Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2019   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
07.04.2015

ФАРҒОНАДА КАТТА ФУТБОЛ БАЙРАМИ

Янги барпо этилган «Истиқлол» стадионида дастлабки халқаро ўйин ўтказилди

Тўғриси, фарғоналик мухлислар шу пайтгача бундай ҳаяжонли, қувончли катта футбол байрамини кўришмаган эди. Бир томондан янги, замонавий стадион мухлисларга катта шодлик улашса, иккинчидан, халқаро ўйин шукуҳи ҳаммани ҳаяжонга соларди.

Фарғона шаҳрини қайта қуришнинг кенг кўламли дас­тури асосида шаҳарнинг янгитдан барпо этилган ҳал­қа йўли ёқасида 20 минг ўринли халқаро талабларга жавоб берадиган муҳташам ўйингоҳ фойдаланишга топширилди. Янги стадионда эса биринчи ўйин — Ўзбекистон ва Янги Зеландия ёшлар терма жамоалари ўртасида ўртоқлик учрашуви бўлиб ўтди. Бу кун нафақат Фарғона, балки бутун водийлик футбол ишқибозлари учун ҳақиқий байрамга айланиб кетди. Эрталаб аэропортга қўн­ган самолётда Ўзбекистон футбол федерацияси президенти Мираброр Усмонов бошчилигида мамлакат футболи фахрийлари учиб келди. Фахрийлар ва икки мамлакат футболчилари биргаликда «Истиқлол» стадионига туташ футбол академияси, унинг тарбияланувчилари учун яратилган шарт-шароитлар билан танишдилар.

— Мен нафақат Ўзбекистонда, балки бир қатор чет давлатлардаги футбол академиялари иши билан танишман. Лекин Фарғонада кўрганимиз барчани ҳайратга солди. Чунки бу қадар мукаммал иншоотлар мажмуаси, машқ учун ўқув футбол майдонлари уйғунлиги, инфратузилма ва ҳатто логистик имкониятларни бошқа ерда учратмаганман, — дейди футболимиз фахрийси, собиқ пахтакорчи Тўлаган Исоқов.

Мамлакат футбол фахрийлари шу куни Фарғона шаҳридаги бунёдкорлик ишлари билан ҳам танишдилар. Янгитдан қад ростлаган ижтимоий иншоотлар, уй-жой мавзелари, минг ўринли муҳташам санъат саройи, сув спорти саройи, хиёбонлар...

«Истиқлол» стадионида битта ҳам бўш жой қолмади. Ўйин арафасида санъат усталарининг чиқиши бўлди. Вилоят ҳокими Шуҳрат Ғаниев меҳмонлар, футболчилар ва мухлисларни катта футбол байрами билан табриклади.

Икки мамлакат мадҳия­лари янграгач, ҳакам ўйинни бошлашга рухсат берди. Ўзбекистон ёшлар терма жамоаси аъзолари даст­лабки дақиқаларданоқ вазиятни ўз қўлларига олишди. Ўнинчи дақиқада Забиҳулло Ўринбоев йигирма беш метрлар чамаси узоқдан тепган тўп дарвоза тўсинига тегар-тегмай ўтиб кетди. Стадион ларзага келди... Йигирма минг мухлис «тўл­қин» ҳосил қилиб, «Ўзбекистон, Ўзбекистон!» дея ҳайқирар эди. Томошабинларнинг бундай олқишидан руҳланган футболчиларимиз рақибга босимни кучайтирди. Майдон марказида тўпни эгаллаган Жавоҳир Соҳибов ва Забиҳулло Ўринбоевлар рақибларни чапдастлик билан алдаб ўтиб, бир-бирларини олдинга бошлашди ва ниҳоят комбинация гол билан якунланди — 1:0. Гол муаллифи — Жавоҳир Соҳибов.

— Фарғонадаги «Истиқлол» стадиони Европа мамлакатларидаги машҳур стадионлардан қо­лиш­майди, — дейди меҳмонлар мураббийи Деррен Базили. — Айниқса, майдоннинг ҳолати ҳавас қилгудек. Яна бир гапни айт­моқчиман. Мен Фар­ғонада футболнинг ҳақиқий мухлисларини кўр­дим. Биз чиройли комбинациялар кўрсатганимизда ҳам улар олқишларини аямадилар.

— Бош мураббий Равшан Ҳайдаров жуда ҳамжиҳат жамоани ташкил қила олибди, — дейди мухлис Раҳим Эсонов. — Бу ёшлар келажакда миллий терма жамоа таркибидан жой олишади, албатта. Бугун эса чиройли ўйин, катта футбол байрами учун футболчи ёшларимизга, Ўзбекистон футбол федерациясига ўз миннатдорчилигимизни билдирамиз.

 

Муҳаммаджон ОБИДОВ,

«Ўзбекистон овози» мухбири.



DB query error.
Please try later.