24.03.2015

ҲАР БИР ЛОЙИҲА

электорат манфаатига хизмат қилмоғи лозим

Нафақат оила, балки бутун маҳаллага бош-қош бўладиган, ҳеч кимдан маслаҳатини аямайдиган, ёшларга ўз ўгитлари билан тўғри йўл кўрсатадиган буви-боболаримиз, ёши улуғ инсонлар ҳаётнинг кўркидир. Маҳаллада бирор-бир тадбир уларнинг иштирокисиз ўтмайди. Мирзо Улуғбек туманидаги «Нодирабегим» маҳалласига борганимизда бунга яна бир бор амин бўлдик.

ЎзХДП Марказий Кенгаши ҳамда Тошкент шаҳар кенгаши ҳамкорлигида ташкил этилган «Маҳалла — аҳолини манзилли ижтимоий қўллаб-қувватлаш маркази» мавзусидаги давра суҳбатида ташкилотчилар, партия фаоллари билан бирга маҳалланинг кўплаб ёши улуғ кишилари иштирок этди.

Тадбирда аҳолини ўйлантираётган масалаларни ўрганиш, «Кексаларни эъзозлаш йили» Давлат дастурида белгиланган вазифаларни амалга ошириш, бу жараёнда ЎзХДП ташкилотлари ва гуруҳларининг иштирокини кучайтириш масалалари хусусида фикр алмашилди.

Тошкент шаҳар партия кенгаши раиси, халқ депутатлари Тошкент шаҳар Кенгашидаги ЎзХДП гуруҳи раҳбари Ҳайдар Бобохонов «Маҳалла — аҳолини манзилли ижтимоий қўллаб-қувватлаш маркази» лойиҳасининг партия электорати манфаатини ҳимоя қилишдаги аҳамияти тўғрисида фикр юритди.

— Лойиҳа орқали аҳолини манзилли ижтимоий ҳимоя қилиш борасидаги дастурларнинг бажарилишини, қонунлар ижросини ўрганиш ва уларни ҳал этишни ният қилганмиз, — дейди у. — Электорат манфаатига хизмат қиладиган масалаларни халқ депутатлари маҳаллий Кенгашлар сессиялари, доимий  комиссиялар муҳокамасига олиб чиқиш, шу асосда Олий Мажлис Қонунчилик палатасидаги фракциямизга  қонунларни такомиллаштириш юзасидан таклифлар бериш кўзда тутилган. Имкон қадар ҳар бир иштирокчининг фикри, таклифларини ўрганишга ҳаракат қиляпмиз. Улар партиямиз амалий ишлари, ташаббусларига асос бўляпти.

Давра суҳбатида ­Ўз­ХДП Марказий Кенгаши ­сектор мудири Акмал ­Турсунбоев ўтган давр мобайнида партия ташкилотлари ва депутатлик бирлашмалари томонидан электорат манфаатларини ҳимоя килиш юзасидан амалга оширилган ишлар ҳамда истиқболдаги вазифалар хусусида тўхталиб ўтди.

— Юртимизда маҳалла қадимдан одамлар ҳаётида муҳим ўрин тутиб келган, — дейди у. — Шу боис партиямиз маҳалланинг аҳолини ижтимоий қўллаб-қувватлашдаги ўрнини мус­таҳкамлашга алоҳида эътибор бермоқда. Кексаларни эъзозлаш йилида мазкур лойиҳа доирасида нафақат Тошкент шаҳри, балки мамлакатимизнинг барча ҳудудларидаги маҳаллаларда шу каби давра суҳбатлари ўтказилмоқда. Ушбу тадбирларда ёши улуғ, ҳаётнинг аччиқ-чучугини тотган инсонларнинг иштирокини таъминлаш, уларнинг фикрлари, маслаҳатларига таяниб иш тутишни режалаштирдик.

Мирзо Улуғбек тумани бандликка кўмаклашиш ва аҳолини ижтимоий муҳофаза қилиш маркази бош мутахассиси Холида Маҳмудова меҳнат ва аҳолини ижтимоий муҳофаза қилиш соҳасидаги қонун ҳужжатларини такомиллаштириш, аҳоли бандлигини таъминлаш, касб-ҳунар коллежлари битирувчилари, аёллар ҳамда жисмоний имконияти чекланган кишиларни ишга жойлаштириш масалаларида амалга оширилаётган ишлар ҳақида сўз юритди.

Шунингдек, Молия ­вазирлиги ҳузуридаги бюд­жетдан ташқари Пенсия жамғармаси туман бўлими бош ҳуқуқ­шуноси маслаҳатчиси Раъно Абдураҳимова фуқароларнинг давлат пенсия таъминотини ташкил этиш, фуқароларга пенсиялар, ижтимоий нафақалар, компенсация тўловлари ва бош­қа тўловларни тайинлаш тартиби, туман солиқ инс­пекцияси бош инспектори Бахтиёр Ҳикматов солиқ енгилликлари ва имтиёзлари хусусида ўз фикр-мулоҳазаларини билдирди.

Тадбирда иштирокчилар томонидан турли ижтимоий масалалар бўйича таклиф-мулоҳазалар билдирилди. Уларни халқ депутатлари шаҳар Кенгашидаги партия гуруҳи йиғилишида кўриб чиқиш бўйича вазифалар белгилаб олинди.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.