Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
28.03.2015

ИРОДА ВА МАТОНАТ — ҒАЛАБАЛАР ПОЙДЕВОРИ

Ҳар йил якунида санъат ва спорт соҳасида юқори марраларни эгаллаган ҳамюртларимизни тақдирлаш яхши анъанага айланган. Жумладан, «Эътироф — 2014»  тақдимот маросимида «Энг матонатли спортчи» номинацияси бўйича соврин Жанубий Кореянинг Инчеон шаҳрида ўтказилган II Параосиё  ўйинлари олтин ва кумуш медаллари соҳиби Миран Сахатовга топширилди.

Шу ўринда матонатли спортчимиз ҳақида қисқача тўхталсак. Миран Сахатов 1991 йил 8 февралда Тошкент вилоятининг Бўстонлиқ туманида таваллуд топган. Айни пайтда у Низомий номидаги Тошкент давлат педагогика университети 3-курс талабаси.

— Кўзи ожиз одамнинг ҳис этиш, сезиш хусусияти юқори бўлар экан, — дейди Миран Сахатов. — Аввало, ўзим соғ­лом тенгқурларимдан ортда қолишни, менга ногирон сифатида муносабатда бўлишларини сира ёқтирмасдим. Уйдагиларнинг мени мактабга кузатиб боришларини истамай, мактабга ҳам ўзим бориб келадиган бўлганман. 

Енгил атлетика билан 2010 йилдан буён шуғулланаман. Мураббийим Анна Казакова менга нафақат спортда, балки ҳаётда ҳам устозлик қилади. Бошида осон бўлмади, албатта. Аммо қийинчиликка бўйин эгмадим. 2010 йил июль ойида ўтказилган илк  мусобақада яхши натижа кўрсатганимдан сўнг Гуанжоуда бўлган Параосиё ўйинларида иштирок этиб, эстафета мусобақаларида 3-ўрин, сакрашда 5-ўринни эгалладим. Шундан сўнг бир қатор халқ­аро мусобақаларда ҳам юқори натижалар кўрсатдим. Жумладан, 2012 йил Франция очиқ чемпионатида уч ҳатлаб сакрашда 1-ўринни эгаллаб, Лондонда ўтказилган ёзги Паралимпия ўйинларида Ватанимиз шарафини ҳимоя қилдим.

— «Эътироф – 2014» тақдимот маросимида «Энг матонатли спортчи» номинациясида ғолиб бўлдингиз. Саҳнага кўтарилиб, мукофотни олаётган дақиқаларда  кўнглингиздан нималар кечди?

— Аввало, мени шу мукофотга муносиб кўрган барча спорт мутасаддилари, мухлисларга чексиз миннатдорчилигимни изҳор этмоқчиман. Бу шунчаки мукофот эмас, балки мени янада олдинга ундовчи, олға интилишга рағбат берувчи улкан кучдир. Йил давомида турли турнир, чемпионатларда ғолиб бўлган спортчилар кўп бўлди. Уларнинг барчаси ҳам шундай эътирофга лойиқ, деб биламан. Аммо айнан мени муносиб топишган экан, бундан бошим осмонга етди.

—      Айни кунларда қандай мусобақаларга ҳозирлик кўрмоқдасиз?

—      Шу йилнинг май ойида Жанубий Кореянинг Сеул шаҳрида имконияти чекланган спортчилар ўртасида Бутунжаҳон спорт ўйинлари ўтказилади. Ҳозир ана шу мусобақага тайёргарлик кўрмоқдамиз. Энг асосий ҳозирлик эса 2016 йили Бразилияда бўлиб ўтадиган  XV Паралимпия ўйинларига қаратилган...

Ҳаётда ҳар бир инсон ўз тақдирини ўзи яратади. Кимдир катта имкониятларга эга бўлса-да, кичик муаммолар билан ўралашиб қолади. Кимдир эса оғир синовларни мардонавор енгиб ўтиб, юксак мақсад йўлида курашади ва ниятига етади. Бунинг учун кишида мустаҳкам ирода, сабр-тоқат, шижоат ва матонат бўлиши керак. Бу ҳақиқатни Миран Сахатов ҳаёти мисолида ҳам яққол кўриш мумкин.

 

Дилдора ЙЎЛДОШЕВА

суҳбатлашди.




DB query error.
Please try later.