Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2019   
Du Se Cho Pa Ju Sha Ya
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5
09.04.2015

ОШ ТУЗИ, АЛБАТТА, ЙОДЛАНИШИ КЕРАК

Шуҳрат ТУРСУНБОЕВ, Олий Мажлис Қонунчилик палатасидаги ЎзХДП фракцияси аъзоси, Фан, таълим, маданият ва спорт масалалари қўмитаси раиси ўринбосари:

— Олий Мажлис Қонунчилик палатасида «Йод етишмаслиги касалликлари профилактикаси тўғрисида»ги Ўзбекистон Республикаси Қонунига ўзгартишлар киритиш ҳақида»ги қонун лойиҳаси иккинчи ўқишда муҳокамадан ўтди.

Маълумки, йод танқислиги касаллиги дунёдаги кўплаб давлатлар учун соғ­лиқни сақлаш соҳасидаги энг долзарб масалалардан биридир. Бутунжаҳон Соғ­лиқни сақлаш ташкилоти маълумотларига кўра, ер сайёрасининг учдан бир қисмида мазкур касалликнинг ривожланиш хавфи мавжуд. Дунё миқёсида 700 миллиондан ортиқ кишида йод танқислиги, 50 миллион кишида эса бу касаллик туфайли ақлий заифлик кузатиляпти. Мазкур қонун лойиҳаси бу борадаги айрим масалаларни бартараф этишни назарда тутади.

Унга кўра, йодланган ош тузи истеъмол қилиш тиббий жиҳатдан ёки бошқа жиҳатдан тўғри келмайдиган шахслар учун йодланмаган туз олиш имконияти Ўзбекистон Республикаси Вазирлар Маҳкамаси томонидан белгиланган тартибда таъминланиши тўғрисидаги меъёр бекор қилинмоқда. Шунингдек, республикамизда ишлаб чиқариладиган ва реализация қилинадиган ош тузи, албатта, йодланиши кераклиги тўғ­рисидаги меъёр қатъий қилиб белгиланмоқда.

Маълумот ўрнида айтиш керакки, бугунги кунда Республикамизда 123 та йодланган ош тузи ишлаб чиқариш ва қадоқлаш корхонаси рўйхатга олинган. Ўзбекистон давлат стандарти техникавий шартларига кўра, бир тонна ош тузини йодлаш учун 67,5 грамм йодат калийси қўшилади. Соҳа мутахассисларининг маълумотларига қараганда, агар ҳар бир одам кунига ўртача 5 грамм ош тузи истеъмол қилишини назарда тутсак, йодланган ош тузи истеъмол қилиш натижасида у кунига 200 мкг йод қабул қилади. Бу халқаро ташкилотлар тавсия этган энг мақбул миқдор ҳисобланади.

Қонунчилигимизда йодланмаган ош тузини ишлаб чиқариш тақиқланмагани натижасида истеъмол бозорида турлича сифатдаги ош тузини учратиш мумкин. Айни шу камчиликни бартараф этиш мақсадида қонунчиликка ош тузи фақат йодланган  бўлиши зарурлиги тўғрисидаги қоида киритиляпти. Бу йод етишмовчилиги касалликларининг олдини олишда муҳим аҳамиятга эга.

Қонунга тегишли ўзгартишлар киритилиши билан ташкилий-ҳуқуқий масалалар ҳал этилади. Лекин оилада, иш жойларида, тиббиёт, таълим муассасалари, умумий овқатланиш жойларида, озиқ-овқат саноатида фақат сифатли йодланган ош тузидан фойдаланишни тарғиб этиш, бу борада кенг жамоатчилик назоратини изчил йўлга қўйиш депутатлар зиммасидаги долзарб вазифалардан бири бўлиб қолаверади. Бу жараёнда, айниқса, Ўзбекистон Халқ демократик пар­тия­си фракцияси, маҳаллий Кенгашлардаги партия­миз гуруҳлари фаол иштирок этиши керак. Чунки аҳоли саломатлигини муҳофаза қилиш, соғлом ва баркамол авлодни тарбиялаш масалалари партиямиз дас­туридаги устувор йўналишлардан саналади. 


Фикр ва мулохазалар

Защита от автоматических сообщений

Сўнгги янгиликлар: