04.04.2015

ЕНГИЛМАС САРКАРДА

Ички ишлар вазирлиги Академиясида Амир ­Темур таваллуд кунига бағишланган «Амир Темур – улуғ давлат арбоби, бунёдкор, илм-фан ҳомийси ва буюк саркарда» мавзусида илмий-маърифий анжуман бўлиб ўтди.

Анжуманни Академия бошлиғининг ўринбосари, подполковник Тоҳир Азимов очиб, буюк бобокалонимиз таваллуд топган сана муносабати билан мазкур ўқув даргоҳида олиб борилаётган тадбирлар тўғрисида маълумот берди.

Ёзувчилар уюшмаси раиси, Ўзбекистон халқ ёзувчиси Муҳаммад Али сўзга чиқиб, Соҳибқирон Амир Темурнинг бунёдкорлик ишлари, олиму уламоларни илм-фан ҳомийси сифатида ўз атрофига бирлаштиргани, улар кўмагида давлат ишларини оқилона бош­қарганини таъкидлаб ўтди.

— Америкада дунё бўйича тўртта саркардани тенг қўйишади, — деди Муҳаммад Али. — Шулардан бири буюк бобокалонимиз Амир Темур ҳисобланади. Чунки у амирлар, беклар бир-бири билан аёвсиз курашаётган мураккаб шароитда пароканда мамлакатни бирлаштириб, улкан давлат тузди.

Амир Темур салтанатни бош­қарган йиллар мобайнида мамлакатда саройлар, кўприклар, мадрасалар, шифохоналар, боғлар барпо қилинди. 

Мана, ҳозир ҳам орадан қарийб 700 йил ўтган бўлса-да, юртимизга дунёнинг турли мамлакатларидан келган сайёҳлар Соҳибқирон бобомиз саъй-ҳаракати билан бун­ёд этилган муҳташам саройларни, мадрасаю бошқа обидаларни кўриб ҳайратга тушишяпти. Бу биз учун катта шараф.

Муҳаммад Али сўзининг якунида Соҳибқирон таваллуд айёмига бағишлаб ёзган «Исмим Темурбекдир — Темурбек сўзим...» деб номланган монологини ўқиб берди.

Филология фанлари номзоди, доцент Адҳамбек Алимбеков ўз маърузасида Ўзбекистон халқ ёзувчиси Муҳаммад Али томонидан Амир Темур фаолиятига бағишлаб ёзилган ва яқинда чоп этилган «Улуғ салтанат» номли тўрт томлик эпопеядан ўрин олган асарлар ҳақида ўз фикр-мулоҳазаларини билдирди.

Анжуман давомида Ўзбек Миллий академик драма театри артистлари ижросида спектакллардан парчалар ва концерт дастури намойиш этилди.

 

Нуруллоҳ ДОСТОН

 



DB query error.
Please try later.