Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
04.04.2015

МУРОЖААТЛАР ҲАЛ ЭТИЛМОҚДА

ЎзХДП Наманган вилоят кенгашидаги ­Жамоатчилик қабулхонасига 2014 йил мобайнида фуқаролардан жами 495 та ёзма ва оғзаки мурожаат тушган. Уларнинг 85 фоизи ижобий ҳал этилган. Қолганлари бўйича ҳуқуқий маслаҳатлар берилган, тегишли тартибда чора-тадбирлар кўрилган.

Вилоят партия кенгаши биносига биз билан изма-из кириб келган аёлнинг Жамоатчилик қабулхонасини сўраётганини эшитиб қолдим.

Шу пайт қабулхона масъул ходими Феруза ­Абдураҳмонова бизга пешвоз чиқди. У Жамоатчилик қабулхонаси фаолиятига доир маълумотларни бизга тақдим қилди-да, узр сўраб, аёлга юзланди. Беихтиёр уларнинг суҳбатига қулоқ тутдим.

— Ўғлим мактабдан кейин маълум сабаблар билан ўқишни давом эттиролмади. Бунга ҳам бир неча йил бўлди. Ҳозир устачилик қилади. Унга муқим иш жойи топишда қийналяпмиз. Шу масалада ёрдам сўраб келгандим.

Чортоқ туманининг Ойқирон қишлоғидан келган, ўзини Тамара Ўринбоева деб таништирган аёл билан астойдил суҳбатлашгач, Феруза мурожаатни расмийлаштиришга киришди.

— Мурожаатингизни қайд қилдим. Ҳуқуқшунослар, депутатлар билан маслаҳатлашиб, сизга, албатта, ёрдам берамиз. Лекин ўзингизнинг тобингиз йўқ кўринади. Бетобга ўхшайсиз?

— Ҳа, бўғимларим оғрийди. Бир-икки даволандим. Лекин бошқа ташвишлар билан бўлиб, муолажаларни давом эттиролмадим.

Хуллас, Тамара Ўринбоеванинг соғлиғи бўйича мурожаати ҳам алоҳида расмийлаштирилди.

Орадан икки кун ўтгач, Феруза билан телефонда гаплашдим.

— Тамара Ўринбоеванинг иши бўйича вилоят Кенгаши депутати Луқмонжон Дадабоевга  мурожаат қилгандик. У вилоят соғлиқни сақлаш бошқармасига депутат сўрови юборган экан. Ҳозир Тамара опа вилоят кўп тармоқли тиббиёт марказининг ревматология бўлимига имтиёзли  даволаниш учун ётқизилди.

Жамоатчилик қабулхонасига иккинчи бор келганимизда, Феруза Абдураҳмонова янгиқўрғонлик Роҳатхон Норбоеванинг бандлик масаласидаги мурожаати билан «Намимпекстекстил» корхонасига кетган экан. Бир соатлар вақт ўтгач, у яна қабулхонада ҳозир бўлди.

— Мурожаат ижобий ҳал этилди. Роҳатхон корхонага синов муддати билан  ишга қабул қилинди, — деди у қониқиш билан.

Айни пайтда Роҳатхон Норбоева корхонада йигирув оператори. ЎзХДПга аъзо бўлиш учун ариза берган.

Феруза Абдураҳмонованинг маълумот беришича, қабулхонага жорий йилнинг март ойида 137 мурожаат бўлган. Уларда кўтарилган масалалар бўйича соғ­лиқни сақлаш, халқ таълими, адлия бош­қармалари, «Камолот» ЁИҲ вилоят кенгаши, депутатлар ҳамда тегишли корхона-ташкилотларга хатлар юборилиб, натижа ва ечимлар назоратга олинган.

— Назоратга олинган масалалардан кутилаётган натижалар ёмон эмас. Фақат ҳамма мурожаат ҳам маълум сабабларга, аниқроғи, қонуний тартибларга кўра тезда ечим топавермайди. Бунинг учун вақт, сабр ва астойдил ҳаракат керак, — дейди у.

ЎзХДП Наманган вилоят кенгаши қошидаги Жамоатчилик қабулхонасига муқим иш ўрнига эга бўлган, соғлиғини тиклаган, банкдан кредит олишга эришган кўплаб юртдошларимизнинг миннатдорлик хатлари келган экан. Улар билан танишгач, бошқа мурожаатлар ҳам эътиборсиз қолмаслигига ишончимиз ошди.

 

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.