21.03.2015

ПРЕЗИДЕНТЛИККА НОМЗОД ҲОТАМЖОН КЕТМОНОВ СУРХОНДАРЁЛИК САЙЛОВЧИЛАР БИЛАН УЧРАШДИ

Сурхондарё вилоят касаба уюшмалари кенгашининг мажлислар залида ўтказил­ган учрашувда вилоят фаол­лари, партия аъзолари, ёшлар ва оммавий ахборот воситалари вакиллари иштирок этди. Учрашувни Ўзбекистон Республикаси Президенти сайловини ўтказувчи 9-Сурхондарё округ сайлов комиссияси раиси Абдукарим Аҳмедов очди. Президентликка номзоднинг ишончли вакили, халқ депутатлари Сурхондарё вилоят Кенгаши депутати Чори Жумақулов йиғилганларни номзоднинг таржимаи ҳоли билан таништирди.

Тадбирда Президентликка номзод Ҳотамжон Кетмонов ўз дастури юзасидан нутқ сўзлади.

— Дастурда ижтимоий ҳимояга муҳтож аҳолини ҳар томонлама қўллаб-қувватлаш, аҳоли бандлигини таъминлаш, касб-ҳунар коллежлари битирувчиларига кенг қулайликлар яратиш устувор вазифа этиб белгиланган, — деди Президентликка номзод. — Шу билан бирга кам таъминланган оилаларнинг манзилли ижтимоий ҳимоясини кучайтириш, юқори сифатли ва мақбул тиббий ёрдамдан кенг фойдаланиш имкониятини таъминлаш масалаларига ҳам алоҳида эътибор қаратилган. Улар аҳолининг турмуш фаровонлигини ошириш, мамлакатимиз тараққиётини юксалтиришда муҳим аҳамият касб этади.

Номзоднинг дастурида иқтисодий сиёсатдаги асосий устуворликларга кенг ўрин берилган. Жумладан, мамлакатимизнинг молиявий ва иқтисодий қудратини оширишни кучли ижтимоий сиёсатга уйғунлаштириш, шу орқали аҳолининг қўллаб-қувватлашга эҳтиёжманд қатламлари турмуш даражасини янада ошириш механизмини такомиллаштириш зарурлиги қайд этилган. Бунинг учун асосий диққат-эътибор ишлаб чиқарилаётган маҳсулотлар сифатини ошириш, уларнинг таннархини пасайтиришга қаратилмоғи лозим. Бундан ташқари, тўғридан-тўғри хориж инвести­ция­ларини жалб қилиш, замонавий технологиялар келтириш ҳам дас­турда устуворлик касб этади.

Очиқ, ошкора ва самимий мулоқот руҳида ўтган учрашувда сайловчилар ўз фикр-мулоҳазаларини билдиришди.

Тўрабек ЗОИРОВ, ЎзХДП Термиз туман кенгаши раиси:

— Ҳотамжон Кетмоновнинг дас­турида ижтимоий-иқтисодий ҳаётимиздаги муҳим йўналишлар ўрин олгани бизни қувонтирди. Уларнинг амалга оширилиши электоратимиз вакиллари ҳар томонлама қўллаб-қувватланишида долзарб аҳамият касб этади, деб ўйлайман. Хусусан, меҳнатга лаё­қатли аҳолининг муносиб ҳақ тўланадиган иш топишга интилиши қўллаб-қувватланиши, шахсий ташаббускорлик ва тадбиркорлик рағбатлантирилиши фаровонликка хизмат қилиши табиий. Пенсионерлар, меҳнатга лаёқатсиз кишиларнинг ҳаётий эҳтиёжларини тўлақонли қондиришни кафолатловчи пенсия таъминоти ва ижтимоий нафақаларнинг самарали тизимини яратиш ҳам бугуннинг асосий вазифаларидан биридир. Шунинг учун номзоднинг дастурини сайловчилар орасида кенг тарғиб қилишимиз, бу борадаги ишларимизни кучайтиришимиз зарур.

