24.03.2015

ЎЗ ХОҲИШ-ИРОДАНГИЗНИ ЭРКИН БИЛДИРИШ ҲУҚУҚИНГИЗ КАФОЛАТЛАНАДИ

— Мен бу йил Президент сайловида илк бор иштирок этаман. Сайловга тайёргарлик жараёнларини мунтазам кузатиб боряпман. Сайлов бюллетени ҳақида тўлиқ тушунчага эга эмасман. Шу ҳақда батафсил маълумот берсангиз.

Мухлиса МАМАДАЛИЕВА,

Ўзбекистон миллий симфоник, камер ва халқ чолғулари оркестрлари жамоалари бирлашмаси ходими.

 

Шуҳрат ТУРСУНБОЕВ, Олий Мажлис Қонунчилик палатаси депутати, ЎзХДП фракцияси аъзоси:

— «Ўзбекистон Республикаси Президенти сайлови тўғрисида»ги Қонунда сайлов бюллетенининг шакли ва матни Марказий сайлов комиссияси томонидан тасдиқланади, дея белгилаб қўйилган. Номзодлар ҳақидаги тўлиқ маълумот сайлов бюллетенига алифбо тартибида киритилади. Сайлов бюллетенида уни тўлдириш ҳақида тушунтириш бўлиши керак. Шунингдек, Марказий сайлов комиссиясининг фармойишига биноан сайлов бюллетенлари сайловга камида йигирма кун қолганида давлат тилида нашр этилади. Округ сайлов комиссиясининг қарорига биноан сайлов бюллетенлари сайлов округининг кўпчилик аҳолиси сўзлашадиган тилларда ҳам нашр этилиши мумкин. Участка сайлов комиссиялари сайловга камида уч кун қолганида округ сайлов комиссиялари раиси, раис ўринбосари ёки котиб имзоси билан тасдиқланган сайлов бюллетенларини оладилар. Участка сайлов комиссияси оладиган бюллетенларнинг сони участка бўйича сайловчиларнинг рўйхатига киритилган сайловчилар сонидан ярим фоиздан кўп бўлиши мумкин эмас. Сайлов бюллетенининг ўнг томони юқори бурчагига участка сайлов комиссиясининг икки аъзоси имзо қўяди, имзолар участка сайлов комиссиясининг муҳри билан тасдиқланади. Комиссия томонидан тасдиқланмаган сайлов бюллетенлари овозларни санаб чиқишда ҳисобга олинмайди.

 

— Бордию мен сайловчилар рўйхатига киритилмай қолган бўлсам ёки сайлов куни сайлов участкасига вақтида етиб бора олмасам, бошқа сайлов участкасига бориб, овоз беришим мумкинми? Агар рўйхатда ноаниқликлар юзага келса, шикоят қилиш ҳуқуқи белгиланганми?

Самандар РАҲИМОВ, Фарғона нефтни қайта ишлаш заводи қурилма бошлиғи.

 

Зулайҳо АКРАМОВА, Олий Мажлис Қонунчилик палатаси депутати, ЎзХДП фракцияси аъзоси:

— Албатта, фуқароларнинг сайловчилар рўйхатлари билан танишиш, сайловчилар рўйхатидаги ноаниқликлар хусусида шикоят қилиш ҳуқуқлари қонунан кафолатланади. Дастлаб сайловчиларнинг рўйхати тузилади, яъни сайлов кунига қадар ёки сайлов куни 18 ёшга тўлган, рўйхат тузилаётган вақт­да муайян сайлов участкаси ҳудудида доимий истиқомат қилган Ўзбекистон Республикасининг барча фуқаролари сайловчилар рўйхатига киритилади. Лекин сайловчи бошқа сайлов участкаларида сайловчилар рўйхатига киритилиши мумкин эмас.

Сайловчиларнинг рўйхатлари олис ва бориш қийин бўлган жойларда тузилган сайлов участ­каларида сайловдан икки кун олдин, бошқа барча жойларда  сайловдан ўн беш кун олдин ҳамманинг танишиб чиқиши учун тақдим этилади. Фуқароларга участка сайлов комис­сия­сининг биносида сайловчилар рўйхати билан танишиш ва унинг тўғри тузилганлигини текшириш имкони таъминланади.

Ҳар бир фуқаро рўйхатга киритилмаганлик, нотўғри киритилганлик ёки рўйхатдан чиқарилганлик юзасидан, шунингдек, рўйхатда сайловчи тўғрисидаги маълумотларни кўрсатишда ноаниқликка йўл қўйилганлик хусусида шикоят қилиш ҳуқуқига эга. Бу масалага доир ариза участка сайлов комиссияси томонидан кўриб чиқилади. Аризани участка сайлов комиссияси кечи билан икки кунлик муддат ичида, сайлов арафасида ва сайлов куни эса дарҳол кўриб чиқиб, рўйхатга зарур тузатишлар киритиши ёки аризачига унинг талаби инобатга олинмаганлиги тўғрисидаги асослантирилган қарорнинг бир нусхасини бериши шарт. Фуқаро талаби инобатга олинмаганлиги ҳақидаги қарор устидан ўз ҳудудидаги судга мурожаат қилиши мумкин. Участ­ка сайлов комиссияси суднинг қарорига мувофиқ сайловчиларнинг рўйхатига дар­ҳол тузатиш киритади.

 

— Ўзбекистон Республикаси Президенти учун овоз бериш жараёнлари якунлангач, сайлов натижалари қай йўсинда аниқланади?

Муножат РАЖАБОВА, Сирдарё вилоятидан, ўқитувчи.

 

Дилмурод САЪДУЛЛАЕВ, Олий Мажлис Қонунчилик палатаси депутати, ЎзХДП фракцияси аъзоси:

— Округ сайлов комиссияси участка сайлов комиссияларининг баённомалари асосида округ бўйича сайловчиларнинг умумий сонини аниқлайди. Шундан сўнг, сайлов бюллетенлари ҳамда варақаларини олган сайловчиларнинг сони ҳамда овоз беришда иштирок этганларнинг умумий сони таққосланади. Ҳар бир номзодни ёқлаб берилган овозлар алоҳида-алоҳида санаб чиқилди. Шунингдек, ҳақиқий эмас, деб топилган бюллетен ҳамда варақалар нисбати инобатга олинади.

Округ бўйича сайлов натижалари сайлов комиссия мажлисида аниқланади ва баённомада акс эттирилади. Баённома комиссия раиси, комиссия раисининг ўринбосари, комиссия котиби ва аъзолари томонидан имзолангач, белгиланган тартибда Марказий сайлов комиссиясига юборилади.

 

Зилола УБАЙДУЛЛАЕВА

тайёрлади.



DB query error.
Please try later.