07.04.2015

ҲАБИБ САЪДУЛЛА КУНЛАРИ

Ҳар йили Наманганда апрель ойининг биринчи ҳафтаси ­Ўзбекистон халқ шоири, Ўзбекистон Давлат мукофоти соҳиби, ЎзХДП аъзоси Ҳабиб Саъдулла хотирасига бағишланган адабиёт, маънавият байрами бўлиб ўтади.

«Истиқлол куйчиси», «Гўзаллик ва муҳаббат куйчиси» мавзуларида жойларда маънавий-маърифий  анжуманлар ташкил этилди. Байрам тадбирлари шоир таълим олган Наманган шаҳридаги 5-умумтаълим мактабидан бошланди. Таниқли шоирлар Зиёвиддин Мансур, Дилбар Бону тадбир иштирокчиларига устоз адибнинг ўзига хос фазилатлари, серқирра ижоди ва унинг аҳамияти ҳақида ҳикоя қилишди.

Вилоят ўлкани ўрганиш музейининг анжуманлар зали  Ҳабиб Саъдулланинг оила аъзолари, шогирдлари ва мухлислари билан гавжум бўлди. Адабий гурунгда вилоят маданият ва спорт ишлари бошқармаси бошлиғининг ўринбосари Озодахон Усмонова, таниқли ижодкорлар Рустамжон Умматов, Нурилло ­Аббосхон, Иброҳим Маҳкам, Ёзувчилар уюшмаси вилоят бўлими раҳбари Жамолиддин Муслим Ҳабиб шоирнинг Наманган адабий муҳитида тутган ўрни, юксак инсоний фазилатлари хусусида ўз таассуротларини гапириб, шеърларидан намуналар ўқиб беришди.

Таниқли хонандалар Ҳамиджон Маллабоев, Абдуқаҳҳор Нишонов ижросида янграган шоир ғазаллари билан айтилувчи мумтоз қўшиқлар адабий гурунгни бойитди.

Устоз шоирнинг қизи Саидахон ­Саъдуллаева Ҳабиб Саъдулланинг оилада, маҳаллада тутган ўрни, шахсий фазилатларини ёдга олиб, хотира тадбирларини ташкил этиш билан унинг руҳини шод этаётган мутасаддиларга ташаккур изҳор қилди.

Нодира номидаги ахборот кутубхона марказида бўлиб ўтган анжуманда Наманган миллий ҳунармандчилик ва дизайн  коллежи ўқитувчи ва талабалари, энг фаол китобхонлар иштирок этишди.

— 28 йилдан буён мазкур кутубхонага келаман, — деди Мамадали ота ­Нишонов. — Энг фаол китобхонлар сафида борлигимдан фахрланаман. Бугунги анжуманда Ҳабиб ­Саъдулла билан бир қаторда Нуриддин ­Бобохўжаев, Шўҳий, Азиз Турсун, ­Абдулла Жаббор сингари олим адибларимизнинг эътироф этилгани, Камолиддин Раҳимов, Ўринбой Нуралиев каби санъаткорларнинг номлари ҳам тилга олиниши мени ҳаяжонга солди.

 

Носиржон ДЕҲҚОНОВ



DB query error.
Please try later.