Райҳона РАҲИМОВА, Шўрчи маиший хизмат кўрсатиш касб-ҳунар ­кол­лежи директори:

— Қонунларимизга тегишли ўзгартиш-қўшимчалар киритилгани сайлов жараёнларининг очиқ ва ошкора ўтишида муҳим ўрин тутмоқда. Буни мамлакатимизда фаолият олиб бораётган ЕХҲТнинг Демократик институтлар ва инсон ҳуқуқлари бўйича бюроси ҳамда МДҲ кузатувчилар миссияси экспертлари ҳам алоҳида эътироф этмоқда. «Ўзбекис­тон Республикаси Президенти сайлови тўғрисида»ги Қонунга амал қилган ҳолда ўтаётган бугунги учрашувда Ҳотамжон ­Кетмонов қатор устувор масалалар хусусида алоҳида тўхталиб ўтди. У ўз дастурида мамлакатни ижтимоий-иқтисодий ривожлантириш, ёшларнинг таълим олиши, уларни иш билан таъминлаш омилларига эътибор қаратган.

Ҳаётда кўриб, кузатиб турибмиз, коллеж битирувчиларини ишга жойлаштириш осонликча бўлаётгани йўқ. Бу борада ечимини кутаётган масалалар ҳам йўқ эмас. Президентликка номзод касб-ҳунар коллежлари битирувчиларига имтиёзли микрокредитлар тақдим этиш, ўз бизнесини очишда белгиланган йиғимлардан озод қилиш орқали уларнинг интилишлари ва ташаббусларини рағбатлантириш, бунинг учун мақбул шароит яратиш кераклигини таъкидлаб ўтди. Мен унинг дастуридаги таклифларни қўллаб-қувватлайман.

Бўри ЖАЪФАРОВ, «Ўзтелеком» акциядорлик компанияси Сариосиё туман бўлими раҳбари:

— Халқимиз Президент сайловига катта ҳозирлик кўрмоқда. Номзодлар учун тенг ҳуқуқ ва шароит яратилгани ҳам демократик ислоҳотларнинг ёрқин намунасидир. Вилоятимизда 1,5 миллиондан ортиқ сайловчи бор. Улар мустақил фикрлаб овоз бериши учун қулай шароит яратилган. Бу сайлов келажагимиз, юртимиз тараққиётида муҳим аҳамиятга эга бўлади. Шунинг учун ҳар бир номзоднинг дастури, таклифларини чуқур ўрганишимиз керак. 

Ҳотамжон Кетмоновнинг дастурида аҳолига юқори сифатли ва мақбул тиббий ёрдамдан кенг фойдаланиш имкониятини кенгайтириш масаласи белгилангани бизга маъқул келди. Сариосиёда 150 минг нафарга яқин аҳоли истиқомат қилса, уларнинг 70 фоиздан ортиғи тоғли, қишлоқ ҳудудларида яшайди. Шундай экан, тиббий хизмат яхшиланиши, муҳтожларга ўз вақтида ва малакали тиббий хизмат кўрсатилиши долзарб масала ҳисобланади.

Ҳеч биримизга сир эмас, тез тиббий ёрдамдан фойдаланиш, кексалар, пенсионерлар ва ногиронларга малакали тиббий хизмат кўрсатишда айрим камчиликлар учраб турибди. Олис ҳудудлардаги дорихоналарда сотилаётган дори-дармонлар нарх­ларида номутаносибликлар кузатилмоқда. Уларнинг бартараф этилиши соғлом турмуш тарзининг қарор топишига, тиббий маданият юксалишига хизмат қилади, деб ўйлайман.

Учрашувда, шунингдек, ЎзХДП «Истиқбол» ёшлар қаноти Сурхондарё вилоят бўлими етакчиси Суннатулло Бозорбоев, Ангор маиший хизмат кўрсатиш касб-ҳунар коллежи ўқитувчиси, ЎзХДП фаоли Ҳусниддин Бердиев ва бошқалар сўзга чиқиб, номзод дастурида илгари сурилган таклифларнинг аҳамиятли жиҳатларига тўхталиб ўтишди.

Сайлов демократик ҳуқуқий давлатнинг узвий белгиси, халқ хоҳиш-иродасини ифода этишининг асосий шакли ҳисобланади. Президентликка номзод Ҳотамжон Кетмоновнинг сурхондарёлик сайловчилар билан учрашуви барчада катта таассурот қолдирди.

 

Абдумалик ҲАЙДАРОВ,

«Ўзбекистон овози» мухбири.




DB query error.
Please try later.