Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
14.03.2015

ҲИНДИСТОНЛИК ЭКСПЕРТЛАР: «ЎЗБЕКИСТОНДА ЮКСАК ДЕМОКРАТИК ТАЛАБЛАРГА ЖАВОБ БЕРУВЧИ МИЛЛИЙ САЙЛОВ ТИЗИМИ МАВЖУД»

Яқинлашиб келаётган Ўзбекистон Республикаси Президенти сайлови Ҳиндистон жамоатчилиги томонидан диққат билан кузатиб борилмоқда.

Хусусан, «Ҳиндистон-МДҲ» савдо-саноат палатаси бош котиби Жйотсна Дюбе Чоудхури хоним «Жаҳон» ахборот агентлиги мухбирига қуйидаги фикр-мулоҳазаларини баён қилди:

— Ўзбекистон истиқлол йиллари давомида фаол ривожланаётган, саноатлашган давлатга айланди. Энергетика, автомобилсозлик, тў­қимачи­лик, қишлоқ хўжалиги, туризм ва бошқа соҳалар жадал ривожланди, мамлакатнинг экспорт имкониятлари ва йўналишлари кенгайди.

Мен ҳар гал юртингизга ташриф буюрганимда кўп­лаб ижобий ўзгаришларнинг гувоҳи бўламан. Мисол тариқасида янги қурилган муҳташам иншоотлар, кўчалар ва кўприклар, мактаб ва санъат биноларини келтириш мумкин.

Фикримча, 29 март куни бўлиб ўтадиган Ўзбекистон Президенти сайлови мамлакатингизнинг янада тараққий топиши йўлидаги навбатдаги бос­қичдир.

«Political Events» журнали сиёсий шарҳловчиси ­Мохан Кришен Дхар:

— Мен ўтган йили юртингизда бўлиб ўтган парламент сайловларида халқаро кузатувчи сифатида иштирок этдим ҳамда пойтахтдан узоқда жойлашган бир неча ҳудудларда овоз бериш жарёнини бевосита кузатдим. Шу билан бирга, кўп­лаб сайловчилар билан суҳбатлашиб, уларнинг Ўз­бекистонда олиб борилаётган ижтимоий-сиёсий ва иқтисодий ислоҳотларга муносабати ижобий эканлиги ҳамда фуқароларнинг порлоқ келажакка бўлган ишончининг кучлигига амин бўлдим.

Ишонаманки, мустақил тарз­да фаолият олиб борувчи Марказий сайлов комиссияси бўлажак Президент сайлови очиқ-ошкора, холислик ва шаффофлик муҳитида ўтишини тўла таъминлай олади.

Жамиа Миллия Исломия университети Халқаро тадқиқотлар академияси профессори Рашми Дораисвами хоним:

— Ўзбекистонда мустақиллик йилларида ижтимоий-сиёсий, ҳуқуқий, иқтисодий соҳалар изчил ривожланиб бориши натижасида умумэътироф этилган халқаро стандартлар ва юксак демократик талабларга ҳар томонлама жавоб берувчи миллий сайлов тизими шаклланди.

Мен 2007 йилда юртингизда бўлиб ўтган Президент сайловида халқаро кузатувчи сифатида иштирок этганман. Эрта тонгдан бошлаб ёшу кексанинг сайлов участкасига келиб, навбат билан ўз танлаган номзодига овоз бериш жараёнини кузатиш жуда қизиқарли бўлганди ўшанда.

Ўзбекистон демократик қадриятлар ривожланиб, фуқаролик жамияти институтлари фаоллашиб бораётган давлатлар сирасига киради. Мамлакат ҳаётидаги муҳим сиёсий воқеа саналмиш сайловларнинг кўппартиявийлик асосида, тенг курашлар ва холис рақобат остида очиқ ва ошкора ўтиб келаётгани фикримнинг далилидир.

Ўйлайманки, бу галги сайлов ҳам барча демократик андозаларга мос ҳолда ўтиши билан мамлакат ҳаё­тидаги тараққиётнинг янги босқичини бошлаб беради.

Бал Рам Саини, БРИКС савдо-саноат палатаси ­раиси:

— Ўзбекистон МДҲ мамлакатлари орасида ижтимоий-иқтисодий ривожланишнинг тўғри, пухта ўйланган йўлини танлаб олган саноқли давлатларнинг бири саналади.

Юртингизда иқтисодиётни модернизация қилишнинг муҳим шартларидан бири сифатида қулай инвестицион муҳит яратиш ва хорижий сармояларни жадал ўстиришга алоҳида эътибор қаратиб келинмоқда. Ҳуқуқий кафолатлар ва имтиёзлар ҳиндистонлик ишбилармонларни ҳам бефарқ қолдиргани йўқ. Бугунги кунда Ўзбекистонда ўзаро ҳамкорликда ишлаётган 60 дан ортиқ корхона мавжуд бў­либ, уларнинг 20 га яқини 100 фоизлик ҳинд тадбиркорлари маблағи асосида фаолият юритаётгани эътиборга молик.

Мустақиллик йилларида мамлакатингизда сайловларни эркин ва ошкора ўтказилишини таъминловчи ҳуқуқий асос яратилди. Шу билан бирга, фуқароларнинг сиёсий маданияти, ҳуқуқий онги, ижтимоий фаоллиги ошди. Фикримча, бўлажак Президент сайловида бу жараёнларнинг ёрқин мисолини кўрамиз.

 

«Жаҳон» АА,

Деҳли.



DB query error.
Please try later.