. Ҳар мавсумнинг очилиши ўзига хос бўлишига интиламиз, режаларимизни янгилаб борамиз. Масалан, ўтган йили пойтахтимиз маҳаллаларидаги кам таъминланган, боқувчисини йўқотган оилалар фарзандлари, Меҳрибонлик уйи тарбия­ланувчилари учун ўтказилган хайрия тадбирларида ўн минг нафарга яқин болажон иштирок этганди. Бу йил эса уларнинг сони ўн икки минг нафардан ҳам ошади. Спортнинг бешта тури бўйича бепул тўгараклар ташкил этдик. Турли спорт мусобақалари уюштириб, ғолибларга махсус сов­ғаларимизни ҳам топширамиз. Кексаларимиз учун ҳар шанба ва якшанба кунлари «Мусиқа даврага чорлайди», деб номланган дастурлар тайёрлаганмиз.

Суҳбатимизга меҳнат фахрийси Ҳикматилла Эшов қўшилди.

— Боғда ўйнаб юрган болакайларни кўриб, ўзим ҳам болага ўхшаб қолдим, — дейди у. — Невараларим турли аттракционларда учиб, мазза қилишяпти. Болаларнинг мана шу беғубор кулгусини кўриб, ҳар бир ота-онанинг кўкси қувончга тўлади.

— Ёшимиз улғайиб борар экан, беғубор болалигимизни тез-тез соғиниб турамиз, — дейди ЎзХДП аъзоси ­Покиза Иноғомова. — Бугун мана шу боғга келган ҳар бир ота-она фарзандининг шўх-шодон кулгуларида ўзининг беғубор болалигини кўради, бугун мамлакатимизда яратилган бундай шароитларни кўриб ғурурланади, шу бахтли, саодатли кунларга шукронанинг қилади.

Боғнинг марказидаги саҳнада куй-қўшиқ янграйди. Боғ қошида ташкил этилган «Улуғ­бек юлдузлари» бадиий дастаси хонандалари, «Дурдона» фольклор-этнографик гуруҳи, «Жайхун» қўғирчоқ театри артистларининг ранг-баранг дас­турлари томошабинларга ҳақиқий байрам кайфиятини бағишлади.

Эрта тонгдан бошланган қизиқарли томоша ва дастурлар кечга қадар давом этди. Болажонлар қалбидаги шодлик нашидасини шомнинг салқин ҳавоси ҳам сўндира олмади. Кичкинтойлар қувончидан тун ҳам чекингандек бўлди, назаримизда...

 

Озода БЕКМУРОДОВА,

Абдусалим МАҲМУДОВ,

«Ўзбекистон овози» мухбирлари.



DB query error.
Please try later.