31.03.2015

«ЎЗБЕКИСТОНГА ҲАВАС ҚИЛСА, БУ МАМЛАКАТДАН ЎРГАНСА АРЗИЙДИ»

Мамлакатимизнинг барча ҳудудларида бўлгани каби Сурхондарё вилоятида ҳам Ўзбекистон Республикаси Президенти сайлови уюшқоқлик билан ўтди. Сайловчилар муҳим сиёсий жараёнда фаол иштирок этди. Мавжуд 708 та сайлов участкасида сайловчилар, кузатувчилар ва оммавий ахборот воситалари ходимлари учун барча зарур шароит яратилди.

Сурхондарё вилояти бўйича сайловда 1 миллион 500 минг нафардан ортиқ сайловчи иштирок этган бўлса, уларнинг 9 минг нафардан ортиғини Президент сайловида биринчи марта овоз бераётган ёшлар ташкил қилди. Хориждан келган халқаро кузатувчилар ушбу сайлов демократик тартиб-қоидаларга мувофиқ ўтганини ҳақида ўз фикр-мулоҳазаларини билдиришмоқда.

Парвиз Морвиж, Халқаро кузатувчи (АҚШ):

— Мамлакатингиздаги сайловда биринчи марта кузатувчи сифатида иштирок этяпман. Халқингиз муҳим сиёсий жараёнга қизиқиш билан қараётгани мени хурсанд қилди. Округ ва кўплаб сайлов участкаларида бўлиб, одамлар билан суҳбатлашдик. Барча хурсанд, сайловчиларнинг кайфияти кўтаринки. Бу келажакка ишонч мустаҳкам эканидан, мамлакатнинг эртанги куни порлоқ бўлишидан далолат беради.

Шу ўринда яна бир муҳим жиҳатни алоҳида таъкидлашни истардим. Президент сайловида қатнашган ёшларнинг кайфиятига эътибор бердим, уларнинг юз-кўзида ташаббускорлик, жўшқинлик ва фидойи­лик уфуриб турибди. Очиғи, шу нарса кўпроқ ҳавасимни келтирди.

Анатолий Наумов, МДҲ кузатувчилар миссияси вакили:

— Сайлов мамлакатнинг нафақат эртанги куни, балки том маънода келажагини ҳам белгилаб беради. Ўзбекистонда бу борада муҳим пойдевор яратилганига яна бир бор ишонч ҳосил қилдим. Бир гуруҳ хорижлик кузатувчилар билан шаҳар, туман, ва қишлоқлардаги сайлов участкаларида бўлиб, овоз бериш жараёни билан яқиндан танишдик. Қонунчиликка зид, жиддий ҳолат кузатилгани йўқ. Сайловолди ташвиқот вақтида ҳам барча партиялар номзодларига тенг шароит яратилди. Сайлов куни ҳар бир сайловчи ўзи ишонган номзодга эркин овоз берди. Ўзбекистонликлар мамлакат ҳаётидаги муҳим сиёсий жараёнда катта қизиқиш, зўр иштиёқ билан қатнашишди.

* * *

Муҳим сиёсий тадбир Самарқанд вилоятида ҳам сайловчиларнинг фаоллиги остида ўтди. Халқаро ва хорижий мутахассислар овоз бериш жараёнларини бевосита кузатиб борди.

Ли Чжон ХИ, Умумжаҳон сайлов органлари ассоциация­си режалаштириш бўлими директори (Жанубий Корея):

— Кореяда ногирон, бемор ва ўзгалар парваришига муҳтож фуқароларга сайлов бошланишидан бироз муддат аввал почта орқали кимга овоз бериши тўғрисида хабарнома юборилади. Улар ўз овозларини почта орқали юборишади, агар хабар сайлов кунидан кеч келса, овоз инобатга олинмайди.

Ўзбекистонда якка-ёлғиз, ногирон ва ўзгалар парваришига муҳтож фуқароларнинг уйига сайлов участкаси томонидан махсус овоз бериш қутиси олиб борилиб, овоз бериш жараёни ўша ерда ташкиллаштирилар экан. Бу фуқароларнинг ўз конституциявий ҳуқуқларидан тўла-тўкис фойдаланишида катта ва қулай имконият яратади.

Муҳаммад Ҳошим АБДУЛЛОҲ, Малайзия сайлов комиссияси раиси ўринбосари:

— Эрталаб соат тўққизгача иккита сайлов участкасида бўлдим. Бу вақтга келиб сайловчиларнинг ярмидан кўпи овоз бериб бўлган эди. Ана шу ҳолатнинг ўзиёқ сиё­сий жараёнга аҳолининг бефарқ эмаслигини англатади.

Таққослаш учун битта мисол келтираман. Малайзияда сайловда овоз бериш 21 ёшдан бошланади. Шунга қарамай сайлов участкаларида кўпроқ катта ёшлиларни учратасиз.

Ўзбекистонда эса бу ҳуқуқ 18 ёшдан экан. Эътиборлиси, сайловда бу ёшдагилар фаол иштирок этишмоқда. Биз буни ўрганишимиз керак экан.

Эльман НАСИРОВ, Халқаро кузатувчи (Озар­байжон):

— Ўзбекистонда биринчи бор бўлишим. Кеча Тошкентда эдим, бугун эрталабдан эса Самарқанддаман. Бу қадимий шаҳарнинг асрлар билан юзлашган осори-атиқаларидан, одамлари юзларидан нур ёғилади. Серқуёш ўлка одамлари самимий ва меҳмондўст ҳам экан.

Эътиборимни тортгани сайлов участкаларидаги гавжумлик бўлди. Сайловчиларнинг овоз бериш учун нав­батда турганлиги, улар кайфиятининг юқорилигига ниҳоятда ҳавас қилдим.

Сайлов жараёни демократик тамойиллар ва халқаро ҳуқуқ меъёрларига мос равишда ташкил этилган. Фуқаролар Ўзбекистоннинг янада ривожланиши, бахтли ҳаёти учун овоз бераётганини яхши англаб тургани қувончлидир.

 

«Ўзбекистон овози» мухбирлари

Абдурасул САТТОРОВ,

Абдумалик ҲАЙДАРОВ

ёзиб олди.



DB query error.
Please try later.