02.04.2015

«КЕЛГУСИ МАШҒУЛОТНИ КУТАМАН...»

Фарғона вилоят партия кенгаши ўтказаётган сиёсий ўқувларда асосий эътибор ЎзХДП мафкураси, дастурий мақсад ва вазифалари тар­ғиботига қаратилмоқда.

«Истиқбол» ёшлар қаноти бўлими ташкил этаётган ўқувларда сиёсий технологиялардан кенг фойдаланишга, мавзунинг таҳлилий жиҳатларига алоҳида эътибор қаратилаётгани, айниқса, яхши самара бермоқда. Тадбирлар баҳс-мунозараларга бой ўтмоқда, ёшларда эркин фикрлаш, воқелик ва ғояларга шахсий муносабат билдира олиш кўникмаси тобора кучайиб боряпти.

Ана шундай ўқувларнинг бири Тошкент ахборот технологиялари университетининг Фарғона филиали талабалари, ёш ўқитувчилар, партия фахрийлари иштирокида ўтказилди.

— Бугунги ўқувимизда аввалдан тайинланган маъруза ҳам, маърузачи ҳам йўқ. Фақат мавзуни танладик, — дея машғулотни бошлади «Истиқбол» ёшлар қаноти Фарғона вилоят бўлими етакчиси Шоҳрух Ўктамов. — Биз вилоятимизни ижтимоий-иқтисодий ривожлантириш бўйича амалга оширилаётган ишларни муҳокама этамиз. Фикр-лаш учун беш дақиқа вақт ажратилади.

Ахборот-маърифат хонаси бирдан жонланиб кетди. Ўқув иштирокчилари — ёшлар бир-бирлари билан маслаҳатлашишга, ўз хулосаларига ҳамфикрлар топишга киришди.

— Биз бу мавзуни тўсатдан эълон қилмадик, — дейди Шоҳруҳ Ўктамов. — Аввалги машғулотда иштирокчилар мавзуга оид видеолавҳалар билан таништирилган. Ёшларимиз шу асосда вилоятимиздаги кўрсаткичлар, эришилган натижалар ҳақида фикр юритиши керак.

Ўқув жараёнини кузатиш, ёшлар жавоби, уларнинг фикр-мулоҳазаларини таҳлил қилиш, муносабат билдириш учун халқ депутатлари вилоят Кенгашидаги ЎзХДП гуруҳи аъзоси, «Нуроний» жамғармаси вилоят бўлими кенгаши раиси Топволди Холдоров таклиф этилганди.

— Очиғи, сиёсий ўқув бундай ўзига хос усулда олиб борилишини кутмагандим, — дейди у. — Ёшларни қаранг, тезда бир неча гуруҳларга бўлиниб, бир-бирлари билан баҳслашиб, фикрлашиб, ижодий изланиш­япти. Энди менга ҳам тайёрлаб келган маърузам керак бўлмай қолди. Улар билан баҳсга киришишга тайёрланай.

Берилган вақт ҳам тугади. Иштирокчилар бирин-кетин сўз сўраб қўл кўтара бошлашди.

— Мамлакатимизнинг иқтисодий салоҳияти тобора юксалиб, жойларда саноат, ишлаб чиқариш ҳажми ўсиб бормоқда. Бу жуда қувонарли ҳолдир, — дейди Тошкент ахборот технологиялари университети Фар­ғона филиали 3-курс талабаси Искандар ­Турсунов. — Буни вилоятимиз мисолида таққослайдиган бўлсак, қатор яхши кўрсаткичларга эришилганига гувоҳ бўламиз. Масалан, ҳудудий маҳсулот ҳажми, саноат ишлаб чиқариш, бажарилган пудрат ишлари салмоғи анча юқори. Хўш, биз, ёшлар бунга қандай ҳисса қўшишимиз мумкин? Менимча, партия вилоят кенгашининг «Истиқбол» ёшлар қаноти талабаларни шу мақсад йўлида бирлаштириши керак. Биз ёзги таътил вақтида шаҳар-туманлардаги долзарб объектлар қурилишида иштирок этсак, капитал маблағлар ўзлаштирилишига ҳисса қўшган бўламиз ҳамда мустақил ҳаёт сабоғини оламиз.

Залда ўтирган ёшлар бу таклифни қўллаб-қувватлашди.

Шоҳруҳ Ўктамов ва Топволди Холдоров ўзаро бир муддат маслаҳатлашиб олгач, бирин-кетин сўз олишди:

— Биз бу таклифни ишлаб чиқамиз ва 2015 йилда вилоятимизда талабалар меҳнат жамоалари сонини икки баробарга кўпайтирамиз.

— «Нуроний» жамғармаси вилоят бўлими ҳар бир ёшлар меҳнат жамоасига биттадан тажрибали фахрий қурувчини бириктиради.

Жавобдан завқланиб кетган ўқув иштирокчилари бу таклифни ҳам қарсаклар билан маъқуллашди.

Очиғи, модератор энди кимга сўз беришни ҳам билмай қолганди. Сабаби, ўтирганларнинг барчаси қўл кўтариб турарди. Ўқув машғулоти чоғида Фарғона компьютер технологиялари касб-ҳунар коллежи ўқитувчиси Шерзод Тошматов, Тошкент ахборот технологиялари университети ўқитувчиси Абдумалик Абдуқодиров, талабалар — Жўрабек Қодиров, Диёрбек Абдуллаев каби ўн нафардан ортиқ ёшлар мавзу юзасидан ўзларининг таҳлилий фикрлари, амалий таклифларини билдирдилар.

— Ёшларимиз қанчалар билимли ва масъулиятли эканидан қувончим ичимга сиғмаяпти, — деди ­Топволди Холдоров ўқув якунида. — Барча машғулотларда ЎзХДПдан сайланган вилоят ва шаҳар, туман Кенгашлари депутатлари, партия фахрийлари иштирокини албатта таъминлаймиз. Бу бир жиҳатдан биз учун ҳам фойдали бўлади, деб ҳисоблайман.

Партия фаоли мавзу юзасидан ёшларнинг жавобларини юқори баҳолади, ҳар бир нотиқнинг ютуқларини таъкидлаб, вилоятда олиб борилаётган бунёдкорлик ишлари, ишлаб чиқаришдаги модернизация, қишлоқ хўжалигидаги ислоҳотлар, маънавий-маърифий тадбирлар ҳақида сўзлади.

— Мен сиёсий ўқувда илк бор қатнашдим ва у бунчалик қизиқарли ўтади деб кутмаган эдим, — дейди Фирдавс Қодиров. — Энди келгуси машғулотларни ҳам қизиқиш билан кутаман.

 

Муҳаммаджон ОБИДОВ,

«Ўзбекистон овози» мухбири.



DB query error.
Please try later.